هــيّ و آنــــا

هيّ : باهى ، كى ما تحبش تقول قدّاش ، قول كيفاش ؟
آنــا : بعنف ! بهبال و زلزال و فوضى و حصار !
هيّ { تتبولد } : موش برشة ؟؟
آنــا { نتبولد زادة } : شنيّ إلّى برشة ؟
هيّ : الحب هذا الكل ..! ياخى لاباس تحب فى وحدة كيفى ؟؟ مهبولة ، معقدة ، كارهة روحها و كارهة الدنيا و إلّى فيها و كارهة الكره بيدو !! يا سخطة إفهم ، فمّا ماخير .. كمّل أنا موش متع حب ، ملّخر !
آنــا : توّه قلت نحبّك أنـــا ؟ شكون جبد الحب ؟؟
هيّ { تضحك } : موش قتلى هبال و زلزال و دراشنيّا .. ؟
آنــا : صحيح ، أما كلمة حب مجبتهاش ...
هيّ { تتبولد } : ديما هكّة إنتوما ! لا تقولوها لا تفرحونا بيها !! جرد كلمة ما تخرج من آك الفم كان مالعيد للعيد !!
آنــا : شنيّ توّه ! موش قتلى برّه حب وحدا أخرى .. و إنتى بيك و عليك ... و موش متاع حب ...
هيّ { تحسها باش تربرب } : آآآآآآه منكم !! توّه قتلك برّا لوحدة أخرى ؟؟؟ ماك زعيم كان فى مدّان وجهك ! بوهم الحنين !! كمّل الكل ملايكة عندك ! هاذى مشاكل فى دارهم ، هاذى باش تقرّيها ، هاذى باش تعلّمها ، هاذيكة صاحبت صاحبك هاذى تسخف ، هاذى ماعندها حد ، هاذى أختك فايسبوك ، هاذى قرات معاك ، هاذى و هاذى و هاذى و !!
آنــا { فرحان من **** } : تغير ياخى ؟
هيّ { تتبولد } : علاش باش نغير ... ياخى كان باش تعمل حاجة ، نجّم نفيق بيك أنــا ؟
آنــا { نضحك } : باهى ، كى نعمل " حاجة " و تفيق بيّا ... تغير ياخى ؟
هيّ { وجها تقلب } : نـــعـم ؟ متاعى راك !! كمّل... مانيش شادّتك بسّيف .. تحب تمشيلهم ..برّه !
آنــا : متاعى راك و مانيش شادّتك بسّيف .. ميجيوش معا بعضهم ..
هيّ : آش تحب تسمع ، ملّخــر ..
آنــا : نحب نبوس ! يزّى ماسمعت !
هيّ { تتبولد } : حـــرام !
آنــا : موش لازم ! تى بوسة راهى ! و ما حـــرام كان إلّى تعمل فيه معايا ! شيـــاح بوه كلب !
هيّ { تحسها باش تسخطنى بكرسى } : آآآآآآه منك !! يا سخطة باش تكفّرنى !!
آنــا { مفجوع } : لاباس ... ؟
هيّ { تضحك } : لاباس علّخر !
آنــا : بالحق شنوّه فمّا ؟
هيّ { تضحك } : يا سخطة باش تهبّلنى !
آنــا : كان تشوف روحك ..! إلّى ما يدرى يڨول سبول ! البوس حرام و الحب مجاوزة ممنوعة !! و ما خفي كان أعضم !!
هيّ { تضحك } : أنـــا ،،؟ خاطينى ... ماشدّيتك على شيئ ..
آنــا : لا .. حتّى طرف .. ردّيت روحك مهبولة و موش متاع حب و تزلع بالعشرة وافى و البوسة بتحقيق !!
هيّ { تضحك } : باهى .. يا سيدى إفهم .. ما تصدقش كل شيئ قلتو .. إفهم ...
آنــا : يعنى ... ؟
هيّ : باهى ... هذا سر البنات ! حل وذنيك و ركّز ..
آنــا : هانى معاك ، أحكى ..
هيّ : يا روح روحى .. كى نقلّك لا على بوسة .. ماك إسترجل و فكها ! نحيها بسّيف !
آنــا : نغتصبك يعنى ... ؟
هيّ { تضحك } : لطف منّك ! تى لا موش أكّاكة .. يعنى ..
آنــا : يعنى إغتصاب غير درج ... ؟
هيّ { تضحك } : يا سخطة ! مبلدك !! تى لا ..! باهى أخطانا مالبوس .. نرملمون كى طفلة تورّيك الخايب .. هذاكة باش تعرف بلاسطها عندك ..
آنــا : أنــا نعرف تورّى الخايب و العين الحمرى كى تحب تخسر عباد ..
هيّ { تضحك } : تى لا موش أكّاكة .. يعنى .. كى أنــا نقلّك موش متاع حب ، إنتى تقلّى " نحبك " و أكاهو ..
آنــا : عالم غريب !
هيّ { تضحك } : لطف منّك !
آنــا : نحكى آنــا ؟
هيّ : أحكى ..
آنــا : نــحـــبك ! و نعشق دين ربّك ! و ملّخر نعبد دين والديك ! نــحـــبك بعنف ! نــحـــبك بهبال و زلزال و فوضى !! نــحـــبك حصار ! كيما إنتى نعشقك مهبولة ، ما تتفهمش و ما تتفسرش أما نــحـــبك و أكاهو ! نــحـــبك و نعشق فيك الضّحكة و الفن .. نــحـــبك كيما أنتى هكّ و حتّى كى تحرمنى مالبوسة .. نــحـــبك كى تغير و ماتحبش تتكلّم ، تشرى عركة مالحيط و تبدى تفلّم ، نــحـــبك كى تهز خشمك و تستنّى باش نجى نرضّيك و نبشبش بيك .. نــحـــبك كى نقربلك .. كى نحملك .. كى نسرق بوسة من رقبتك .. و نزيد نــحـــبك كى نضيع فى رقبتك و خطوط يديك... كى نبلبزلك شعرك و إنتى كى الطفلة الصغيرة قريب تبكى باش نسيبك ... .. كى نسرق من ريحتك و تبقى فى حوايجى توصّلنى .. و نعشقك أكثر كى تتذكرنى .. تطلبنى و تبقى ساكتة و كان كى قريب تقص الفلوس نلقاو ما نحكيو.. نــحـــبك و نزيد فى كل مرّة نراك فيها و كل قهوة و إلّا خرجة و إلّا طرح تشرّد قدّام باب .. نــحـــبك و نزيد نــحـــبك كل ما تبعد و ما نراكش ... نتوحشك أكثر .. و نهبل بيك .. نــحـــبك و نزيد نــحـ ..
هيّ { تبــكى } : يزّى .. أسكت ياهم !
آنــا : آش عندى حكيــت أنـــا باش نقلقك ؟ نــحـــبك !! هذاكة آش قلت !!
هيّ { تبــكى } :.. أسكت.. يزّى ! نحب نروّح .. هيّا قوم !!
آنــا : باهى .. كيما تحب " صديقتى " .. إيجا السّاعة نمسحلك الكحل الهابط ، لا يقولو يحب " غــولة "
هيّ { تبــكى و تضحك } :.. ديما بليد .. !
آنــا : أي ، بليــد و نــحـــبك إنتى ياغولة ... بليــد و نــحـــبك إنتى يا " مجرّد صديقة " ..