سنة أولى نسيان : { اُشــرب لوهــام } [3]

" مزلت كيف ما آنـا .. كل يوم نقوم فالصباح ، 3 حجات تدور فى راسى .. كالمثمول .. كى حلمـة صعبت باش نتفكّرها ... كى كل صباح من آكة النهار نفس القـرار .. ~ نبطّل الدخّـان ، ننساك إنتى ، نشــد خدمــة . اليوم ، شديت الخدمة ... لانسيتك و لا بطلت الدخان .. طلعتو الزوز كيف كيف ، موش نقصد { الضرر بصحّة } نقصد إدمــــان ! "


ســارة .. هيّ صبيّة تعرفت عليها اليوم فالخدمة .. برّغم من أنّى ماشى حالتى حليلة و عنيّه منفوخة بالنوم .. و عركتى معى المراية مزّالت مستمرّة .. إلّا أنّو ســارة كبشت باش تعرفنى أكثر .. هيّ محلاها لحقيقة ... و قوّة الصدفة إلّى عندها اُخت لوناتك [ نضّاراتك ] .. ولّيت نخزرها نضحك وحدى .. آش عجبها فى كعبة دمــار كيفى ؟؟!وقت الفطور { و لأنّى جديد عالبلاصة } خرجت معاها باش نعرف منين نجم نلقى ريستو .. و الأهم قهوة !!تعدّى الفطور كلّو غمزات و ضحكة .. و جاء وقت القهوة .. بتتليفة سحريّة من الأخت ســارة نلقى روحى وحدى معاها فى طاولة فالكوان ! إختلات بيّا و فقت مخّر !! و بدى أكثر فيلم نكرهو .. بدات " تسلـــخ فيّـــا " بالأسئلة من نوع : كفاش تحب مرتك ؟ قدّاش عمرك ؟ مزيانا أنا ؟ آش قريت ؟ تخمّم فالصغار ؟ يعجبك جو كليك يعملو الخرجات ؟ ... و إستمرّت .. لـ أكثر من ساعة .. ثمّ :ــ ما قتليش السّاعة ! عندك شكون فى حياتك .. ؟و سكت ... و حسّت دينيا سكتت ... وينو الحس ؟ ويني الجوجمة ؟ ويني الموسيكا ؟ أي حد يطيّح أي حاجة با زعمة زعمة نركز معاه !! أي حاجة ! زلزال ! إعصار ! تسونامى ، إرهاب ، المرزوڨى .. ! أي حاجة .. ضحكة ســارة .. فكتلى سيڨارويا و قتلى : صحّ ليها ..ها ســارّة لباس ؟ آش من صحّـــة !! لا علّخر ! بالأمارة هانا معدّين أوفر و نحكيو علّخر ! تي ممكن ترانى ما تعرفنيش !! { أكيد ما نجمتش نقول هالكلمتين بالقوي }


رجعت نخدم .. تدور فى مخّى حاجة وحدة ! شبيني سكـت !! علاش سكــت !! يا حومة راك سيليباتار !! كان ما فيبالكش أعمل ميز آ جور !!! هــــاي !! شنيّ هالرّيق ! فيدال لطفلة ماكش معاها ؟؟! حل عنينيك ! ســارّة شاريتّك و عاشقة فى عيوبك ! أكيد نفحة قلّو حب من أوّل نضرة أما إستغل الفرصة ... !


.. بعد 4 سوايع فى حيــط :أخطاك قلّو تصوحب و عنّقها و سكتها و رضّيها و ضحكها و خاف عليها ... شكون هذا شكون هذيكة ، شبيك لتوّه ، وين كنت .. علاش كيفاش وقتاش وجايع راس زايدة ! مشاكلك مع الدّار يزّيك ، كان قلقت تفكر مشاكل قرايتك وجوك سى بون !أساسا علاش موجود التصوحيب ؟؟ تضييع وقت ياراجل # فـيــــــــق .. !


لحقيقــة المــرّة :الدينيا بصعبها عمرها لا كانت لواحد وحدو .. خاطر بعد ماتمشى سنين مالعمر و بعد فجعت أوّل شيبة .. تفهم إلّى أعز ما ملكتو فالدّنيا هيّ السوفونير لحلوّة .. تعرف إلّى أحلى بلايص مشيتلهم محلاو كان بناسهم و العبد إلّى معاك وقتها .. كان ماكش مصدّق برّه وشوف .. تاو تلقى البنى هوّ هوّ ، أما تحس كل شيئ تبدّل .. العمر قصير .. و ليّمات لف لف .. أما وحدك .. إحساسك بالوقت يولّى معدوم .. كى اليوم كى البارح كى غدوة كلّى بعدو .. العمر و قصرو بفرحتو و إلّى مخبّيه .. عمرو ما يكون لعبد وحدو .. خاطر بكل بساطة من حقّك باش تحلم إلّى باش يجى نهار وتاخو إلّى تحبها ، من حقّك تقسم فرحتك كان معى إلى تحبها ، من حقك تحلم إلّى كيف الدنيا الكل تجبد بيك . . . تلقى إلّى تحبها معاك كونطر الدّنيا ! من حقّك تتعب من كثر ما خبّيت و تحلم بالطفلة إلّى ما تستحقش تحكيلها لحكيات من أوّلها خاطرها حاضرة فى كل لحضة من حياتك و معاك .. من حقّك باش تحب ترى روحك مزيان فى عنين إلى تحبها .. من حقك تعرف إلّى فمّا شكون يجاوبك بكلام ستنيتو برشة كى تحكى مشكل صاير عليك ... باش ما تسمعش الأجوبة الستندار متاع : نرمال ، لباس ، يصير عالرجال ، ... ، من حقك باش تحلم تسمع كلمت : هــانى معـــاك .


ديما يقولو أصعب خطوة هيّ الأولى .. و آنـــا تعبت و فدّيت باش نعاود مالأول .. لتوّه مزلت نخمّم فيك .. حتّى فى ركشت اليوم فالقهوى .. الطفلة مهبلة روحها حكايات .. و آنـــا نغلـى .. خاطر ما نستغربش تطلع مشيت للبحر إنتى و آكــا الشّلّــة .. خاطر نعرفك تعشق البحر هايج و فارغ فى عز الشتاء !! .. يــا إدمـان إنتــى .. بيناتنا .. توحّشتـــك .. .{يتبـع}