سنة أولى نسيان : {الإرهــاب النّفســى } [5]

فـــراغ ... وقت فارغ بزايد ، برطابل كى بيه كى بلاش ، يضيع بالنهارين و حالة عاديّة ، أصلا توّه ما نستحقّو كان فيّاقة ، كيما الفيّاقة بو 1 دينار متاع بو منديل . شعرى و لحيتى نسيت وقتاش إخّر مرّة نقصت فيهم ، حوايج دار و شلاكة .. هومة اللّباس الرسمى لحالة التّشرد إلى عايشها ، كى اليوم كى كى البارح كى غدوة ، مفمّاش لشكون باش نلبس و نريّق ، نحصر اللّحية و إلّا نلبس الجديد ، مفمّاش علاش نحط الحطّة و نسيرج الصبّاط .. منغير ما تقولولى إلبس الرّوحك ! خاطرنى فى كلسون مرتاح .. !


فالعادة كى نجى باش نقابلها ، نحضّر اللّبسة مالناهر إلّى قبلو .. خاطر كان فمّة حاجة متأكّد منها هيّ : باش صاحبتك تكمّل معاك يلزم تعجب صاحباتها و البنات إلّى دايرين بيها ، إلّى يقراو معاها، يخدمو معاها، فى ستاج معاها، صاحبات القهوة ... يلزمهم يراوك بوڨوس و ڨالون و بكل الأوصاف ! خاطر كان معجبتهمش و بدى التوسويس متاع ' أخطاك منّو ' أنسى باش تكمّل معاها ! لأنّو و للأسف ، حتّى كان تحبك ... الطفلة ' وذاينيه ' تعطى وذنها برشة و تاخو يـــــاسر برأي الشّلّـة لعزيزة ، وزيد فمّا سبب آخر يخلّينى نختار اللّبسة إلّى باش نقابلها بيها مالناهر إلّى قبلو .. لأنّو و بكل تفوريخ نلبسو ألوان كيف كيف .. فى نفس السّتيل .. و هيّ لوغة يعرفوها الكوبلوات ، ميساجها باين للناس .. إلّى أحنا عبد واحد .. إنســـان واحد ، إنتى طرف منّى و أنـا طرف منّك ، أحنــا واحد ، بدنيتنا وحدنا ، منغير ما تحاولو تفهموها وإلّا تقربولها !!




قهوة اليوم لعشيّة ، كى هالمدّة ملّى مشيت إنتى .. وحدى ، بعد ما كنت نعدّى سوايع معاك يدّى فى يدّك تقول مروحين مالروضة ، ساعة وحدة فى قهوة ولّات صعيبة .. سيڨارو ورى سيڨارو و سعات نشعّل و إلّى قبلو مزّال ماطفاش .. ما نلقى فين نخزر .. منحبّش نوحل معى النّاس وإلّا نبان نسنس عليهم .. تبربيش التاليفون منفع شيئ .. الحيط إلّى مقابلنى حفضت النقب إلّى فيه .. سي بــون ، خلّى نهز روحى و نمشى لقهوة أخرى يبداش الجّو ماخير // و هكّاكة .. من قهوة لقهوة .. تقول عليّا نفركس عليك .. فى وجوه إلّى يتعدّاو و إلّى قاعدين .. و حتّى كان لقيتك ؟ شنيّ باش يتبدّل ؟ أكيد باش تصير نبزات أكثر .. أوّلهم ؛ نسلّم عليك بالبوس و إلّا منغير .. ؟هذا كان محسبتش روحى أعمى و ما ريتكش ، وإلّا هزّيت روحك و قمت خرجت و هربت ، الحاصل .. بارشة تبلبيز !!



وينك .. شعاملة فيك الدّنيا .. شني أحوالك .. زعمة لاباس ؟ كان موش لاباس نجم نعاونك ..؟ زعمة تبدلت ؟ سمنت وإلّا ظعفت ؟ شعـرك .. مزال نفس الطول ..؟ .. وريحتك .. مزّالت هيّ .. ؟
9OO مليون سؤال .. كلّو من تسكرة متاع تران لقيتها فى مكتوب الكبوت من ديسمبر إلّى فات ، غريبة .. قدّاش من طفلة عرفت بعدك ، قدّاش جرّبت و درت .. قدّاش من طفلة ظلمتهـا ..بكّيتها و تبنّنت وجاعتها خاطر ريت فيها من كلامك إنتى .. طبيعتك إنتى .. و خيالك إنتى .. زعمة شماته فى روحى وإلّا فيك ؟ وإلّا حبيتك بهبال .. مشيت إنتى وبقى الهبال .. ؟ يضحكونى صحابى كى يقولولى " عاملتلك البوخوخو " .. لحقيقة .. أكثر مالـ البوخوخو عملت..
عيّشتنى حلمة ، خلّيتنى نصدق .. إلّى إنتى نصّى إلى نستنى فيه .. عيشتنى فالأوهام .. ووقتها عادى باش نصدّق .. شكون إلّى ما يحبش يسمع كلام حلـو .. يحس الدنيا ظحكتلو و عطاتو الإنسان إلّى يفهمو .. إلّى موش باش يجبد بيه فى أي حالة يوصللها .. سوى مرض ، وإلّا طاح مالعمر وإلّا فقر .. الإنسان إلّى يحبك خاطر إنتى إنتى .. يحسّك إلى من حقك تعيش و فمّا شكون يتوحشك و يخاف عليك .. قدّاش من واحد / وحدة سمع كلمت "مانيش كيفهـم " .. قدّاش منكم صبح يعانى من هالكلمـة .. قدّاش منكم غلط و صدّق ؟ قدّاش منكم عطى أكثر من فرصة للّى ما يستاهلوش .. حتّى كى ترى حاجة و إلّا تفيق بحاجة ديمة الغلطة منّك .. بعد هذا الكل كفاش مزّلت باش تنجم تتعرّف من جديد .. كيفاش مزلت تنجم تعطى ثيقة فى روحك و إلّا النّاس .. حتّى كان جاء شكون حبّك .. يلقى فى بلاسط القلب حجرة كحلـة .. روح مدڨدڨة كى مراية طاحة من السماء السّابعة .. أصلا شكون باش يرضى بيك هكّة .. كالعادة وحدة تقلّك "مانيش كيفهم ؟"
.. المشكل حتّى كان جات إلّى موش كيفهم بالحق .. شنيّ مزلت تنجم تعطى أكثر ملّى عطيت .. باش تنجم تصبر عليك و تعاونك "لوجه الله" تاقف من جديد ؟ باش تصبر عليك .. باش تصبر على مصاتك و بلادتك و تشكيكك و خوفك ؟



عرضتنى قدّاش من طفلة .. فى وقت إستعمارك إنتــى ، كان محرّم عليّا نراهم ، نسلّم عليهم ، نقهوج معاهم ... و كانت فرحتك كى نبلوكيهم..نفسّخ نوامرهم .. و نحقـر سلامهـم .. توّه القمع مشى .. ومزّلت نتجنب فيهم .. سئلونى عليك .. بدلت الموضوع أكثر من مرّة ، أما باينه إلّى كل حد على روحو ... بعد ما قطّعت و ريّشث فى قدّاش من وحدة و أنــا عاطيك وذنى .. بعد ما قتلى إلّى ماكش كيفهم ، بعد ما بنيت بينى و بين الدّنيا حيوط و خلّيت كان إنتى .. مشيت .. صحيح ، ماكش كيفهم ، إنتــى أسقط منهم ! وسقوطيتك تزيد تبان كى تعاود حكايات حكيتهملك بمعزّة و تعرفهم كان إنتى ! نلقاهم اليوم على كل لســان !! ياخى تشرى فى صحبة جديدة بحكاياتى ؟؟؟ يا طفلــة شبيــك ؟؟ حسبتك ميته و قتلتك فى خيالى ! الموتى ما يتكلموش ! سكّر فمّك و يزّى ميجيش !! حتّى كان باش نرجعلك الفازة و نتكلّم و نرجّع ، الكلام فى الطفلة " عيب " و " ميجيش " !




اليوم تعلمت نخرج نعمل قهاوى وحدى .. و عرفت إلّى باش نعمل قهوة معى طفلة موش بالضرورى تكون صحبتى ،اليوم نخلّيلك قهوة العادة بناسها ! اليوم ثانى خطوة القدّام ، حتّى أنــا ، تعلمت معاش نسئل عليك ، معاش نخاف عليك و نهلوس و ما نرتاح كان ما نطلب نطّمن ، اليوم ، تعلّمت ننساك فى غيابك و مكذبش إلّى قال : " بعيـــد عالعيــن ، بعيـــد عالقـلــب "{يتبـع}