منــامــة عتـــارس

نـــوفمــبر، قــداش ستنيتـك وخفـت منـّك، خفـت من بردك لا نعـديـه وحـدى .. خفت مالشـتاء خفـت من لحضـات المـطر.. فرجـت خيـوط المـاء علـى بلار الشبّـاك وحـدى .. من ريحـت الشتـاء والكشكـول إلى لتـوه مزال عنـدى.. من حوايـج الصوف إلى ماتدفيـش قـد توشويشـة بنينـة.. كلهـا أفكار منحـرفة وشريرة.. كلهـا حـب.. وآكـة التعنيقـة.. نوفمبـر سنة ماجاب معاه كان الڨـريب ، وحـدى.. كلّـى قبلـو وإلى قبـل قبلـو وإلى قبلهـم زادة، داخـل عالـ 7 سنيـن .. ريـت ليّـام آش تجـرى .. ريت .. قـدّاش طلعـت كذّابـة ياعمـرى .. .


نخـزر لروحـى اليـوم ، نهـار سبـت عشيـة .. حدّى لافايات، فعـوض نرندف .. نتعـرّف.. نعطـى فرصـة لروحـى ولغيـرى فى حكـاية جديدة ، حال هالباج نكتـب فى حكايات قـديمـة.. أبطالهـا ونساوها .. توه هذا إنسان عادى يحكـى معاكـم؟

من وسط حكـاياتـى القديـمة .. نتفـكر صـديقـة ولحسـن الحـظ ماخرجتـش معـاها، لحسـن الحـظ خاطر لتـوه و لليـوم وغـدوة مزلنـا صحاب، ليـوم هيّ إلى كركـرتنـى مالدار .. بسيـف ! بعنـف ! بغـصب ! .. بمحـبــة <3 !

"الصـديقـة " هـذى حكـايتهـا أبـن حكـايـة .. أمـا موش لليـوم نحكيـها،
إلـى نجـم نحكيهولكـم تـوه .. إلّـى هيّ دكـتاتوريـّة متنقلـة ، أكسـح راس عرفتـو فالتاريـخ ، أحـن قلـب .. وأروع أنـثــى .. إلّا أنـو راسهـا الكاسـح وجرأتها إلى موش عاديـة يخليوهـا ماتقبـل كـلام حـد ولا ترضـى بحـد ينصحها ، لذى .. بطرق تحيـّل .. وصلـت معـاها أنـى الوحيـد إلى تسمـع كلامـو ، نفسـرلكـم كيفـاش ؟

وقـت كانـت صغيـرة أمهـا ماتت ، ربـاها بـوها أنثـى مكتملـت الجمـال و القلـب ڨلـب راجـل صحيـح! وهنـا تفهمـو كسوحيـت الراس إلى تحكى عليهـا ! أول ماعرفتهـا تقـول نفارع فى "تنّيــن" ! حتـى نهـار .. لقيـت حل ،
وقـت كنـت صغيـر ، ممّاتـى حليــمـة {ربـى يرحمهـا} كانـت تحكيلـى ياسـر حكـايات، خـرافـة ورى خـرافـة .. وفى وسط كل خـرافـة ثم عبـرة، تفهـم بيهـا الدنيـا والنـاس، قبـل "الصـديقـة" إلى نحكـى عليهـا توه كنت نحكـى شوية من هالحكـايات للبنـات .. بين كلام ليـل باش ترقـد عندى .. تنسـى.. ترتاح .. وبصراحـة .. ماهيش حاجـة فرحان بيهـا أما محـاولـة باش مانكونش وحـدى .. خاطرنى فى لخـر .. ونهاية الحديـث "إنســان"
معـى "الصــديقــة" هـذى .. نختـار خرافـة تشبـه للحـالـة إلى تعيش فيهـا باش ننصحهـا من غيـر تسلّط ، من غيـر مانقلهـا أعمـل و أعمل .. نخليهـا تقرر وتعمـل إلى ننصحها بيه فى وسـط الحكـاية ، الخرافـة ، بطبيعـة شوية تبديل أماكن وأسماء مشـابهـة للشخصيـات الواقعيـة ميساجـى يولّى واضـح .. اليـوم ، باعـد ما تهنـات عليـّا لبسـت ووعـدتها ألـف مرّة إلى مانيش باش نرجع نرقـد .. قتلـى كلمـة قبـل ماتمشـى .. قتلـى "مـصاب جات عنـدى حكايـة نحكيهـالك باش تخرج ملى إنتـى فيــه .. "
ضحكـت .. وتخيلـت الدنيـا زعمـة كيفاش تكـون كان جات عندى صبيـة تحكيلـى .. "شهــريار" .. إحسـاس خاص من نوعـه !
لحقيـقـة ماتمنيتـش طفلـة تحكيلـى وإلّا مرى تخرّفلى ، ماتمنيتـش وحـدة كاملـة الأوصاف أو فنـانـة .. كان عالشعـر لكحـل الطويل وبـوسات الخال إلى ديمـة نحكـى عليهم ، حاجـة تثيـر شهوة بسيطـة وفى وقـت تعـدى ومن إنسـانة وحـدة وماناش معـى بعضنـا، لا نحـب وحـدة لابسـة طبليـة بيضة لا كورسات ! من غير برشة كلام وتفاصيل زايدة .. تمنيت وحـدة تبقـى معـايا بلـى تصعـب الدنيـا، ليّـا آنــا وحـدى والمصيـبة حتـى وحـدة ملـى عرفتهـم الكل فهمـت كلمـت "وحــدى" ولا فهمتنـى ، أخيبهـم إلـى إستغلتنـى فيلـم .. أو حبـت تثبـت لروحهـا أنهـا مزيانيـة بما يكفـى .. فمّا إلى جابهـا الطمـع وفى إلى هزها الطمـع .. أنواع وأشكـال هالحكـايات إلى شطر لفـة ولحقيقـة مايستحقـوش نحكيهـم، المهـم .. مافيباليـش إلى تمنيتـو حاجـة مستحيلـة .. معـى الوقـت عرفـت إلى ساهـل باش نصـوحب أزيـن وردة بيـن البنـات و أكثرهـم إبداع أو فنـانـة معروفـة أو حقـوقيـة أو من كانـت تكون ، أما كيمـة حكـايـة الخوافـة .. النـاس معـاش عنـدها ثيقـة فى رواحهـا .. تسيبنـى خاطـر شكـت إلى آنـا باش نسيبهـا أو تحـس روحهـا شوية عليـّا ! يا هــم ! شكون عبالـك عقلكم بســم هالحكايات !! ... أه ه ه ه .. يا عمــرى .. تستغـربـو كيفـاش وحـدى ؟
خاطـر نكـره القسمـة ومانرضاهاش .. آنـا زادة مانجــم نكــون كان لوحــدة ، هانـى نستنـى ، عالأقـل كى تجــى تلقــى الآجــوندا فارغــة .. باش تعرف قداش ستنيتـها .. تمنيتهــا ، كان مجـاتــش .. ، زغرطــولـى فى دفيــنتــى .. شكون قال !؟ تتطلعــش المــوت أنثــى ؛)

{منــامــة عــتارس : هيّ وحــدة من حكايـات حليمــة .. من غير مانطول عليكم ، تحكـى على الغلـطة الكبيــرة كى نحلمــو برشـة ونحسبــو حسابات كبيرة علينا و كى ننساو الواقــع .. كيف نرجعـو للحقيقــة ومانلقاو شيئ ملّى حسبنـاه .. }