روبــابيـكيــا ..

تخيّـل .. ترجع بالوقت و تصلّـح حيـاتك ، تصلّـح كل خطوة غالطة عملتهـا ، تشطب كل معرفة خابية كل لحضة تعدّت عليك بوجاعة كل غلطة .. ممكن تقولو " اللّيلـة عمّى رامـــى بالعو .. وإلّا مستهلـك " أما .. موش صعيبـة" .. قدّاش من واحد عدّا حياتو يستنّا فى فرصة وحدة .. يثبت بيها إنسانيتو .. إلّى هوّ يستحق يعيش موش زايد على هالمجتمع .. يقرى القراية إلّى يحب يقراها و يخدم الخدمة إلّى يحب عليها زادة ... و يصوحب الطّفلـة ألّى حبــها ..تخيل كل حيـاتك تمشّيـها عالسكّـة إلّى تحب عليهـا إنتى .. لا داركم يدّخلو فيك لا حد عندو الحق يفرض عليك شيئ .. الظّروف ديمـا مواتيه .. و جوّك حلى جو !شني المشكل كى حبّيت تطلع " نحّـات " و داركم شاطوك للمستير وطلعت " طبيب أسنان " ؟شني المشكل كى حبّيت تطلع " بيلوت " و ماعندكش 15 مليون للقراية عملت " ميكانيك سفن " ؟شني المشكل كى حبّيت تطلع إلّى هوّه ! كلّـو يتصلّح !ما عندكش صوحاب ؟ إنطوائى ؟ حياتك فاشلة أكثر ماللّازم ؟؟ شقولك فى صفحة جديدة و دنيـا جديدة و ناس جديدة ؟؟ فرصة تعاود حياتك و تتحكّم بكل ذرّة فيهـا ؟ إسمك .. تختارو إنتى و كان لزم تاريخ ميلادك زادة ، العـالم الإفتــراضى .. السكاي روك ، البلوقر ، الإنيرجى ، الفايس بوك ، التويتر .. تختار كل شيئ من جديد ، تعاود ماللّول و قد ما تحب .. تقلق ، فسّخ و عاود ماللّول ، أي حاجة مالماضى بلوكيها و ديما يمشى .. النّاس محلاها .. مثقفة {ثقافة الأنترنات} ، متربية [ما تدخلش البوكس بركة] ، حنينة ، مظلومة ، ثوريّة ، مزيانة ... ملايكــة دين والديهم! و نسيتو .. إلّى فى العـالم الإفتــراضى " الوجــــه " إلّى نحبّو نورّيوه للنـاس موش حقيقتنـا !إلّى تلقاها تحكى بالعشرة وافى فالدّنية حشّامة ، خوّافة ، راسها ماتهزّوش مالقاعة ! إلّى جايبها ريّاق و يفهملها و يطيح فالبنات على بعضو ، و هوّ متصوّر معى بنات خلاتو و عمومتو الكل !إلّى رومنسى و هوّ فى الدّنيا فصالة .. إلّى ثورى و هوّ عايش عالـ " نقل/لصق " .. إلّى و إلّى و إلّى .. أما ما نلوم على حد ، عادى باش أي حد يحاول يحس إلّى هوّ مزيان ، كبير فى عنين النّاس ، يتوحشوه و يخزرولو أوّل مرّة فى حياتو كيما يحب النّاس تخزرلو .. و لتوّه عادى .. أما إلّى قهرنى مجموعة من المرضى.. إلّى ينتحلو شخصيّة و يصدقوها ... و المصيبة إلّى فمّا برشة مضروبين فى شخصى المريض و المعقد نفسانيا و المتناقض إلى الّا نهائى .. و رغم هذا .. فمّا شكون ... أدمنو سرقت كلامى .. تصاورى .. يلبسو شخصيتى .. يحكيو بكلامى و ذكرياتى و ينسبوها ليهم .. تخيّل واحد يحكى على بوك و أمك و خوك .. العايلة و حب حياتك ... طفولتك .. بتربيتك، بقرايتك، بمستواك، بثقافتك، بفنّـك، بغرامك... و يقول إلّى هوّ إنتى .. يسرقلك كتيبتك .. باش ناس تتضرب فيه أكثر .. كتيبتك إلّى قلت فيها المخبّى .. إلّى ورّيت فيها وجهك الحقّانى .. أدمين " الحاج وسكى " ، أدمين " تخلويض " .. ببنات بأولاد ... الكل تسرق .. علاش ؟؟ خاطر " جام " ؟؟ خاطر " جام " تخلّى روحك سارق ؟ ضعيف شخصيّة ؟ تنسب معانات الرّوحك ؟ ناس ما تعرفهاش ؟ خاطر " جام " تسرق ذكريات غيرك و تصدّق ؟ خاطر " جام " ...؟ ضعف شخصيّة هذا الكل و إلّا شنية ؟؟ مدمن إعجاب ؟؟ تهنّى الإعجاب موش ليك .. للكلام إلّى إنتى سارقو !إنتى دار نشر ، لا أكثر لا أقل !الورقة تسوى 5 فرنك ، الكلام إلّى يتكتب فوقها يخلّيها بقيمة .. إنتى و إلّى يقرى .. هوّ إلّى يحدّد قيمت الكلام المكتوب .. أما ولو كانت قيمت الكلام المكتوب بـ الدّنيا و مافيها .. تبقى قيمتك فى قيمت الورقة .. 5 فرنك كان موش أقل ، خاطرك سارق .. لاهو كلامك .. لا فكرك .. لا ممكن فاهم معناه .


إلّى نكتب فيه رسائل .. منها للـ الإعتذار و منها إعترافات .. و فيهـا البعض من سيرتى الذّاتيّة .. خمّم قبل ما تسرق المرّة الجايـة .. موش الحل فى " روبــابيـكيــا قلـم غيرك " .. جرّب إكتب إنتى و تشجّع !كون راجل ! كون إنسـان و إكتب علّى فى القلـب .. فى مخّــك .. ويزّى ! يزّى من إنتحــال الشخصيـّــة !

الحبّيتـو الكل ... أنّى نحكى الـ "حْكَايَاتْ مَا نَجْمُوا نَحْكِيوهَا لْحَـدّْ " باش نفيدكم بحكم تجربة شخصية و إن كانت نيجتها الفشل .. قدّرتكم و ماطلبت منكم شيئ غير أنكم تقراو .. باش ماطيحوش كيما طحت آنـا .. قدّاش من واحد فيكم كى قرى حس إلّى نحكى عليه ..؟ قدّاش من طفلة بكات و ضحكت كى قرات .. بيناتنا .. و بـ " 27 " حرف تصنع بناتنا رابط .. رابط مقدّس .. ما تدنسوس الرّابط المزيان هذا بحيوانية الطبيعة الإنسانيـة .. خاطر لحقيقة نحبكم ..
طحيح تستغربو كيفاش نقول نـحبــكـم .. إي نحبكـم .. خاطر معـاكم صوتى مسموع.. خاطر معاكم توفى أقنعة الرجـل الشرقى و نحكى على الطفـل الصغيـر إلى حـب.. و تعذّب .. خاطر جام معناها "رانى قريت .. رانى سمعـت .. " خاطر أوّل مـرّة تحـس إلّى إنتـى فى وسط ناسك .. و موش أي ناس .. أقــرب الناس ليـك.. إلّى تسمع و تشجعك أكثر منغير لا تخاف من حساب لا خزرة على جنب .. هذاكة عـلاش "نحبكــم " .