سنة أولى نسيان : {من دون رقـــابـة } [4]

إلّى يزرع الرّيح يحصد كان غبـارو .....،الطفلة ، الصبيّة ، المرأة .. عمرك ما تنجم تحصرها بعمر .. و عمرك ما تنجّم تحاسبها أو تقلها كبرت .. أو ميجيش فى عمرك إلّى تعمل فيه .. دبدوب يفرّحها .. الشكلاطة إدمان .. وبالأخص كى تبدى بعملتها .. أكة البراءة إلّى تهبط عليها ! تحسّك بخزرات بسيطة بالعطف و إلى كان تزيد شويّ تبكّيهـا !


الطّفولة نفسها إلى نفسها إلّى تتحوّل لذلك التمفريخ العضيم إلّى تعملو بعد ما تقصها ! أكة التّصرّفات متاع تدمير ذاتى !ياخى شنيّ حكاية كل طفلة معى شعرها كى تقصها ؟؟ ياخى غل ؟ فدّة تعمل ؟ قلق ؟ أوّل مستفيد من قطع العلاقات هيّ حجّامة الحومة ! تلقى الطّفلة صبغت ، قصّت .. مخلّات فى شعرها شيئ ! بيناتها و بين الڨرعة شبر ! و تقلّك حفّفت فيه كهو !! .. أوكى .. الشعر شعرك .. أما مزمرة يقولو كنت مصوحب عزرِى يا مدموازيل !


أخيب تمفريخ ... كى تتعلّم تصوحب كل شلاكة نبّهتها باش ما تدورش بيها .. رحلة الشماتة تمتد إلى أنها تتعلّم تبوس و تعنّق و تخلّى لدين توصل لضهرها .. رقبتها .. وتكمّل تعرّى و تورّى .. هاي زنود ، هاو صدر ، هاي ساقين .. و العذر إلّى أقبح من الذّنب كى تحب تفسّر إلّى حد ماهو صاحبها ! لا .. صحّيت .. برافو .. ! تصفيقة حارّة !ياخى تفسّر علاش ؟ وإنتى فيبالك مزّلنا نجمو نرجعو بعد هذا ؟ فيبالك كى باش نشوف كل دقيقة بجنبك واحد يتلمّس فيك و يسرق فى خزرات الشّهوة من بن ثنيات حوايجك ، باش نقول " ملّا قطوسة طلعت ! الرجال هابلة عليها ، أيّ نرجعهاخير ؟ "كان أنـــا حرمتك من بوسة باش ما تتقالش فيك كلمة ! توّه بعد قعداتك المشبوهة مزّلت نجم نسلّم عليك من أصلو ؟ باش نجم نقول كانت صاحبتى .. ؟ أنســى !مدموازيل .. إسكر ، عرّى ، تكيّف بزايد و زيد بوس و ورّى الكبت إلّى صنعتو فيك .. إهمل و أسهر و ما تنشاس تتصوّر و مركى و أحكى عالمور و قول إلّى الخنقة تعدّات و هاذى أحلى عيشة ..! أخرج و أعرف أكثر من معرفة جديدة و زيدهم عالمعارف القديمة .. هبّط ترف مالسماء و أنقب القعّه و أعمل قد ماتنجم ! أما ما تنساش ، إلّى تعمل فيه الكل لا يخلّينى نجي نعارك لا نسئل عليك لا نتشرّف بيك ، شكون أنـــا باش نجى نعارك و بأنا حقّ ؟ إبعد و زيد إبعد و ديجا شطبت عليك .



نسبة الكحول .. كلمة قديمة .. كنت نقراها فى عشيرتى الدّبوزة ،مرجعتش نشرب و لا نخمّم نشرب ، باب و سكّرتو كى حكايتك ! دبوزت اليوم ألكول ساك ! حرق بيه كل سوفونير ، من حوايجى إلّى تذكرنى فيك لكة البوس الأورونج إلّى تعرفها كان إنتى .. أكة النومرو إلّى لعمرى حبيت نحفضو باش منمدّو لحد ، و كى نهرب إنتى كهو تلقانى ..


حملــة نظافة للتصاور ، لكل كلمة حكيناها ، كل ميساج مخبّى .. تعرف علاش ؟خاتر إنتى اليوم موش الطّفلة إلّى نعرفها ، موش إلّى سكّنتها فى خيالى ، موش لحنينة الباهية العاقلة إلّى تحب و تعشق ... ، إنتى كل حاجة نكرها ! إنتى طفلة و الكلام فالبنات عيب ! نحسك مـت و من فضلك خلّيك ميته ما تتفكرنيش !


كان غلط و قلت " توحّشتك " راهى موش ليك إنتى ، للطفلة إلّى نعرفها ! موش هالشلاكة الجيدة ، إلّى من ساق لـساق ! وخايف لا تعمل الرّيـــحة !
حبّيتـك نوّارة .. موش مشمـوم من يد لـ يـد .. النوّارة نستحفضو عليها .. نخبّيوها بين الكتب ، حتّى فى موتها تبقى ذكرى حلوّة .. و المشموم يطّيش من غدوة.
{يتبـع}