"لــو كــان مــوش الصّـــبر.. ."

حبّيـت نكتبلـك وإنتـى معايا، عندى معنقتنـى، تقـرى فى كل حرف تكتب ليك وحدك قبل ما يتسرق وإلّا يقراه غيرك، حبّيـت من دفئ يديك نكتب ومن دفئ بوستـك نحـط الفاصل، حبّيتـك عندى .. يا إنتـى .. وكان تعرف قدّاش توحّشتـك وحاجة عادية إلى نندب على سعدى هونى بطرف أسطرة كى ماكش هونى، حبيتك تسمعنى منّى ليك من غير مانستنـى الـ "Vu" وإلى سهرية سكايب ماعندها ماتزيد كان فالوحش ليـك ، ليك وحـدك نكتـب فى هالحروف وأول مرّة نكتب لوحـدة نخرج معـاها .. والزّهـر .. ماكش معايا، بيناتنـا حـدود وبحـور .. معاك وماكش حذايا.. ، تعـرف ؟ ...حبيبى، من كثر مانى متوحشك نحب نوجعك خاطر بعدك خايب.. نحبك عندى..

نفكك.. نخطفك حتى من روحك، نبكيك باش نسكتك عندى، نحبك.. ونحبك تفهم إلى إنتى متاعى ، نخليلك بلايص زرقة فى بدنك باش حتى كان إنتى نسيت تذكرك مرايتك إلى إنتى متاعى :* نفكك.. نخطفك حتى من روحك، حتى نبكيك باش نسكتك عندى، نحبك.. ونحبك تفهم ألى إنتى متاعى ، نخليلك بلايص زرقة فى بدنك باش حتى كان إنتى نسيت تذكرك مرايتك إلى إنتى متاعى  من كــثر ما توحشتـك نحـب نوجعـك ! نحـب نوجعـك نفكك نعصرك عندى نكتفك ونخليك ليّـا وحدى! نحـب نوجعـك قد ما وجعنـى بعـدك ونبكّيـك .. باش نسكتـك عنـدى .. نحـب نخلّيلـك بلايـص زرقـة تذكرك حتـى وإنتى موش جنبـى إلى إنتـى متاعى وليّـا وحـدى ! نحـب نبـوسك توّه ! نحـب نعضّـك نحملـك حتـى نقـص عليك النّفـس نحـب نبـوسك كلّك ! نحـب نضيـع فى رقبتك نحـب نتخـبى فى شعـرك نحـب نحطك فى حجرى ونفسرلـك .. قدّاش .. نحبـّك ! .. نحـب .. برشـة حجات .. أما الكلهـم معـاك وفيهـم إنتـى ! تى وينـك سمـاك ، ميساجك بطـى ! هستيريا هنـا ! الدنيـا باردة بلـى بيك ! تى وينـك .. ! .. سافا!؟ أه .. حقّـه .. نسيـت .. ماك قويّـة وما تحكيـش أما من صوتـك نعـرف ويقهـرنى تعبـك فى الغربـة بعيـد عليّـا ويقتلنـى فرحـك ! وكيفاش نجمـت تفرح وآنـا موش معاك!؟ خيانـة هذى !! الفرحـة بلى بيّـا خيــانـة !! إي دكتــاتوريــة  وآنـا كى لقيتـك مزلت نجّـم نسلّـم فيـك! ما تقليـش متخـافش لا نخـاف قالوها قبلـك برشـة وصحيـح إنتـى غيـرهم أمـا نخاف .. ! وكيفـاش .. نجّم منخافـش ..؟
زينـك .. وطبيعتك الحلوة ، مافيك شيئ يتكره ! كيفاش الزين الكل وماتحبش نخاف عليه !!! نخاف اليوم تبدى ضحكـة غدوة تستانس تضحـك بلى بيّا نخاف من كثر ما تخبّـى معاش تحكـى يا "مرأة حديـدية" وقلّـى ؛ آش مزلـت وقتهـا تزمّر بيّـا؟


كرهـت الفرتويال .. وحببتنـى فيه إنتـى مرّة أخرى ، سعـات .. نتــمـنّى .. كان ماخليتكـش تمشى ، كان جيت توّه عنـدى ، بحذايا ودفئ بدنـك مونّسنـى وصوت النفس متاعك .. ضحكتك .. بلادتك وهبالك.. حتّى عركك وسكاتك، كلّـك .. من مجمـل التفاصيل لأصغرها لأحـلاها لبوستـك لى توحشتـها ، فينـك .. زعمـة شنية أحوالك .. مانسئلكش باش ما تسئلنيش ! مانيش لاباس بلى بيك والحكاية واضحـة مايلزمهاش سؤال .. ، ما نحبّـش نسئـل .. خاطر نعرفك قويّـة وتخبّـى .. ما نجمـش نسئـل .. خاطر ماعنـدى ما نعـمل وآنــا هنا .. وإنتـى غادى .. ، تعــرف .. تــوحّـــشتك وتــوحّـــشـتك وتــوحّـــشتــك وسرقك الوقت منّى، نستنّى فيك باش تكنكتـى .. وقت عجيب غريب .. أما مايهمش ، مدام فيه إنتـى .. نصبــر شعنـدى نعـمل ، إي نصــبر ، ديجـى ستنيتك قبل ما تجـى وكى جيت .. هانى معاك وهاك معايا ... ، تتفكر..؟ قداش من مرة تعاركنى كى نجى باش نحكى على نهار هكة ؟
و أحلى ما فى عركك كى تهددنى ، قال شنية باش تخطفـنى .. وينك ! إيجا أخطف شكون شدّك يا عمرى !
.. براف .. كل وقـت ياخـو وقتتــو ، العيــشة "سكــايـب" "فايس بوك" "فايبر" كان لزم "بادو" ، هانى نستنـى باش تكنكتـى ..،



اليوم نستنّـى فيك مالصباح ، حبّيـت نهارى يبدى بيـك .. حبيـت عام جديـد يبـدى بيـك .. خاطر اليوم .. عيــد ملادى ..،
مزلـت كيما خليتنـى ، حياتـى روتيـن أجـوف فارغ بلـى معنـى بيـن الدار والخدمـة .. مزّلت ناخو بخاطرك وما نعملش حجات تكرهـم إنتـى حتـى لو ماكش جنبـى .. خاطر محبتـك موش كان وإنتـى جنبـى وإلّا كلام الليـل وإلاّ وقـت فارغ نعبيه بيك وإلّا فيلـم تافـه رخيص باش يقولو محلاهم ولا ترجيع فازة و نعوض بيك فى شكـون .. خاطـر نحبـك وكهـو ، مزلت مقـاطع الدخان وسواڨرو وحتـى القهاوى باش معاش نرجعلـو .. حتّى الوجوه القديمـة والجديدة .. رسميّـا .. "إعتزلـت النـّاس" فى غيابـك .. .


خاطـر عيــد ميــلادى هذى كلّـى قبلـو وإلى قبـل قبلـو وإلى قبلهـم زادة ومن غيـر تفاصيل دراميـة سنيـن نعـدّيه وحدى ، كيمـا كل عام ، مستانس نشرى لروحـى حاجـة نغلّفهـا ، نخبيـها ، ونهار عيد ميلادى نهديها لروحـى ، يمكـن يضهرلكم كلام مهبلـة أما هذاكة حال إلى ما عندو حـد ، السنـة .. قبلـك إنتـى شريـت بريكـيّة ملّى يعجبـونى آنـا وتكرهم إنتـى .. السنـة .. ماعنديـش كادو لعيـد ميلادى .. وزيـد ماكـش هونـى .. قلّى شنعمـل يا عمرى !؟ .. هاك لتوّه لا حبيـت تكنكتـى .. زعمـة وينـك ..شنية أحوالك .. توحشتـك ووحشـك مخيبـو ..، بيـن وحـش وغصـة ومحبـة وخنقـة ورعشـت غـش وبرشـة غيرة .. الأحاسيـس الكـل تخلبـزت ! وهانـى .. مزلـت نستنـّى .. .

{رولاسيـــون فشّخــها الديستــونس  }