الغراب و البومة

أنا ويّاك يا مشومة أنـــا الغراب و أنتـــى البومة 
أيّ تجينــى حاشتى بيك ، إيجا بزربه توحّشتك و عندى مانورّيك ،
عندى ليك حكاية باش تعجبك برشة و تزهيك ، هيّه آش قلت ؟ تجيني و إلّا نجيك ؟
عزيزتى الغالية  تتفكّر كلام اللّيل ؟ تتفكّر كى نحكيو للصباح و الوقت يولّى قصير ؟ 
تتفكّر كلامى عالحب و سعات كى نقلب للتزوفير ؟ تتفكر آكة اللّيالى ؟ أنــا لامرّة نسيت و ديما على بالى !
مخبّيلك حكاية ، أما المرّة هاذي عليّ أنـــا ، كي العادة .. ندور ندور قد ما نبعد ، أوّل ما تضربنى لحيوط نلقاك كان إنتى // عزيزتى الغالية ياخى ما فدّيتش ؟ توّه نرمال آنـــا ؟ قدّاش من مرّة نتعبك معايا و نسهرك بحكاياتى الفارغة ؟ قدّاش من مرّة نطّرشق نحكى طول من غير ما نسئل حتّى " شنيّ أحوالك " حتّى بالكذب ؟ قدّاش من مرّة تكّيت عندك و ماخلّيتنى نهز راسي كان ما ورّيتنى إلّى الدنيا محلاهة ؟ قدّاش من قهوة عملنا و آنـــا العصب يهز فيّ و يحط و لا مرّة قتلك محلاك كى تصبر عليّ ؟ ما فدّيتش منّى ؟ ما كرهتنيش ؟
خاطر كي جيت نشوف قدّاش من " قــــدّاش " نلقاهم معاش يتحسبو و كرهت روحــى .. ! هيّه آش قلت ؟ تجيني و إلّا نجيك ؟
عزيزتى الغالية  ماك تعرف قدّاش نضيع بلا بيك  !