سنة أولى نسيان : { جنـون على حافة العقـل } [2]

هستيـريا / يمكن هيّ الكلمة الوحيدة إلّى توصف الفراغ الهائل بعد ما مشى كل حد على روحو ... هستيريا "النوستاجيا" و "السوفونير" فى كل بلاصة ، لبسة ، ميساج قديم ، كادو ، ضحكة على نكت قديمة تعرفوها و ضحكتو عليها ، الحمّاص إلى تشريو من عندو بجنب قهوة العادة .. بالأخص قهوة العادة إلّى تحبّو تبدلوها أما ما عندكمش ركشة ماخير بخلافها .. السّرفور إلّى فيها حفضكم و حفض قهاويكم كيفاش القهوة تحبّوها ... و خلّى عاد من غير ما نحكيو قدّاش من بوسة تسرقت بيناتكم فى غفلة على عينين النّاس ...


ليوم .. قهوة وحدة فوق الطّاولة .. زوز كراسي ولّاو يبانو برش .. موش لازم كرسي ثالث تحط عليه ساكك إلّى تقول عليه ڨارد روب ! ... تصدّق .. لتوّه لانى عارف شبيه رزين هكّاكة .. نحشم باش نسئل .. كمّل نحسّك مخبيه حجر للمضاهرة الجاية .. أهوك نكرم لحتي بيدي و نسكت لا تسخطنى بيه فى وجهي ...


بعد ما أي كوبل يقصوّها تضهر التّربيا على قاعدة .. ما تستغربش تسمع حقد مخبّى من 1994 ... و رد بالك تتفاجئ مالمنطق العادم و ميساجات 6 صفحات إلّى تتكتشف بعد ما تقراهم بطولتك فى فلم " الجميلة و الوحــش " ، عادى برشة زادة تكتشف مدى قرب "أصدقائك" للآكست لعزيزة .. و الأكثر من عادى .. أنّو تلقى عمايلك الكل سوى بحسن نيّة أو غيرو .. على علم مسبق بيهم بفضل "أصدقائك الأعزّاء"


أغرب لحضات ممكن تصير عليك .. كى تستنّى ميساج عارفو موش باش يوصل .. تتفقد البرطابل 800 مليون مرّة فالنهار .. تكذب على روحك كان تقول نشوف فالوقت .. خاطر لا مرّة فيهم ريتو الوقت ، كملّ بصاراحة ، آش مدخلك للميساجات كى تشوف فالوقت ؟؟ .. و إلّا فالعادة يجيوك ميساجات من غير ما ينوقز ؟؟ كمّل قمّت الإعتناء بالشارج و الريزو .. و مزلنا نقولو وقت ؟؟ أناهو وقت ؟؟؟


لكن .. أخطر سؤال تنجم تطرحه على نفسك .. " زعمة فاش تعمل توّه ؟"بصراحة .. إرتاح ! آش عندها تعمل ؟؟ كمّل آش يهمّك تعمل و إلّا ما تعملش ؟؟ بآناهو حق باش تدّخل فى حياتها !! ماهو كل حد على روحو .. عيش حياتك .. { كان نجمت.. }يزّي مالتفركيس و التقصيا و الأسئلة على حوالها .. يزّى ما ربط روحك بها راكم موش "حوّاء و آدم" كى فمّا إنتى فمّا غيرك ، كيما فمّا هيّ فمّا غيرها ! هيّ فهمت .. و إنتى وقتاش ؟؟ لعمر يجرى و يتعدّى فى رمشت عين ، البارح كنت ما تعرفهاش و ماتعرف عليها شيئ ، تعرف قدّاش من طابع سكّر تحب فالقهوة ، تعرف اللّون إلى تحبّو ، تعرفها بنت جمعيّة ، تعرف ستيلها فالموزيكا و تعرف قدّاش تلبس فى ساقيها ، تعرف حبها لبوها و خوفها و صاحباتها و وين قرات و ريت حتّى تصاورها و هيّ صغيرة .. تعرف الماكلة إلّى تحبها و تعرف وين تلقاها كى تتخبّى ، تعرف تسكّتها بتحميلة كى تبكى و تعشق شعرها .. و ياخى ؟؟ تعرف ، تعرف ، تعرف و تعرف .. أما موش مكفّاها باش تكون ليك .. تعرف صوتها كى تبدى متقلقا .. أطلبها تاو تسمع الصوت هذاكة بيدو .. شعرها الطويل إلّى تحبّو قصّتو ، حياتها تعاود فيها من جديد .. و إنت ؟؟ مزلت تبّع فالغرزة ؟؟ مزلت تتخيلها توحشتّك و ماتنجمش تعيش بلا بيك ؟؟ خاتر تعرف ؟؟ و برّا عرفت ؟؟ حتّى كان عرفت دخّانها و بوست خال المخبية و كل خطوة فى حياتها ؟؟ معرفتك خلّيها عندك ... من غير ما تحل التلفزة و تتفرج فى برامجها إلّى تحبهم ، شكون قلّك مزالت تتفرج فيهم ؟ من غير ما تثبت فى فترينة كى ترى حاجة تعجبها ، من غير لا تزيد تغرّق روحك ...# فـيـــــــق.. !



اليوم أحـد .. غدوة الإثنين .. و دينيا تمشى ما تقفش .. الوقت يتعدّى ، بنسبة ليك يمكن نهاية الكون ! بنّسبة لبطّال تونسى نهار عادى و مشكل دخان ، بنسبة لعامل خدّام نهار خدمة و تعب ، بنسبة للّى يقراو نهار أقرب لرجوع القراية ، بلغة ٱخرى ؛ بنسبة للعالم نهار آخر عادى ! إنتى كهو إلّى تعانى .. # فيــــــق ! و غــــز نفســـك تصيـــبها !! {يتبـع}