العشرة عندها ناسهـا

الأصعـب من خزرت النّـاس ليك ، هيّ خزرتـك لـروحـك .. وقتـت تحـس بالعـجز .. وقت تحـس روحـك فى بلاسطـك ، بيـن البـارح و اليـوم و غـدوة ، شيـئ ما تبـدّل .. و عارف و مقتنـع إلّى شيئ ماهـو باش يتبدّل .. كان فحجـة فى العمـر القدّام ، بلغـة أخـرى .. أنّـك تحس روحك فاشــل .. و للأسـف .. الفــشل أصبـح طريقـة عيـش و فلسفـة .. قـدّاش من صـدمة ورى خذلان و زيد إحباط على يأس .. كمل قصص الرومانسيـة الفاشلة و الأجواء العائلية "البهيجـة عاللّخـر!" ذات الطّابع التـونسـى .. .. تخلّيك تستسلـم لدوّامـة الشّـك .. في روحـك .. فى النّـاس .. و تصـّدق إلّى إنتـى عايش فى وقت موش وقتـك .. و تحكـم علـى روحك كى تجى تقيّم فى نفسـك ..أنّك إنسـان فاشـل ، للأسـف .. بـرشة يدخلـو فى مرحلت اليأس بتفنّنهـم بتدميـرهم الذّاتـى ... لأنّـو هالـ "فشـــل" يكون فى أغلـب الحالات إختيار .

إي .. قدّاش من واحـد وإلّا وحـدة تختـار الفشــل معـلاق تجـاوب بيـه على أي سؤال .. أي رغبـة فالحيـاة .. و تدفـن بيـه أي طمـوح .. لكن الحقيقـة أن تلعب دور الفـاشل هي رسـالة "نجـدة" لمـن حولـك .. لأنّـو أن تكـون إنسـان فاشـل .. هو أن تختـار دور المتفـرّج .. تجبد روحك مالدنيـا و تستنـى اليـد إلى باش تتمدلك .. تعرف شكـون يحبـك بالحـق و يخـاف عليك .. يتقبلك بالفشـل متاعك و يورّيـك إلّى "مـزّال الخيـر فالدنيـا" .. ياقـف معـاك .. و يحـاول بلّـى ينجـم يعـاود يوقفـك على ساقيـك ، هذا هـوّ الإنسـان إلّى يحبـك بالحـق .. إلى يرضـى بيـك حطـام إنسـان .. يأمـن بيك فالوقت إلى "إنتـى" معـاش تؤمن بروحـك .. يكـون موجـود على خاطـرك .. و ليـك .. يسمعـك و يحـب يزيد يسمعـك .. يبجلـك علـى روحـو و يحـاول يفهمـك ... يحسّـك إلى ماكـش وحدك .. إلى فمـّا شكون يخمم فيـك و يتوحشـك .. بكلمـة أخرى "يعطيـك سبب تعيش على خاطـرو" .. و بصراحـة .. شني سبب أقوى من أن "يحبــك" إنسـان فالوقت إلى ترى وجودك غلطـة شنيعـة .. ترى روحك "مجمـوعة كوارث متنقلـة" .. إنسـان فارغ ... .. إنسـان هكّـة ممكـن تقـول مستحيـل وجـودو ... أما آنــا .. لقيتـها 
ملّـخر الدورة هذى الكل .. باش نحكـى كلمـة وحدة ... المشـاكل كى تجـى .. تجـى ديمة معـى بعضهـا .. متخلّيكـش ترى شيئ باهى مالدنيـا .. إلّـى يحبّـوك موجوديـن .. كان ماكش مصدّق شوف قدّاش من واحد ياخو بخاطرك و يعدّيلك .. فى وسطهم تلقى واحد إلى ديمة تحكيلـو .. كى تتخنق طول تتفكرو هوّ .. بلا بيـه ماتلقـى شكون يسمعـك .. تتدلّـل عليه .. و كى تحكيلـو "مشـاكل الدنيا و ما فيهـا تذوب فالكـلام" .. إلّى يحبّـك بالحـق موش إلّـى تلقـاه يستنّـا فيك باش يقلك مبروك كى توصـل .. إلى يحبـك بالحـق هوّ إلّى كى طّيـح تلقـاه معـاك .. بلا شروط .. بلاش أفلام .. و معـاك .. خاطرك إنتـى .. هذا إلّـى يحبّـك ! .. و فى حكايتـى .. هاذى إلّى تحبنــى .. .
فرصـة نطلـب منهـا السماح "خاطرنى مانيش ملايكـة" .. على قدّاش من ليلـة سهرتهـا معايا نحكـى علـى مشاكلـى و ننسى باش حتّى نسإلهـا على أحوالهـا .. خاطر نرفـوسى .. قدّاش من عركـة كى نتفكّـر سببهـا نضحـك .. خاطر معـايا و عمرك لا ستنّيت منّـى حاجة تصلـح .. خاطر آمنـت بيّـا وقـت إلّى فاقد الثقة فى روحى .. خاطـر محـلاك .. خاطر زينـك و ضحكتـك تخلّـى كل نهـار أحلـى ملّـى قبلـو .. خاطر قلبـك كبيـر و تسامح .. حتّـى كى نتعاركـو من غدوة تحكى عادى تقول ماصار شيئ .. خاطر وقتك .. تعبـك .. و كل لحضة و أكثـر .. سعات نبهـت .. قطّـوسة كيفـك شمزّالـت تعمـل معـايا .. كارثـة كيفـى .. بعدها نتذكّـر .. إلّى العشرة عندها ناسهـا ..