الـحـب هـــو ؟

الـحـب هـــو تصويرة تصنعهـا فى خيالك... ،
يجـى نهـار و تراها فالحقيقـة ..
تتصـدم ، تتفجـع ، تخـاف لا تخسـر الإنسـان إلّى تحبّــو ... و تخـاف تزيـد تقربلـو ، الـحـب خـوف و فجعـة خايبـة ...

الـحـب زادة يخلّينـا عباد اُخـرين ..

يخلّيـك تظحك على روحـك و تقـول "شبينى عملت هكّـة " "شبينى تصـرّفت هكّـة" .. الـحـب يخـرّج الطّفـلة/ الطفـل الصغيـر إلّى فيـك..

الـحـب تمفـريخ كبـار .. الـحـب تاطيـح قـدر .. خاطر تتعلّـم تعـدّى و تسـامح مهمـا يكـون .. الـحـب شهـوة ، "مـونك " كبيـر ما يوفـاش لا بتحميلـة لا ببـوسة ، يخلّيك ٱكثـر من مدمـن لـ ريحـة وديمـة تحـب تزيـد .. الـحـب حـرب ... الـحـب ضيـاع خـاطر معـاش تعـرف آش تعمـل لا آش تقـول ، الـحـب عشـرة .. معـى إنسـان ممكـن لا عمـرك ريتـو أمـا تحـس إلّى كل طـرف فيه مهمـا كان صغيـر تعـرفـو و تعشقـو ..

الـحـب دفـئ عايلـة عمـرك ما تربّيـت فيهـا ، الأمـان وإنتـى صغيـر معـى بـوك و تنهيـدة أمّـك كى تطلعلـك السّخـانـة و هـيّ بايتـه جنبـك مفجـوعـة عليـك ...

الـحـب هـــو نـار الغيـرة ، العرك إلّى ما يوفـاش ، الـحـب هـــو الخنقـة و الإمتـلاك ... الـحـب هـــو الكـلام الحـلو و الصّـوت الحنيـن و سعـات بعـد نـص اللّـيل "حبّـى ، شـلابسـه تـوّه " ... الـحـب هـــو تـرهويجـة وشيخـة بنـادر الحضـرة .. الـحـب تخميــرة و أحـلـى سنفـونيـة و أروع لـوحـة طبيعيـة كان ماكـش مصدّق أخـزر لركشـت زوز يحبّـو بعظهـم ..

الـحـب كـى تتـوحـش صـوت ،العنيـن و الخـزرة و الكحـلهم ، لمـست يـد ، قــرب بـدن ..

الـحـب "أستيـكة " كان زوز شادينهـا ، إذا واحـد سيّـب لاخـر يتشـوا.. !
الـحـب لحـن قـديـم .. كـى غنـاية وحلـت فى راسـك و صعـب عليـك باش تتفكـر إسمـها !
الـحـب توسـويس ... الـحـب مـرض .. الـحـب هـبـال ..

الـحـب هـــو كـلام السـّكات ..

الـحـب وجاعـة .. ماتوفـاش .. الحـب بنّـة .. مطعمـها يهـز للدنيـا لخرة ..
الـحـب شجـاعـة .. و سعـات برشـة تهنتيـل ... الـحـب قبـاحـة بـ فــن ...
الـحـب عبـادة ... تختـار فيهـا رب جـديـد... الـحـب حـرام .. خاطر نحلّـو فيـه العيـب .. الـحـب ديــن ..
الحــب حلـمـة .. مـوش إلّى فيـها بكف نفيقـو ..



بصـراحـة .. الـحـب ما يتكتبـش ... ما يتـوصفـش .. ما يتغنّــاش .. ما يتصـوّرش .. ما يتحكـاش...
الـحــب يتــعــاش