Poêle à bois / cheminée

عمرو ما كان تاريخ يبدل فى إنسان حاجة مادية، فقط هيا مشاعر وقت تحسبها بلّى تعدى من عمرك ولى مزال فيه وكى تحوصل لى عندك بين يديك ولى حبيت توصلّو وما خلطتش وبين لى صبح رماد هزّو الريح، التاريخ بنوامرو كى سباردرا / فاصمة تحطها على نفس الجرح، وتركبها لروحك لى ما فماش ضربة لى بديت من جديد بلى جرح ولا ماضى ولى مزال عندك الوقت الكل باش تعمل لى تحب عليه الكل،

كلام مزيان.. كلام ياسر محلاه وقت تلقها فرصة تصفى القلوب ويوفى هزان الخشم بميساج بتاليفون صفحة جديدة بعام جديد وقررات من نوع نبطل الدخان نولى نعمل كذا ومانعملش كذا نبطل هالثنية ونخرج منها وناخو ثنية جديدة نتعلم نطير ونتعلم ننسى خايب لعباد نسامح باش نبرد ومعاش نتلفت و .. برشة قرارت ،

أنا .. مانحبش نبطل الدخان، ما شريتش لبسة جديدة للعام الجديد، ما عملت حتى ريزيرفاسيون، ماكلمت حد باش يتعدالى وماقريت حتى ميساج فيه تهنأة للعام الجديد،

ما حبيت شيئ .. وموش جوّى سواريات الفودكا والبرشة حس.. ،

توحشت لمّت دارنا، خويا وبابا وأمّى ولو باش توفى بتخرنين أما لمّة 

ولليل ..

حبيت على شمينيّة ، 

حبيت على شمينية وأنا وإنتى الفراشية نغلبو فالبرد بتعنيقة تحت الكوات، حيت نلبس كلاسطى الحمرة الطوف الطويلة للركبة وملابس داخلية، موش أكثر من مريول خلعة وبوكسر يزّى، باش نقعد فى تعنيقتك أكثر ما نجم، حبيت حتى كى تغلبنى حشيشة الدخان ما نقومش ونبخل نقوم والبرد يخليك تلصقنى أكثر.. حبيت على شمينية .. وموزيكة وإلّا فيلم.. مايهمش شنية خاطر نأكدلك ماناش باش نتفرجو فى شيئ، لقطين من وسط برشة قباحة كيمة نحب نسميها موش باش تخلينا نفهمو هالفيلم وإلّا نحسو الغناية ..، حبيت عام يبدى بيك وباكو بيتزا فارغ وقهوة من يديا ، سهرية بلاش شراب خاطرك شيختى وفرحتى وكل حاجة بنينة أما فى وقت تعدى، وتوّا .. معاتش متاعى معاتش ليا .. ، أما حبيت .. ، موش معناها كى حبيت نلوم عليك وموش نعارك وموش جاي نسخف نقول رانى وحدى إنتى تعرف إلّى كان نحب نساء الدنيا نلمهم عندى، أما موش أنا لى نفركس على ليلة ..، يمكن نكتبلك خاطرك إخر حد نكتبلو، شطر آكس صحيح أما حتى الشطر موش شوية، حبيت برشة، ويمكن خلاف هالمحبة فالحجات لى نحب وجودك فيهم ما عندى ليك شيئ .. يملئ عينيك ..،

حبيت على شمينية وإنتى والنهار يكون بارد شتاء مطر ورعد كان لزم الضوء يقص ، على ضوء النار على ضوء الشمع كى نقلك توحشتك فالضلام تفهم لى موش تتقال لبدنك، حبيت على شمينية وبوسة موش بسرقة موش قدام العنين ومافماش علاش نعاركك على لبسة ، حبيت على شمينية وأنا وإنتى وسويقرات وميسالش .. خليها سكات.. ، تعرفنى نكره الحس والجوجمة الدنيا المعبية والعنين .. نكره الحاجة لى فى كل يد .. ونكره هالكتيبة خاطرها ليك، خاطرك موش باش تقرى وكان قريت راهو مخّر وصعيب كان تفهم ، 

حبيت على شمينية أما حلمتى وحلمتك موش كيف كيف ،

ما عندى نقلك كان أنستك بثنيتك .. ممكن غادى فرحتك لى ما لقيتهاش معايا.. 

ممكن مع غيرى تلقى لى حاشتك بيه ، لى تفركس عليه ، لى تحب تراه وتوريه بلى سلاسل الـ "لا" متاعى وبلى شيئ منّى ، فى لخر مانيش باش نقلك لا راك كيفهم ولا أخيب منهم ، كلام العيب بالأخص فيك ما يتقالش ، ما نتمنالكش شيئ ، لا باهى لا خايب ، كيمة خليتنى ندفن حلمة نخبى ضحكة نوخر فرحة نزيد فى كرهى لروحى ونرخص كى نتباع ونتبدل مرة أخرى .. نحكيلك إخر حلمة
حبيتها معاك.. ،  حبيت على شمينيّة .. وأنا وإنتى .. ويزّى .

The ART of Letting Go

نرمالمون ما نكتبش ، عالأقل موش توا موش هكة، كأنّو نكتب خاطر راس عام وريق متاع باش نبدى صفحة جديدة بلى بيك و بلى غيرك ، ما حبيتش نكتب خاطر أمورى ما تعجبش ، وأنا كنت ناوى نكتبلك إخر خلامى ونقلك بسلامة من فوق مالعالى كيمة بسلامة لى قلتها إنتى، حبيت أومورى تمشى لاباس ونجم نبعد من غير ما نتلفت، وما نحبش فى بسلامة هذى نقلك توحشتك وتوحشت برشة حجات فيك ، و من غير كلام مرزى، ديجا خاطر مانحبش فيك سبيتك ستاتويات موش آرتيكل يقعد، هذا كان تسمى شوية ملى عملتو معايا كى عاودت كتبتو يتسمى سبان ، هذاكة إنتى ، هكة تخلقت وهكة آنا زادة ، أما على خاطرك حاولت وجربت نتبدل ، ومزلت على خاطرك نتعلم ونبرد، 

فالنورمالمون زادة نحّى البلوكاج ليك وغيرك وزعمة زعمة تعلمت نسامح ونبرد وننسى ووصلت لمرحلة باهية من السلام النفسى وأمرك لا يعنينى ، أما شيئ ، مزلت متغشش ومزلت نغلى بصريح العبارة ، ومزلت .. ما نجمش نسامح ،

الأكيد طبعا إنتى لا يهمك نسامح وإلّا طز ، إنسانة كيفك تتباع وتتشرائ نسّاية تبيع ومتراش بيه فاش نستنى منها ؟ وقت نكتبلك ونستنى فى كتيبتى تعرضك إنتى تفركس على أوفر وإلّا ديل لراس العام ، تفركس فى شيختك وما همك ونحسدك فى هذى لحقيقة ، تمنيت لو تخلقت كيفك ، تمنيت لو عندى مالبرد التمفريخ الشماته قلّة المعروف لى عندك ، تمنيت ونتمنى جيت كيفك نعرف نحسبها أما أنا وإنتى موش كيف كيف ، 

ما نجمش نقلك حبيتك حتى وفات المحبة ، أما حبيت برشة فيك ، حبيت تفاصيل مزيانة منك وفكرة لى عندى إنتى ، وحدها كلمة "عندى إنتى" توصف وتفسر وتفهم كل شيئ ، تمنيتك لى وقت تضيق بيا الدنيا نلقاك و موش نستنى منك باش تكون سوبر ـ ومن لا ، ما تمنيتكش توقفنى حبيتك تاقف جنبى باش ناقف على خاطرك ومعاك ، هكة أنا .. إنسان ما يعمل شيئ كان على خاطر غيرو وفى المضرة لروحو لوّل أول مايلقى روحو وحدو ، ما قتلكش حلّى مشاكلى وأكيد موش نستنى منك تعاونى فى حروباتى ، أما .. تمنيت وقت تاكلنى الخدمة ويصعب بيا تعبها .. وقت نكلمك نحكيو ، نحكيو أي حاجة وتقلى توحشتك ..، نحكيو قباحة نحكيو بلادة نحكيو على جيرانكم فيلم تفرجت فيه حلمة حبيتها معايا .. حتى وقفتك فالكوجينة ، حبيتك تحكيلى قداش من مرة جيت على بالك موش تسميلى لى ستدعاوك والمضروبين فيك ، حبيت بعد تاليفون منك نرجع نخدم ما على بالى خاطر نعرف لى عندى إنتى خلّى تتحرق الدنيا ! موش ربع منك والبقية بين زوز آكسوات و وجه جديد كل مرة ، وستنيتك تفهم ، حكيتلك خوفى عليك ، وما فاد كلام ليل لا نهار ، وسكت .. بقيت نفركس فيك على حبيتو فيك وبدى يذوب بالشوية ، حبيت تخرنينك عركك وخوفك وقت كان عليا ، كسوحية راسك وقت تتغشش وتتهرب تتسبل باش تعمل بانو وهكاكة تتخبى .. تخلى شرعك مبلول والبخل وكسوحية الراس لشكون؟ نعارك ونمرج باش تشيح شعرك وماقمت تشيح فيه كان ما ديجا هوا شاح ،

إي ، مزلت نتوحشك ونتفكر منك برشة ممكن ما ننساهش ، 

موش هذا لى حبيت عليه ، بالأخص معاك ، خاطر خلاف حبيتك فرحتى حبيت نفرحك ،

عالأقل حاولت وهذاكة لى نجم ، مانجمش نلوم عليك كى تحب تعيش حياتك، ما نجمش نلوم عليك خاطر أنا قلت لا ، ما نجمش نلوم عليك خاطر ثنيتك موش عاجبتنى وإلّا خاطر فركست بين الحروف باش تقلى بسلامة وزعمة زعمة جات منّى موش منّك ، ما عنديش حتى حق نتغشش كيف إنتى تحب تعيش هكاكة حاجة بقيمة وقتية ، موش خاطر حبيتك تكون كل شيئ وخترت إنتى تنقص قيمتك وتبع المضاهر الكذابة ، هيا حياتك ونرمالمون غشى عليك يوفى من وقت لى خرجتنى منها ، نرمالمون ما يهمنيش إذا مشات الدنيا معاك إلّا خلاوها بيك ، نرمالمون زادة ننسى كيمة نسيت إنتى أما وقت حسبتك برشة غايضتنى روحى موش إنتى ، كانت تتبدل برشة حجات كان عرفت حقيقتك من لول ، يمكن كيفك كيف برشة مضرة فى حياتى راضى بيها ونستنى منها فى حاجة تصلح، 

يمكن هنا الغلطة وقت صدقت إلى غدوة فيه إنتى تصرفت كى مولا المول وجبت ما عندى كان جيت عارفك "لوكاسيون" موش باش تدوم رانى فطّقتك ورحيت حق الضمد ؛ يمكن خاطر موش كيمة تخزر كيمة خزرت أنا،

عالأقل نستعرف ، نستعرف ببهامتى وقت ما حبيتش نسيب، 

فمة برشة وحش ما تستاهلوش خاطر نوعك ما يفهمش فالحجات لى هكة ، وخاطر كلامك مع لى ما يفهمكش كى بيه كى بلاش نقص كلامى ليك وأنستك بلى هوّا من غير ما نسمى لا نتسمى نسب فيك ، 

ديجا لاهية وصحة ليك وكيمة قتلك نحسدك ، صحيح تمنيتك تطلب قد ما توحشتك وما نجمش نكلمك خاطر رخص أكثر ملى رخصتو معاك فات كل الحدود ، ستنيت تاليفونك ، ستنيت فالمولد عيد ميلادى نهار أحد .. أي حاجة حتى ميساج ، وكى ما وصلش فرحت ! إي // فرحان خاطرك ما طلبتش ، موش تسميع كلام ولا هارب من وجهك

فرحان خاطر معناها جوك لاباس وماعندكش قلق ولا فضوة باش تتذكرنى ، فرحان لى جوك باهى، والله فرحانلك بالحق خاطر مانحبلكش الخايب ..

حتى كان صدفت وقريت هالكلام أكيد حاجة تفرحنى تكملنى أما موش توّا ، مزلت مابردتش كيفك وقدك ونخاف موش نخسرك ديجا خسرتك نخاف نكرهك ، ولو أنو الإحتياط واجب وفالأصل هذاكة علاش بلوكيتك

وهانى كتبتلك ، وتعرف لى كتيبتى قبر 

أما مزلت باش نتوحش فيك برشة عارف أما فاهم ويزّى ما ستنيتك ،

بنسبة ليا أنا مزلت كيمة أنا ، نسب فى كل شيئ ونرضى بالشوية ، نعديها على روحى بقهوة ونرضى روحى بتفاهات ومزلت حتى فالموزيكة كيمة أنا ، حتى بعد كل شيئ .. خاطر ما نحبش نعاود من لول وديجا جربت كل شيئ وما نفع لا نحكى لا نخبى ..

حبيت نقعدو صحاب ، حبيت نقعدو أكثر مالصحاب ، حبيت تشكيلى وأكثر مالكل تحكى ، حبيت منك لى ما تنجموش حبيت منك ماتخبيش ووقت تطيح بيك تلقانى ، حبيت أكثر من كلام الليل وما حبيتش نسميك خاطر النهار هذا ، ما نجمش نقول خسرتك خاطر هذا لى نجّم فوق طاقتى موش مرضّيك وقتها العيب معاش فيا، ومانيش باش نقول خسرتنى خاطر مانحبش نحسبها معاك ، يمكن عندك حق تبعد ومعاش نلوم عليك ، 

فهمت إلى وقت تربط روحك بإنسان موش هامو فيك شيئ ما يبدل فيه ، فهمت إلى كى نعرف لى تحبو وتكرهو ما يتبدل شيئ ، فمهت إلى الحاجة كى تصير معناها حاجة وفات زايد نبقى متفكر ونتذكر ونحكى ملى فات ، فهمت .. إلى برشة حجات فى هالدنيا تتشرى وتتباع وغادى القيمة موش كيمة نعطى أنا قيمة الحجات ، فهمت إلى مايلزمش نستنى من حد يتصرف كيفى خاطر حد ماهو كيف حد وفهمت ، إلى حتى هالحروف زيادة على شبع وموش مشكل إذا كتبتلك وما قريتش ، ديجا كنت كلّى ليك وعندك وحدك .. وما فهمتش .

أزرق

وستنيتك، فيبالى فرحتى إنتى وحلمتى إنتى ووجودك كل شيئ حبيت نعيشو ونعيشلو.. صباحاتى تبدى منّك وبيك بشوية بلادة وشوية قباحة مافيها باس المهم نحل عنيا نلقاك عندى.. خبيتلك منّى وخفت نخسرك وأكثر منها خفت عليك، خفت عليك من هالعالم حتى الخوف كلانى وحلّفتك تبقالى وحكيتلك قداش الدنيا جبدت بيا.. قتلنى البعد ورضيت التعب وقلت ميسالش، إخرها عندى، واسيت روحى بحلمة فيها ديسمبر دافئ ونوفمبر نطفى فيه شمعة تكون إنتى كادو عيد ميلادى.. كادو السّماء ليّا..

علقت فيك حلمة غدوة ونسيت لى تعدى نسيت التعب نسيت لى مشاو نسيت لى باعو نسيت لى هجرو ونسيت حتى لى حبّو.. وقلت يهون.. أكيد بعد التعب راحة و تخيلتك الرّاحة لى ستنيتها يا تعب قلبى يا إخر سطر نسيان يا ألف حلمة يا سكات طويل يا عذاب الليل.. يا إنتى ..

فيبالى الأزرق لون الفرحة وعلقت فرحتى بيك قلت كبر البحر كبر السماء كبر جوانحى بيك.. وقلت الحصرة لى حصرتها لروحى فى بعدك وقت ماعاد نقابل حد كينّى من ورى شباك أزق فالمدينة العربى.. وإلّا سيدى بوسعيد.. شباك مزيان وراه ألف حلمة وراه إنتى وحكايات مزيانة وضحكة مالقلب موش للتصويرة .. أزرق .. حبيت الأزرق خاطر تحبو .. وحلمت .. طلع أمارة متاع طيحة ضربة توجع .. أمارة فى بدنى تتزاد للأكسيدونات لى كلاتنى وطيحات الصغر وقت نزلع ركايبى أما وقتها كل طيحة تعلم .. تنجم تقلى آش عندى منك نتعلم ؟

.. أزرق .. يخلينى ما نجمش ناقف قدام المراية .. كى ضربة فى وجهك .. تحشم بيها ..، علمتنى نكره وجهى بدنى خدمتى مكتوبى وكل شيئ نحس فيه منّى.. علمتنى نكره روحى أكثر .. 

كرهت المراية حتى غطيتها وبعد كسرتها ، كرهت وجهى معاش حامل الناس تخزر فى وجهى وكرهت الأزرق اللون لى تحبو إنتى وكرهت نلبس كيمة تحب إنتى وكرهت حوايجى لى تعرفهم إنتى وكرهت بدنى .. تتذكر وقت كنت تحبو ؟ توا هانا الزوز نكرهوه لا نحبو أنا لا تحبو إنتى ،

ستنيت منك برشة وقت ما نجم نعطى كان شوية .. آش عندى نعطى بربى ؟ نتحير عليك وكى نحسك موش فى صحنك نمرجك ونسيب بلادتى الكل حتى تسمعنى ضحكة فالتاليفون ؟ آش نجم نعطى خلاف خوفى عليك وتخمامى فيك ونكون ليك وحدك بلى قسمة ؟ خلاف تعنيقة .. بوسة وحش موش كذابة .. قهوتين وفطور سعات ..؟ .. شيئ .. من غير لا نسمى لى نجمو ولى ما نجموش .. إنتى حسبتها مليح وأنا لى مفرخنى مزلت ما نحبش نفهم ، 

ولومى لروحى موش ليك .. وبره تعنيقتى دافية وبره ما نحبش فيك وبره نتذكرك كل لحضة وقبل نومى وبعدو وبرى قتلنى الوحش وبره بره بره ... 

نحب نبرد ..

الصّيف يوفى.. وتكمل الضحكة، يجى بعدو الخريف، تتخبى الشمس شوية شوية وتطيح ورقة ورقة من شجرة الفيراندة.. ما جائ الشتاء كان ما بقات عريانة.. كيفى، بلى بيك ولا أصحاب، ڨرسان والكبابط ما تدفيش.. حوايج الصوف ماتنفع شيئ لبرد الروح.. ، دخّانى ونسّى روحى ونكذب كى نقول هكة خير ، تعبت .. تعبت ومعاش نجم نخبيلك كلام أكثر معاش منجم نحفض أكثر بلايص نعرفك كاتراهم تحبهم وحكايات عليا نعرفهم يضحكوك.. معاش منجم ! معاش منجم نستناك أكثر ملى ستنيتك شطر عايش باش كى نحكيو هذا كان واتات وحكينا نقلك مانيش كيفك! بعدك ما عشتش سكرت على روحى وقطعت المفتاح وتخبت تحت الفرش وبعدت.. على ثنيتك.. وستنيتك.. والله ستنيتك وجيتك أكثر من مرّات ونسكت، ما نقولش هانى هونى.. نستناك تتذكرى وقت تتكلم نقلك هانى هنا ، 

معاش منجم... إي .. نحب ننساك نخرجك من عقلى ونطفيك ، نحب نعمل كيفك ونفركس على ضحكتى ، نحب نخرج من هالضلام نحب فرشى يولى دافى نحب ندورها شليلة ومليلة نحب .. نحب نرجع نسكر.. نحب نشرب وما نتذكرش شعرك وقت يهزو الريح ، ما نحبش نتذكر خاطرك ما تستاهلش وإلّا تستاهل ..، مانعرش مع شكون فيكم نحكى يا زوز بنات ، وحدة لى هيا إنتى أول ما عرفتها عسل الدنيا ومحلاك ، وثانية إنتى لى تبيع كل شيئ بساهل ، تبيعنى وتبيع روحك .. تبيع الدنيا .. ومانحبش نحكى أكثر موش خايف وجاعتك ، خايف نزيد نتذكر .. ،

حبيت أكثر من هكة معاك ، حبيتك حكاية مخبية وخبيت عندك منّى وخبيتلك لليامات لى جاية ، ما كفاك شيئ .. 

نحب .. نوجعك .. قد ما توحشتك ، ونحب ننساك كيمة نسيتنى إنتى ، نحب نبيعك كيمة بعتنى ، 

معاش حامل فى هالبلاد شيئ ووليت نكره ، وليت نكره نخزر لروحى هكة بلى قيمة عند لى عمتلو قيمة ونحب نهرب ، تخبيت بالضلام وخرجت النسوق فى الليل .. نلقى روحى مزلت نفركس على وجهك .. شتاء.. وقريب نثبت فى كل كوبل كل كرهبة كل دار ضوء شباكها شاعل .. نفركس عليك ونضحك على هبالى ، شعلت سيقارو وخرجت للشتاء تحت المطر وقفت وسط الشارع .. تنفخت .. قبل رونبوان الفلوكة .. ، نسب فى المروحين مالسهريات ونقول علاش ماكش معايا ؟ كملت دخانى فالمرسى .. 4 متاع الصباح .. الدنيا خلئ .. روحت .. نرقد ونقوم نلقاك مزلت على بالى .. تخنقت ... كفرت .. نسيت وكذبت وطيبت قهيوة ،  رجعت نقرى فى ميساجات السكايب ، وفرق بين أولهم وإخرهم .. بين يا روحى وعمرى ودينتى .. وبين هاك هونى موش ساعتين لتالى قتلى تصبح على خير ؟ تتبدل الحاجات ومشكلتى ما نحبش نبدل ولا نتبدل ، وإنتى طلعت أم البويا سماك ! 

أم البويا بطبلية بيضة .. تنجح .. عشية وموش عارف إخرها فين ، ليل طويل يستنى .. ومزلت نحب ننسى ومعاش نجم نخبيلك أكثر ؛ تعبت يا تعبى.. تعبت من هالبلاد هالناس ملّى كيفك ولى قبلك .. تعبت منّى .. ونحب .. نحب نبرد ما عينى فى شيئ ، لا نحب نعيش لا نموت .. نحب نبرد .. كهو .

Fear Saison

ديسمبر، هذا لى نخاف منّو، وقبلو خوف نوفمبر وبعدو خوف جانفى، خوف سيزون يعنى ،

ولو أنّو ماهوش خوف وعمرو ما كان خوف أما خاطر مالقيتلوش إسم هالإحساس لى دراكيفاش.. سميتو خوف، يمكن خاطر الخوف حاجة خايبة وهالإحساس خايب، خايب برشة زادة،

نرمالمون إنسان كيفى يحب هالأشهرة، خاطر نحب الشتاء صوت المطر فالليل دخانى وقهوتى مايواتيهم كان البرد ونحب المدالينة، نحب الكيسات الفارغة وركشة القهاوى البنينة ريحة المطر ونكت الماء عالبلّار الضلام وضوء الليل وريحة التراب وحيوط الجير كى يتبلو وأكيد.. صوتها فالليل يونسنى .. وسعات كى تركبلى ونهبط شوندوليى منهم ونشعل الشمع، وقتها نولّى فى دينتى معاش دنيتكم . تقول إنتى هالخوف وإلّا لى نسميه خوف منين جاء ..؟

خاطر وحدى.. وأنا فرحتى ما نحسها كان بالقسمة.. خاطر حتى كى نفرح نحب نحكى نحب نورى شعندى وما نحبش حد يعرف ، موش إنفصام، هكة آنا نأمن إلى إنسانة وحدة وقت تكون ليا تكفينى عالعالم بما فيه ، وحتى القهوة والمدلينة لى نحبهم يمساطو كى نبدى وحدى وريحة المطر تخنقنى .. تدخل للروارى وتمس الروح وتخلخلها.. تقتلنى بتقسيط ممل بليد .. وتخلينى نكره برغم مانحبش نكره .. ونهبل وناكل روحى نخرج من عقلى وقت نتلفت.. وما نلقى حد،

حد.. حتى حد باش تحكيلو تقسم معاه فرحتك تخرنن عليه يزين ليلك وتحس.. إلّى بايت فى فرشك وحدك صحيح أما عندك شكون.. ياخو بخاطرك ويخاف عليك.. ما يحبش يخسرك.. يقدرك.. وهكة يزى موش لازم محبة..

ديجا لى سميتو يعوض على كل شيئ !! وقت لى تلفت وما لقيت شيئ والسكات زاد والموزيكة قوات والشتاء بان ومراول الصوف خرجت .. وما لقيت كان كلام، كلام هزّو الريح كالرماد ولقيت روحى براسى ..

نواسى روحى ديمة ونقول العيب منّى برغم نعرف آش عملت وشنية ما عملتش ، نغمض عنيا ونقول ينعمبووها الدنيا ونحكى لاباس كذابة، وهالقلب تعبى حتى معاش ينجم، سكت.. حتى وليت معاش نجم فحجة جديدة.. معاش نجم نتعرف.. حتى كى تقلى وحدة بتفذليك "راك تعجبنى" نسمعها "هيا نخسرو بعضنا".. نسمع آكة لى كتبتو المرة لخرة فى آرتيكل "أيّا تجـــى"*

وباش نعوض.. خاطر باش تعيش وحدك صعيبة ولحقيقة صعيبة برشة زادة، نخلى خيال لى كانت معايا مونسنى.. 

سعات فى ليلة كيمة هكة نرجع للميساجات القدم نقراهم.. ونضحك.. على روحى أكيد، ونشعل كل مانلقى وعد محبة وإلّا حلمة مخبية وسط السطور، كأنى آكة الصغير لى وعدوه كى ينجح ياخو لى يحب حرق روحو فى لخر نجح ؛ ما خذاولو شيئ، طفاوه نساوه وقعدت فى قلبو .. وهالقلب آش هز، كينى نفس آكة الصغير لى حكيت عليه فى سنة أولى نسيان .. جاو خارجين حب يخرج معاهم؛ قالولو برّه بدل شلاكتك وإلبس سبادرى وهيا ، بدّل طاير .. وكى رجع يلقاوهم مشاو.. خلاوه.. نساوه.. ومزال عالعتبة لتوّا يستنى.. ، 

هكّاكة أنا.. نستنى، وكى ياخونى الوحش ويقوى نعطيها آكة التنسنيسة ، ونتقهر.. وقت لى نلقى حلماتى لحلمتهم معاك أنا تعيشهم مع غيرى، نتجن !! نزيد نجهل !! وسعات .. نكتب ومرات نحسب روحى ما ريتش.. وسعات.. نبدع فى تفسيخ عقلى، نعطيها آكة الجونته وإلّا ما كتب حتى نولّى شرشبيل وسط السنافر، 

كنت نكتب برشة قبل فالفازات هذومة، خاطر ما نلقى بيها وين كى السم لى يجرى فالعروق لازم نزيد نحل الجرح باش يخرج.. ونكويه باش يتبع السخانة..، كنت نكتب خاطر نخسابها تقرى، وإذا قرات باش تفهم ؛ باش تحس؛ باش تفيق..، نلقى روحى نكتب ونصبّح فى آكة البوكس نعطى فى نصايح تافهة عالمحبة ونقلهم عديلو كيمة عديتلها ودموع وخناين .. وقتها هيّا ساهرة فى سوسة وإلّا الحمامات كان موش ڨمرت .. شيما تاليفونها تحلو بسّيف خلّى باش تقرى 476 سطر محبة وعرك وغيرة وحش و.. تى سيب بركة حتى هذا موش باش تقراه ، 

نكتب خاطر فقت قداش كنت نزمر على سعدى؛ قداش حصرت روحى وأنا نستنى؛ فيبالى مسلسل مكسيكى والحق يبان والكارما لى كنت نمن بيها .. يدها ،

لى حقنى فهمتو من قبل موش من هالليلة لى وحدى هكة ميسالش؛ خير من صحبة كذابة .. شطرها ما يتحكاش ، غلطتى لى نخسايب الناس تتصرف معاك كيمة تتصرف معاهم إنتى ، وجبتها لا نخون لا نلعب تحت الخط رغم توفر الفرص، مشكلتى حبيت عالثيقة عاد عطيتها وستنيت ثيقة فيا ، وهذا الكل رد بالكم تعملوه ! ماتعطيو الثيقة فى حد !! راهم زنوس وحتى باش نقول كلاب الكلاب ترى بيه عالأقل !! راهم عالفرنك والفيزا و حتى بزازل أكبر بنسبة للولاد و آبدو بنسبة للبنات يطيشو ربك !! رد بالك تصدق لى مزال فمة خير فالدنيا ! وإشرى كرهبة ننصحك راهى فى تونس الكرهبة وسيلة حب موش نقل ! ونزيدك ، ريت كى تبدى تخرنن عالديستونس ؟ يجى واحد عندو كرهبة خير ملى عندك ويسكن ورى البلايك يولى فيه العسل ، لا ديستونس لا شيئ !! وأهم حاجة ، رد بالك تكون راجل أو فيك ريحة الرجولية ، تحب تسكر خليها تحب قعدات ديار خليها ماشية هيا و 7 ذكورة فيهم واحد يبزنس عندو عام خليها !!! خليها لا تولى رجعى ومتخلف ومعقد وياسر تكبر فالحكاية ! تقلك نحب نعوم بـ بيكينى ؟ قلها أهبط كيفى بقطعة وحدة علاش زوز ؟ يا ولدى باش تستحفض كلمة راجل فسخها من قاموسك ، خليها تعرى حتى يولى كلو على برّه ، وكى يخزرلها واحد رد بالك تكملو ، قلها ليها هيا "ريت محلى ضحكتك.؟ الكل يخزرولك"، الأهم .. الأهم مالكل يعنى ، رد بالك تعمل منها راس مال ، خوفك عليها راهو خنقة ، لا تخاف عليها لا تغير ، وخليك ديمة معبى إحتياط باش وقت تجبد بيك لا تحاول تفهم لا تعمل كى سمايا تبقى ترحى وحدك ، الدنيا تبدلت ، وكى تراها تبسم وإمشى لا تعنق لا تبوس ، كهو  ، كل وقت ياخو وقتو  ، يزى ما عطيتها من وقتك :)

عـــروسـة الشـــوالق

وسعات.. كيمة توّا، ياخونى الوحش ليك، نخمم نطلبك، نسمع صوتك بلى ما نتكلم، نسمع الحس لى داير بيك.. وأول ما نسمع حس لى معاك يسئل "شكون؟" نعلّق، نتهنى عليك.. ونكمل فى ثنيتى.. ،

نجم نطلب، نجم نجيك، نجم نلقاك وقت نحب ونجم نجبدك من كرش الحوته ونفكك ملى داير بيك الكل، أما موش هكة، موش هكة نحبك فى حياتى وإذا ما بقى كان هالحل بلى بيك خير، مانجمش نفرض عليك تتوحشنى وإلّا تعمل عقل وتفهم، هذى حاجة ما تجى كان منك.. وبكيفك.. وإنتى كيفك عالى وبنسبة ليا ياسر غالى، مانجمش نعطيك وإنتى تحب تاخو كرشك كبيرة وعينك التراب مايكفهاش، تحب كل شيئ وأنا بالخشم لى عندى قتلك.. يا أنا يا هوما، وأكيد هوما خترت ، ما نلومش عليك إذا ما عجبكش العجب ، إذا رخصت والطمع لى فيك خلّاك بالليلة.. كل ليلة وليلتها وكل ليلة مخدة وريحة ، 

نخاف نجيك ، نخاف نجيك نعنقك نفركس ريحتك نشم ريحت كرهبتو وإلّا برفان من فلوسو كأنك حاجة من حاجاتو متاعو ملكية أما.. كرية، موش على طول كيمة حبيت أنا ، 

نخاف نتوحشك ، كيمة متوحشك توا ونسإل على حوالك.. نخاف نزلق فالكلام ونحكيلك وتفهم لى ماعندى حد وموش هكة نحب نتوحشك ، نخاف نكلمك ونحكيلك قداش ضايع صايع غارق وإخرها موش عارف فين، مستانس ديمة نحلم حلمة بو زوز حلمة ليا وحدى.. فيها كان أنا.. هذى ما نجمهاش، نخاف يجى نهار لى نتوحشك وكى نراك ما نعرفكش.. نخاف تطلع صارتلك حاجة سكاتك طوال ومانحب نسئل حد باش حد مايجى يعاودلك، باش تفهم ! بالعربى نستنى فيك تتوحشنى؛ نستنى فيك تفيق مالتفاهة لى دورتها بيك نستنى فيك تفهم الفرق بين لى يعاركك خاطر ماتحبش تمشى وقوات بيك نومت صباح وإلّى يعاركك خاطر راسك وجعك وموش قد بعضك حبيت تروح وعندو هوامزال بكرى، حبيتك تفهم الفرق بين لى يتغشش عليك خاطر صباح بدى من غير صباح الخير من عندك وإلى هاز خشمو خاطر ما حبيتش تمشيلو تبات حذاه، حبيتك تفهم الفرق بين إلى ختار التعب ليه.. وإلى حبك تصويرة.. بين لى سايس وقت معاش تنجم.. وبين لى ماعلابالو بيك، بين لى عوضك فأقل من دقيقة كى غلبك النوم وبين لى مزال عايش بخيالك.. بين لى خلقلك تصويرة أحلى منك، ولى عملك "عـــروسـة الشـــوالق"

وما نجمش نلوم ، موش خاطر اللوم بعد القضى بدعة وموش خاطر نستنى فى دموعك باش نقلك "مانى قتلك" لا !

ما نجمش نلوم.. خاطر موش أول من خلاتها بيا، خاطر حتى كذبك .. عديتو قبل ، خاطر وقت كنت نحكيلك ما تقلى كان "بحرنى.. غرقنى بالكلام وكولنى هكاكة"

ريت وقت نقلك نقلك ما نبعد كان كى تسيب، وكى سيبت بقيت مكبش.. ، وإخرها تعوضت تبدلت وترميت، إي آش بيه، المشكل عمرو ما كان فيك ولا باش يكون، مشكلتى نصدق..، والحق الحق مشكلتى نحب نصدق ، 

ومن العادى وقت توفى هكة ، العيب عمرو ما كان فيك ولا فى الدنيا ،

العيب فيا وحدى ، خاطر مانيش نفحاوى كيفك ونفركس عالعشرة

0

عكس الثنية ، كياس فارغ والشيرة لخرى معبى ..، نرمالمون رانى كيفهم؛ كالبڨرة شاد ثنية للخدمة ومعاش بكرى نطلب فى ماريو باش يغطى عليا حتى نوصل وإلّا نألف فى درامة لى باش نحكيها كى نوصل .. نرمالمون ..،
نرمالمون برشة حجات، نرمالمون ما نعفس المطار اليوم، نرمالمون ما نقولش بسلامة من غير هنينى عليك،  نرمالمون نقول باش نتوحشك، نحكى برشة كلام نحكى برشة سكات، موش نحكى نكته ونسب التفاحة.. ،
هواء .. باردة الدنيا أما شميسة، موزاييك وحاط ونس كلام راديون، أهيكة ناس تحكى،
ما حرقت حتى ضوء، ما عندى وين ماشى.. نقتل فالوقت.. ماعينيش بقهوة وأكيد مانحبش نرى وجوه كذابة، هذوكم، وجوه العادة
نحسب كيمة لى خرج مالربح ودخل فالخسارة، يكمن أول مرة ما نختارش سياسة التقسيط، كلو فرد ضربة على نفس النفس بلى شيئ وحتى شيئ، اليوم فالتقويم الجديد 0
نحب نروح .. ومانجمش .. مزالت ريحتها هونى، إخر سواڨرى معاها هونى، حاجات يمكن نلقاها صدفة تذكرنى ويمكن خلاتها هيا بالعانى ؛ صفحة جديدة ؟ لا ؟ كتاب جديد؟ يمكن ، أما موش للى يجى

كهو ، يزى ما عطينا قيمة

أيا تجى .. ؟

أيا تجى .. ؟

أيا تجى .. تحبنى و نحبك وخاطر المحبة صعيبة نكذب عليك ونقلك نحبك وتقلى نعشق دين ربك نهبل بيك و تهبل بيا حتى نطيرو مالدنيا هذية، هيا تجى ؟

إيجا إكذب عليا و على يسمعنا إكتبلى حب و محبة و نكذبو حتى نصدقو الكذبة.. وهكة.. تكبر بيك الهبلة وتقلى هانى معاك لإخر العمر، وأنا ننسى الكذبة و نصدق.. نقول برد السناء موش وحدى ونبدى نلم لفيفرى ونخبى نسرق منك كل مرة شوية نخبيه للأيام الجاية باش حتى كان غلطت تسامحنى كى نوريك طروف منك مخبيها لداخل فالقلب فالجواجى ..

أيا تجى .. ؟ أيا تجى نحلو فالبحر ثنية ونشقو وديان وسعادى نشقو الخلاء خلى يقولو هبلو خلى يحكيو و ما نعدلو خلى نتخباو حتى ينساونا وكى تجى الصدفة ويراونا اليد فى اليد مزلنا يلقاونا

.. أيا تجى .. ؟  

أيا تجى .. تمسحلى دموعى ونهزك على ضهرى وقت يقوى بيك التعب نعاركك غيرة وخوف عليك ومن كل لى داير بيك .. تونسنى ليالى طويلة ونحكيو حتى يوفى الكلام وكى يشدنى الوقت نطلبك ما عندى ما نحكيلك .. نقلك طلبت خاطر متوحشك .. طلبت خاطر نحبك وكل لحضة على بالى وخفت تتلهى فى حاجة أخرى تنسانى قلت نطلب ونقول هانى هونى ونقلك.. أيا تجى .. ؟

أيا تجى تعملى قهيوة؟  نقسموها الصرة عندك وسكرها عندى .. بالعربى وريحة القهوة العربى ما حاشتى كان بيك إنتى والدنيا مرارت وسكرها  إنتى من غير رشة زهر خاطر زهرى قام كى جيت إنتى ، أيّا اش قلت ياعمرى ..  

؟ هيا تجى .. ؟

تجينى وإلا نجيك ؟  .. 

يا تجيني يا نجيك يا نتقابلو في شطر الثنية شيطانك يعرف الدّار و انت تعرف لبقيّة

 .. نهربو .. نبدلو أسامينا و نتبدلو .. بعدها نبدلو لبعضنا موش طبايعنا.. لا .. حوايجنا ♡

إي ، آش بيه .. موش هكة يقولو ؟؟ تعال نمارس الحب ؟؟

  إيجا .. نمارسو الحب مالة و نعيشوه كذبة بنينة بكيفنا،

يزى ما خانونا وكذبو علينا إيجا نكذبو نحنا شوية نعيشو كيمة حبينا نعيشو بلى خوف نسيبك وبلى خوف تسيبنى ، إكذب وقلى رانى ليك وحدك وعمرى ما نكون لغيرك حتى بعدك 

و بعدها .. أهرب و أنسانى و كى يقوى جناحك أرمينى مالعالى وقلى هذيكة المحبة ، أنسانى بعد العشرة و بدلنى .. أم توا .. قلى.. أيا تجى ؟

إيجا نحبك بعنف و فرض وقوة حرمان وشهوة مدفونة.. إيجا نعشقك بهبال و حبنى ! حبنى أكثر ملى نحبك بشوية حب عبادة بلى حسابات وترجيع فازات بلى تمفريخ وشماته بلى قداش عندك وإيذى فرغ مكتوبك نسيبك وننساك ،

إيجا . . نعشق فيك .. و نكتبلك نعاركك نخضك نمرجك و ترضينى بعد الفوضى والحروبات بين غيرة و خوف عليك .. ببوستك... و تعنيقة .. والناس هونى مخلطة تاو نقلك وحدك كيفاش بتوشويشة خفيفة كلها محبة وأفكار منحرفة وحش بزايد ودفئ كى تعنيقتك،أيا تجى ؟

أيا تجى ننساو لى قبلى و لى قبلك.. 

نهبل بيك و تهبل بيا و تتنسى الكذبة و تغلب العشرة و كى تموت الضحكة .. فى إخر عركة .. كى تقرر تنسانى .. إكتب عليا .. 

 توحشنى .. وذكرنى علاش عشقتنى .. 

عاركنى وقلى ماحبيتكش كنت خارجة من عقلى كنت ما نعرش نحسبها ..

أيا تجى .. ؟

نعطيك ليالى طويلة ومن عمرى نزيد فى تعبى على راحتك نضحكلك وقت القلب معبى ونخبى خوف غدوة خاطر عارفك عندى .. وإيذى موش هذا لى صار وبدلتنى وإلا كرهتنى ميسالش .. قول كى غيرو عمرو ماكان باش يبقى وسيبتو قبل ما يسيبنى ورميتو قبل ما يرمينى بدلتو بالجديد والجديد يا رابح المغروم يجدد و يرحم أيام المحبة ، 

شقولك يا عمرى،أيا تجى .. ؟

حبنى ونحبك قد المحبة مرة وشطر وقول محبتو شوية عليا؛ أكيد عندو غيرى يطلع يهبط يبقى راجل شرقى .. وتبقى إنتى مراء شرقية مخك معبى سم عالراجل بحكايات الغول والمغتصب والخاين ؛

آش قولك ياعمرى .. 

نقصوها قبل ما نصوحبك بلى وجاعت راس قبل مت تتعلم أمك تسئل عليا و قبل ما نحكى عليك .. نعملك قيمة و نعليك .. نجبد روحى مالدنيا و كى نبقالك ليك وحدك إجبد بيا، ما يهمش خاطر شنية ، خاطر كاس شراب وإلى قعدة تحس فيها بالحرية خاطر بوقوس عجبك بدنو خاطر الحالة اﻹقتصادية خاطر .. ما يهمش خاطر شنية المهم لى نسيت تعبى و معاش ليا،

أيا تجينى و إلى نجيك .. 

و نقلك .. إلى توحشتك من غير نعرف شيئ عليك ..

وإلا نقلك .. خليك حلمة، لا تجى لا نجيك 

:)

إِخِـّرْ لَحْكـَايـَـة : { وَردْ عَرْبـِى }

[وإن كــان العيش بلا سبــب ..، 

فالمـــوت على شيــئ أفضـــل .. . ]

وقت لى هيّا قصتها معايا كان عندى صديقة كان تتذكرها ليلـى عشيرتى سنوات من صحبة نضيفة مزيانة، نوع خاص من المحبة فيه.. هيا أكثر من أخت وصاحبة وزميلة وصديقة وكل مايمكن أن تكون أنثى فى حياة إنسان، هكّة كانت فى حياتى؛ عشرة سنين .. مخلاتهاش بيا وما سيبتنى كان ما وقفت على سقيّا .. وسعات نلقى الونس فى آكة ديسكوسيون لى شطرها زرارق يومية بينى أنا و الآكس، بعد ما رجعت نتونّس بيها وتحت الخطوط الحمراء بما أنها مراء معرسة ، قلت ميسالش ، هذا آش كتبلى ، نكمل نفسر ونقول إلّى إختيارى كان فيه عواقب؛ أنّك تعيش متفرج على العلاقات الإنسانية من غير ما تسمح لروحك تعيش حاجة من حقك، بطبيعة صعيبة كانت العيشة سيليباتار.. 

مع الوقت تكتشف إلى هذا لا يكفى؛ خاطر فى لخر حتى بوجود ليلـى أو غيرها أصدقاء موش كوبل، تبقى حجات مزيانة بسيطة وتنجم تقول تافهة تمنيت نعيشها، بالأخص مع الوقت.. الفراغ الذى داخلى أصبح كثقب أسود، وقبل ما نخسر إنسانيتى تماما بطريقة معاش تسمح باش نسترجعها و بتشجيع منها حاولت نتعرّف؛ طبعا الجنون لى فيّا وعلى خاطر نحب نتحب ونحس الحب والخوف عليا والقيمة ..  الغيرة العمياء كان لزم وأهمهم قهوة دافية من شفايف دافية بتعنيقة دافية موش من مخدّة فيها شطر دفاء، تهورت وبديت فى فوضى العلاقات من جديد و ثلاثة محاولات فاشلة بعد الآكس هدّونى؛ قراونى النقص فى روحى ونساونى أنا شنية علمونى خوف المجهول وغرسو فيا جنون الإرتياب وفهمونى إلى الخسارة لازمة وأكيدة، ورضيت .. قلت ميسالش هذى موش دنيتى..،

.. وغادى فين بالحق المليح يبطى 

وقت جيت إنتى .. و كى سيبتنى كرهتك ! :

نكرهك .. و نكره أكثر كرهى ليك كى نتفكر محبتى لى ضيعيتها من بين يدك وقت تلفت وما لقيتك ليلة سخانة وحدى مع السقف سارح دايخ نستنى فى كلمة موش باش نسمعها حضورك لى موش باش يكون ومحبة هزها الريح .. توحشت كلمة نحبك وكرهت هالوقفة هذى نستنى ونكره الوقفة هذى بين لحروف كى نقول نكرهك ..ونخاف نوجعك بكلمة وقت لى إنتى توجعنى بالعملة.. ؛ مزلت نسبح بإسمك ونقول الحمد لله، وكلام الّيل يحضر ويغيب بين لى حبيتو فيك وكرهتو كى غاب عند غيرى مطيش عالتراب نستنى فى زهرى وقسمى معاك حتى كرهتك .. وكرهت روحى كى نتوحشك كى نحب نتذكر علاش هالقلب بارد كى غناية صعبت نتذكرها ندور فى تراكن عقلى ونلقى .. نلقاك إنتى.. وهذا لى ما نحبش نتذكرو ..، نكره وحشى ليك وغرامى بيك ونكره كى نتذكر كيفاش كنت نبشبش بيك وبوسلك يديك .. وقت لى تحط صوابعك على خدّى وتقولى يوفى التعب .. لا التعب وفى لا الكلام تحكى لا عشنا كيمة نحبو أحنا وكرهت كرهى ليك وقت لى أمنت بيك وسيبت كى غيرك وفى لحضة تنسيت.. إي آش بيه كى تنسيت .. أما قلّى آش نعمل كى صدقتك وقت لى عليتك وستنيتك وخبيتك من عيناهم وكفرت بلّى حبك وإلى كرهك وإلى توحشك.. كفرت بالورد لى حبيت وغرت وقت سامحتو عالشوك لى فيه .. وقت تبننت ريحتو وشم من ريحتك قريب من شفايفك وقت توحشت بوستك حتى كرهتها وما لقيتكش ..، وقت توحشت تعنيقت سماحنا وصوت ضحكتنا وبلادة تصبيحتنا وفرجتك فيّا .. وفرجتى فيك .. ، توحشت بوسة صباح منك حتى كرهتها وقت تزادت للحكايات لى وقتها مات وقلت يزّى معاش نجم نعدّى قلبى فاض بمحبّة لإنسان معاش معاك وبلى حكيتلو مشى وخلاك وقبل ما تفهم لى صار وقبل سؤال علاش أنسى وإدفن تى ستانست .. أما ماحبيتهاش منك.. وجعتنى وقد وجاعتك خفت العيب يكون منى هذا الكل ما نسواش ؟ هذا الكل موش من حقى نعيش فرحة ستنيتها وحلمة خبيتها .. ؟ .. كرهت الضحكة لى تتصور على شفايفى كى نكتبلك نتذكرك نتوحشك ك.. كى تعرضنى حاجة تحبها وغناية سمعتها معاك وزناقى درنا فيها وقهاوى ونست سكاتنا و شتاء .. قلنا باش يكون أول شتاء مع بعضنا وإخر شتاء وحدنا والمطر تولى تتونّس بينا وتعرفنا ، كى حلمت معاك على محبة بلى وقت ما فيها كان أنا و إنتى يزى وياخى ..؟ سيّبت .. كرهت نعمّل عليك وكرهت روحى على صدقتك وكرهتك وكرهت تصويتك الكذابة و كرهت كرهى ليك خاطر نحبك ونعادى لى يكرهك ! كرهت دخانى وقت نهربلو كل ما نتذكرك وكرهت كى قتلى بطلو وحسبتها أيام عمر وغيرة وقتلى نحبك تعيشلى أكثر ..، إي .. هانى عايش ..وينك إنتى ؟ كرهت مانعرف شيئ كان لى تحكيه وكرهت نشد روحى باش نسكت وكى تجى نصبلك صبّة وحدة نقوّد بروحى ونورّيك ونحكيلك كل شيئ بلى ما تسئل..، كرهت وحبيت نكره باش نرتاح وكرهت كرهى خاطر نحبك وكرهى عمرو ما كان ليك .. كرهى للخبيتو للوعدتنى بيه ونسيتو للى ما قلتوش للى ما حكيتوش .. للى عملتو .. كرهى للوحش ليك وقت معاش لاقيك .. وحتى وحشى .. موش ليك ؛ وحشى للشفايفك كى تحكى صوتك كى تضحك كى تغنى كى تسب كى تعارك .. وكى تقول توحشتك .. وإنتى مزلت تتوحشنى فى بلاد العكرى .،؟ بعيد عليك تنسيت أنا لى متوحش صوابعى كى تضيع فى شعرك خزرتك قبل البوسة وريحتك بوسة الخال لى تزينك و رقبتك وصوابع يديك وقت ما تحبش تسلم فى يدّى ؛ توحشت نختارلك لبسة نعاركك باش تزيد تسكر فلسة وكى.. كى تغير .. توحشت النفس متاعك فالقهوة توحشت ريحتك !! كلك !! أما وحشى نزمر بيه ؟ وقت منسى ومطيش .. كيمة قلت ماكش باش تعمل عملت .. ، رجعت للى الفرش والديبريسيون وإنعزلت عالدنيا نلقاها أيام عشتها قبل ونتفكرها مليح ،

ـ يزى .. يزّى .. ! 

ـ إنتى لى تحبنى نتكلم ، تحبنى نرجع نكتب ، ريت علاش خترت سكاتى ؟ .. باش تصويرتك المزيانة ما تتبدلش فى بالى ..

ـ أحكى وإكتب أما موش هكة .. هذى ذبية هذى وجاعة هذى ..

ـ ما نكتب كان لى نحسو وقلبى معبى منك وعليك .. 

ـ آنا زادة مزلت نحس ! و مزلت نغير.. مزلت نخاف منّك وعليك..، مزلت نخاف نخسر الشوية لى مزالى منّك و نهبل نخرج من عقلى ونكفر كى نتذكر.. من نوفمبر لى فات..، ماكش مالنوع لى ينسى و لانوع لى يبيع بالساهل .. وتوجعنى كى نحل قجرك نسنس  بين تاليفوناتك المكسرة وأوراق تخنطب فيها وبعد ضربك البخل باش تعاود تكتب .. نلقى باكوات 

"vogue" 

الفارغة متاعها مزالو عندك ..، وقت نحل كتاب تحبو نلقاك شاد صفحات بتساكر التران فيهم من ريحتها .. كينك تخبى فيها باش ح كى تنسى تتذكر..، تحسسنى كأنى مزلت نحب فى حاجة موش متاعى ..! الشوندوليى لى كل وحدة وحكايتها ، خواتمك وشكون خلاهملك .. حتى تصاور فيهم كان إنتى .. والمشكل فالضحكة لى ضحكتها للى صورتهملك ..، تعبت .. وإنتى لا حبيت تحس! كى وليت ماضى بالأخص! وليت نغير ملى قبلى وإلى بعدى وإلى مزالت فالثنية باش تجى! حبيتك ومزلت نحبك ونكره حبى ليك هكة، نكره نتكلم نخنقك ونخاف نسكت يتقص النفس ومعاش نجم، معاش نجم ما نسئلش لشكون لابس وحاط الحطة، نهلوس كى ما تكونكتيش نهارين، يقوى جنونى ونكلمك على قهوة سعات ونخمم نحكيلك بين لى تعدى وفات ولى مزلت نحب نعيشو معاك، أما وقت تجى..؟ يتعقد اللّسان ويهرب الكلام ننسى آش حبيت نحكى ونتذكر لى عندى إنتى.. أما حدنا إخر لعشية، ..نشرى عركة سعات كى نحبك تزيد شوية.. وسعات .. كى ما نلقى بيها وين نبدى كالعزوزة التكناسة نعقد حواجبى نصح فيك باش تتعرف وتاخو الخطوة وأنا بينى وبين روحى طايرة بالفرحة كل ما تقلى لا.. كهو سكرنا ووفى.. نحس لى مزال ليا عندك يمكن تركينة صغيرة فى قلبك .. ، حبك تعب فالبعد والقرب وإنتى بين البينين، لا جينا واحد لا ثنين .. وموش هكة حبك كان، كنت تحب بالغورة بفن بموزيكة والبوسة الحنينة حبك كان بلاد النسيان لا عاد نعقل فيها زمان لامكان حبك كان بسياسة وكى زرارق المورفين وتقلب فى لحضة، تحب بالقوي، بالفكان وبالغورة دكتاتورية بنينة نسلم روحى بكيفى كى شيخة بنارد الحضرة وترهويجة كى حنيّت نهار شتاء قهيوة دافية وموزيكة خفيفة وزوز عصيفرات جاو لشبّاكك وتخباو عالماء .. حبك كان كل شيئ وحتى من غير شيئ ريحة دخانك وحدها فالدار تونّسنى وموزيكتك وكشكولاتك.. تاليفوناتك و تعنيقة سكاتك.. توحشت تحكيلى كى قبل توحشت بلادتك كى قبل توحشت غيرتك كى قبل توحشتك حتى وإنتى بحذاية خاطر ما حاضر فيك كان بدنك، توحشت تعاركنى كى تهز خشمك ونسئلك كيفاش نرضيك وإنتى تجيبها باب مسكر بألف مفتاح وبعد شوية تلقانا رجعنا ونسينا حتى علاش تعاركنا وكيفاش تراضينا.. توحشت تخاف عليا وتسئل بالمفصل وكى نقلك خارجة تقول لا موش كى توا تقلى نكلمك غدوة، توحشت هبالى معاك وحكاياتك لى ماتوفاش والتراكن لى حفضت أسامينا، توحشت وقفتك فالكوجينة، توحشت قباحتك .. توحشت شفايفك ، توحشت نشبع من ريحتك، توحشت ضحكة معاك توحشت مانسئلش إذا غدوة نجم نراك توحشت تكون ليا وحدى! 

ـ وقت ومشى على روحو وإنتى لى صوحبت وكملت ثنية وحدك،  آش تحب نعمل ؟ نبقى بعدك نسب فى زهرى ونكتب عليك وقت ماكش تقرى؟ وقت تخرج تسهر نشد فرشى ونتخيلك عندى كاسك أحمر وكاسى قهوة عربى ونحكى وحدى على الوحش لإنسان ما خلالكش مكان ؟ وقت ربطت روحك بإنسان آخر آش حبيت منّى ؟ نستناك حتى يرجع شاهد العقل وكى تجى نقلك نعاودو من لول كينو شيئ ما صار ؟! ترميت برشة قبلك وحكيتلك خاطر ثيقتك وفيبالى موش باش تسيبنى .. قتلك عديلى وإذا غلطت سامحنى ما تحسبش عليا خاطر مزال بقيت عمرى ليك نعوضلك بيه ، قتلك سامح خوفى وسامح هبالى وسامح تعبى وسامح لى نخاف نهار نعملو موش بقصدى ومن غير لا نغلط ترميت كى جريدة البارح .. لى تقرات كلها ومعاد فيها ما تزيد

ـ لا موش هكة ؛ خوفى لا تسيبنى إنتى غلبنى .. وليت مرض  .. خفت معاش نبرى منك وقلت نهرب قبل ما نغرق كلّى وننساك، خفت إذا تسيبنى إنتى معاش نجم نعيش بعدك وبلى بيك، خفت مالدنيا الدوارة لا ..

ـ كهو مالة ، ماك حبيت هكة ؟ هانا هكة 

ـ فيبالك مرتاحة هكّة ؟ معلقة فالنص.. لانى معاك لانى موش معاك، بإسم صداقة كذابة نواسى روحى ونقول عالأقل... نراك ..، يمشيش لبالك نحب نتعبك وإلّا نحب تعبى لى موش باين .. لا .. أنا مـرائ تعلمت تخبّى ، قبلك تعلمت ما تحسب لشيئ ولى غاب غاب قسمو وخلاف ضحكتى مانفركس على شيئ ؛ توا .. فرحتى إنتى .. 

ـ يعنى ؟  إخر الكلام .. وين تحب نوصلو ؟ 

ـ ما نعرش ؛ أما تعبت ..

ـ ... تحكى كينّى أنا مرتاح ..

ـ إيجا إرتاح ، إيجا عندى وسيب عليك مالتخمام الزايد ! إيجا نسرقو الوقت توحشت ليلة معاك ، توحشت تصبيحة و..

ـ هكة ماكش تعاون ، هذى خطوة لتالى يا عمرى

ـ ميسالش ، سعات خطوة وحدة لتالى ترتحك تعب سنين لقدّام

إِخِـّرْ لَحْكـَايـَـة : {سُكّـُرْ فَانِيـلـْيَا}

كل حد فينا عندو حاجة يخاف منها، إنسـان بلى خوف هوّ إنسـان ميـّت عندو برشة؛

الموت موش خوف بنسبة ليّا؛ هو تجربة نهائية باش توصللها فى لخّر وهذى حاجة تنكرها أو تتقبلها راك باش تمر بيها فى نهاية المطاف،  خوفى كان لا نوصل للمرحلة هذى وحدى وما عندى حد.. وما عشت شيئ.. يعنى نكون ميت عندى برشة وما تتزاد فالنهار أذاكة كان تصحيحة فالورقة؛ ممكن تقول أفكارى ضلامية وإجتمعت العديد من الفوبـيا على لسانى؛ ممكن، أما الأكيد أنّو كلامى موش من غير داعى أو بلى سبب ومسبّبات، ماكليتش كفوف مالدنيا شويّا ما جبدوش بيّا ناس شويّة وما عشتش شوية نهايات بل كانت عديدة متعدّدة؛ طبعا الخايب فى أي بشر رباوه والديه مليح الإحساس بالمسؤولية والذنب، لكن المفزع مع نهاية السيناريوات رغم السّكريبت المتبدل أنها تكون متماثلة؛ حتى يولى شكّك فى روحك فى محلو وتصدق إلّى الغلطة منّك، الحل واحد من ثنين/

تقبل الفشل وتعايش معاه، تختار تعيش إنسان فاشل فالحاجة هذيكة . أو، تنقم على روحك وتعاقبها بما تراه مناسب، يمكن نوع من مازوشيزم أو يمكن تحقّق فالـ تشى وتستوى فالكفتين، يمكن زادة بحكم التربية الدينية المختلفة إرتبط الألم بالطهر والتخلص من الدناسة .. المشكل، لى طبعى السادى الناقم خلانى نرضى الحل الأول.

كتيبتى ما تخصش سياسة أو تتبنى إديولوجيا ولا حتى تناصر شيئ ، 

فقط نكتب وقت نفهم روحى باش لى ضايع يلقى ثنية، أو عالأقل يفهم هوّ فين ، 

نكمل نفسر ونقول إلّى إختيارى كان فيه عواقب؛ أنّك تعيش متفرج على العلاقات الإنسانية من غير ما تسمح لروحك تعيش حاجة من حقك، بطبيعة صعيبة كانت العيشة سيليباتار.. لكن كان فمة صديقة ، ليلـى كان تتفكر ،

هيا عشرة سنوات من صحبة نضيفة مزيانة نوع خاص من المحبة فيه هيا أكثر من أخت وصاحبة وزميلة وصديقة وكل مايمكن أن تكون أنثى فى حياة إنسان، هكّة كانت فى حياتى؛ 

مع الوقت تكتشف إلى هذا لا يكفى؛ خاطر فى لخر أصدقاء موش كوبل، تبقى حجات مزيانة بسيطة وتنجم تقول تافهة تمنيت نعيشها، بالأخص مع الوقت.. الفراغ الذى داخلى أصبح كثقب أسود، وقبل ما نخسر إنسانيتى تماما بطريقة معاش تسمح باش نسترجعها و بتشجيع منها حاولت نتعرّف؛ طبعا الجنون لى فيّا وعلى خاطر نحب نتحب ونحس الحب والخوف عليا والقيمة .. الغيرة العمياء كان لزم وأهمهم قهوة دافية من شفايف دافية بتعنيقة دافية موش من مخدّة فيها شطر دفاء، تهورت وبديت فى فوضى العلاقات من جديد و تلاثة محاولات فاشلة بعد الآكس هدّونى؛ قراونى النقص فى روحى ونساونى أنا شنية علمونى خوف المجهول وغرسو فيا جنون الإرتياب وفهمونى إلى الخسارة لازمة وأكيدة، ورضيت .. قلت ميسالش هذى موش دنيتى..،

بعد إدمان الفرش والركشة الإنعزال عالعالم وديسكوسيون شطرها زرارق يومية بينى أنا و الآكس، بعد ما رجعت نتونّس بيها وتحت الخطوط الحمراء بما أنها مراء معرسة ، قلت ميسالش ، هذا آش كتبلى ، وغادى فين بالحق المليح يبطى 

ـ الأرتيكل ؟

ـ لا إنتى كلّك، أيّا نكمل نحكيلك ، يا سيدى ويا للّا يلّى تقراو ، هكة من العدم ووسط التأزم النفسى وفلسفة تغافل حتى ترتاح، خرجت شيــراز ، كانت كل شيئ تمنيتو حبيتو موجود جنبى عندى طبيعة وزين وحتى صوت، المراء لى نحلم بها لى تحبنى خاطر أنا أنا موش نشبه لحد آخر أو خاطر حاجة نعمل فيها ينجم يجى أي حد يعاودها بعدى، حب غير مشروط وقبل ما نفيق نلقى روحى نحب .. ونتحب وهبالى قوى بيا وصدقت لى الدنيا يجى نهار وتضحك وضحكت معاها وماأبن ضحكتها، كلامها وكتيبتها صوتها وضحكتها غشها وغيرتها .. حتى التبسيمة وحدها من عندها ترجع الروح ، ننسى تعبى ولى تعدى ونضيع فى شعرها ببوسة نسرق فيها من ريحتها وغادى ووين حسيت روحى حـيْ ! يحيـا يعيــش !! هبالها من هبالى والكلام بيناتنا زايد على مافهمنا بعضنا والكلام ماوفاش بيناتنا وعشنا ! إي .. عشنا حتّى لى جبنا العنينين ولى فالسماء تذكرنا، يمكن ما عجبهمش نعيش الجنـّة وأنا مزلت فالدنيا ، يمكن قاللهم آش عمل هذا باش يعش الجنـّة؟ خرجوه منها ! ... وخرجت من حياتى يا عمرى .. بعد بدنك على بدنى بفيزا ومن قلبى لا نفع طابع باسبورك لا تسكرت طيارة

ـ قتلك ما نمشيش وإنتى لى حبيتنى نمشى تقول شادة عليك الهواء وتخنقت حتى معاش تنجم 

ـ يزى حبيبى .. تسلسل أفكارى .. لا نرجع نحكى من وقت آخر

ـ مادام تحكى عليا أحكى منين تحب .. نحب نتخبى بين حروفك ..

ـ كتبت عليك وما كتبتش شويا وقيت تكتبلى إنتى

ـ باهى كمل .. خرجت من تونس.. شكون لى غارت عليك ونسّاتك فيّا.؟

ـ أول ما مشيت عملت آكة الفازات، فايبر ودراشنية وسكايب وما إليه.. كنت ديمة نتخيلك بعيدة عليا بشوية؛ حتى كى تصب هنا ويقوى الشتاء نخمم زعمة آش لبست.. حاسك هونى ماخرجتش، وبديت تتبدل .. والورد بدى يذبل، وقت معاش نلقاك ووقت معاش تحب تحكى برشة

ـ مانحبش نحكيلك باش ما نشغشبكش! ماحبيتش نزيد عليك ديجا ماكش ناقص!

ـ لا ! هكاكة زدت عليا وشغشبتنى وبسكاتك قتلتنى! كان جيت قدامى نطقك نخرج الكلام من جواجيك أما هكة وإنتى بعيدة آش نعمل !! كمل آكة العيد ميلاد العزيز لى عديتو 

ـ طلبت السماح ألف مرّة .. مخى أذاكة آش قلّى، ما تلومش قبل ما تفهم

ـ قد ما نحب نفهم قد ما خايف نسمع لى نكره نسمعو، كان إنتى عاد توصل تبدلنى بواحد خاطر عندو فلوس ريق دار وكرهبة وبرفانات سينيى أقسم بالله نعمل فى روحى عملة !

ـ ههههه لا كرهبتى وراضية بيها برغم شطرها فمة شكون دڨدڨو، الشماته يا عينى

ـ متاع النقل جماعى بهيم ! صحيح أنا حارق ضوء أما هوّا لى ما مركاش ستوب!

ـ لا علينا كمل فى حكايتنا

ـ آش مزال عالقرض ؟ 2029 آكاكة يخلص ، حاجة هكة شوية صبر تاو نعطيك فلوسك

ـ يعن بو الفلوس ؛ غشّوش هوّا، مسامحتك غير سامحنى إنتى برك، كمل من هنا لوقتها مانضمنش إلى ماكش باش تبلوكينى عالأقل سبعة ميات مرّة

ـ باهى كان موش مبلوكيك، أيّا نكملك، ياللّا كى مشيت إنتى..

ـ تشوى هذى سور نكتبها

ـ حرف حرف ؛ كيف مشيت إنتى ؛ ضعت .. الآكس لاهية فى راجلها وألف حق ليها ، ليلى كيف كيف عرست وخرجت من تونس زادة .. حتى زوز صحاب تفرتو ..، وجعتنى الوحدة .. وضلام لى رجع ما رجعش عشيرى كيمة أول مرّة، رجع برد موت برد نسيان .. لا شمعة تغلبو لا موزيكة ولا قهوة دافية مالبن لى خليتهولى؛ كل أحـد نموت فيه ألف مرّة ومرّة بلى بيك بلى غيرك.. وكيما الغارق ولى ضاع فالصحره ، أول سراب كبشت فيه بيديا وساقيا وسنيا ، ما قبلتش إلى المحبة موش بالكيف وخاطر خفت لا نتسماو كوبل يجى نهار ونقصوها خليتها كل شيئ ، أما بلى إسم .. برغم خفت لا نلقى ما نعطى أكثر ملى عطيتو ، خفت تسيبنى خاطر ضربة أخرى تقتلنى .. حاولت، جربت حجات جديدة وقلت نعطى ثيقتى الكل تاو تعمل كيفى وتعطينى الكل، قلت ما نخون فى شيئ باش ما تخونش وملخر حبيتها تبقى .. وتعميت ببهامتى وإلّا عميت روحى خاطر مانحبش نصدق لإنسان آخر جبد بيّا ،

كذبت أول ما بدى الشيئ يبان ووقت ولات تتخبى، وقت وفاء الكلام ما أيستش دورتها ليانات 

ـ ريت كى نقلك تعطى قيمة أكثر مالازم ؟

ـ لا، فيبالى نعطى كل حد حقو بظبط ..

ـ تغلط هكة، لى تحكى فيه تعملو مع إنسان معاشرو سنين وتعرفو هوا شنية موش ربع ساعة تقلب فيها عليك وبان هوّ شنية

ـ ما حبيتهاش تمشى ..

ـ كهو توّا وفى، زايد حتى لى نحكيو فيه عليها، أحكى عليّا أنا هانى هنا 

ـ وشنية باش يتبدل كى نحكى عليك .؟ تولى تطير ؟ تشعل بالضوء . ؟ يتزادوك جوانك؟

ـ هههههه غرور أنثى ..ونحب نرى روحى بعينيك..

ـ "نحب نرى روحى بعينيك".. مقواها كلمة.. شهيتنى نسإلك عليا .. حتى أنا نحب نرى روحى بعينيك

ـ نخاف نخسرك على طول كان نحكى

ـ لها الدرجة خايب يعنى!؟

ـ بالعكس .. لها الدرجة كل شيئ فيك يتحب .. نخاف تتغر وإذا تعرف قداش إنتى بنسبة ليا تسيبنى

ـ إذا قيمتى كبيرة كيمة تحكى ، فاش قام نسيب ؟

ـ باهى نحكيلك .. أما تمشيش تتغشش .؟

ـ أحكى برك فلقتلى الكبدة والمرارة

ـ زيدها سيڨارو وخلط رواريك .. هكة وإلّا هكة خسرتك .. خلى ما تبقى لحد بعدى ؛

حبيتك .. حبيتك حتّى وفات المحبـّة مرّة وشطر ، حبيتك وخفت من حبّى ليك وخفت منّى عليك وخفت إذا ما حبيتنيش قد ما نحبك أنا وإذا حبيت تحب غيرى وإلّى غيرى برشة دايرين بيك وخفت .. خفت ملّى تحبك قدّى وإلّى تحبك آكثر منّى وإلّى تنجم مع الوقت تجى.. تحبك خير ملّى نحبك أنا ووقتها قلّى محبتى ليك آش نعمل بيها؟

حبيتك بسيف عليا وحبيتك بكيفى وحبيت لى نكرهو عند لخرين فيك، حبيتك حتى معاش نجم نفرق بين مصلحتك ومضرتك ووقت وليت نغير.. خفت من محبتك لاتخلينى موش أنا تبدل فيا وقتها نولى موش أنا لى حبيتها.. خفت مانجمش نستحفض عليك وتوفى حكايتنا بهنينى عليك بسلامة وكهو.. لا سلام لا كلام والحب لى عندى ليك الكل يخلينى رماد إذا خرجت نارو منغير ماتلقاك باش تشعل فيك محبة وغرام .. وقت لى عرفت إلّى محبتك تعلم ألوان جديدة وألحان وحدى نسمعها وقت لى نقابلك ويسئلونى شفمة، زينك زاد.. وقت الوقت ولات عندو قيمة ونعملو حسابات وقت حبيت راحتك وتمنيت ندخل جواجيك ونحوص فى عقلك ونخرج كل ذكرى تقلق كل وجاعة كل تعب ولى قبلى الكل .. وقت وليت نتمنّاها فيّا ولافيك عرفت لى نحبك أكثر ملى نحب روحى ونرمى الدنيا ونتبنن جروحى .. وقت تكون على يديك .. حبيتك وكلمت برشة شوية وموش هذا لى تفاهمنا عليه.. طلعت قبلك مانعرش وماشفتش ولى نخسايبو حب طلع قلق إستناس.. يمكن تركيبة.. وقتها خفت أكثر من محبتك .. طريق مانعرفوش وسماء جديدة ودقت القلب وقت نسمع صوتك وروحى لى نحسها خارجة من بدنى وهاربة ليك .. وقت تاليفون منك يحكم فى الشاهية عندى وقت ننسى وتذكرنى إنتى خفت تمشى مانلقى شكون يذكرنى، ضحكت .. ضحكت وقت كنت ننصح فى بينومتى ونقلها إكبس روحك وإمسح دموعك لى تحبو موش شاد السماء عليك، وجيت سيادتك .. طربقت السماء عالأرض وبكيتنى وجاعة حتى كرهتك دمعتى غالية وقبلك مانبكيش.. وبكيتنى فرحة وولات مسهلها دمعتى .. بكلامك على سيبوك خفت ، وتذكرت علاش ريتك ماللول ..

وقت حبيتك حبيتك وأنا صغيرة بنّوته بطبلية وزوز ضفاير .. محبتك كانت أول محبة وكى كبرت ولقيتك، نسيت باش ننسى لى أنا حبيتك وقلت آش فيها حلمة صغر قعدت فى قلبى نعملها ؟ تى راس مالو شهر.. شهرين..

يكذب فيهم عليا شوية ونسمع كينى نصدق وبعدها يزيه ، وقت لقيتك تكتب وريت.. ماللول كرهتك خاطر نخسايبك تألف من خيالك باش تدور بيك بنات وتجيبها سى سيـّد السهل الممتنع .. وقت كتبت على خوفك قلت مستحيل إنسان يحكى هكة وقت حكيت على حبك غرت .. حتى بينى وبين روحى نقول كذب! أكيد موش صحيح! مافمّاش إنسان مزال يحب هكّة ، وتشويت وقت ترجع بالتوارخ وتورينى بالحرف وتصويرة وإلى يعرضونا من حكايات حكيتهملى وكرهتك! كرهتك خاطر خليتنى نعاود لى نأمن بيه ! كرهتك خاطرك ماكذبتش وقداش تمنيت تطلع كذبة.. فى نومك فليت تاليفونك فايس بوكك ميساجاتك.. تمنيت نلقى بخلاف لى حكيتلى عليه تمنيت تخون تمنيتك تطلع كيفهم تمنيتك تبيعنى وهكة نكمل حياتى من غير ما نتلفت لتالى .. وزدت حفرت .. وعرفت ؛ عرفت وجاعتك ولى خبيتو وبالعكس فيعوض نكرهك زدت حبيتك..، وكرهت خدمتك وموزيكتك وفنك وقعدتك وكرهت فكرت وجودك فى اللحضة لى أنا معاك فيها يفكوك.. صحابك متاع العشرة تاليفونات الخدمة وسبيكتاكلوات وداركم و كل شيئ داير بيك.. كرهت الشونداي لكحل وڨيتاراتك وستنيت ليالى ماتروحش.. خفت تصيرلك حاجة وإلّا وحدة تروح بيك 

ـ .. وحدة وحدة.. موش كل شيئ يتحكى..، يهديك 

ـ يعنل بوبهم ! ينعل بوهم لى خايف منهم وعليهم تى بلاد الخراء قتلك نهزك معايا وسيب عليك.. طرح مبيوع ومزلت هونى خاطر شكون؟ المصيبة لى فاهم اللّعبة وجيتك بجاه ربّى لا تشوينى فيك .. ، يزّى منهم هالبودورو وينعل بوها لى تعرف تعنيقتك وتسلم فيك، تعنيقت النوم سماك! وين نلقاها بعدك ووين تتعاود وشكون إلى مزلت نجم نراه راجل بعدك

ـ شيــراز.. إنتى سيبت كان نسيت

ـ وشكون لى موش باش تسيب .؟ هاه ؟ شكون لى باش تبقى فى عقلها بعد ماتعرفك ؟ شكون لى باش تصدق لى إنتى هكة بالحق موش تركيب ، صدقنى وماعندك باش تحلفنى لا مشكلتك دار لا كرهبة لاشيئ.. وقت مايلقاو ما يقولو يتكاو على أي حاجة تجى عالبال ويمكن خاطر تحكيلهم على صوحبتها أيام القراية خاطر مكتوبك فارغ، تعطيهم الأنسبيراسيون.. والله لا وحدة فيهم فهمت علاش قد ما فهمت أنا .. خاطر تحسسهم بالذنب سماك! خاطر ليالى لى تعديها البره وماتقولش طلعت تخدم ! خاطر وقت راقد راقد بالحق وقت فالكوجينة فالكوجينة بالحق وكى ما تهزش عندك سبب وكى ماتنجمش تجى عندك سبب خاطر وقت تقول لاهى ويمشى لمخها ألف سيناريو تطلع تدهن فى دار خالتك وإلّا فى دار مماتك لاهى بالجنينة .. خاطر وقت ليلة سبت تتخبى تطلع مسكر على روحك تلعب موزيكة.. ، خاطر قد مافيك مزال وشكون لى يصدق لى إنتى أكثر ملّى تحكى !! ما إستانسناش هكة ! راجل بأربع شخصيات الحنين حتى معاش فيها والصعيب مسكر من زمان بوعنبة والدكتاتور لى مايسامحش يحتل والمهبول .. لى تعيش معاه كل شيئ 

ـ عمرى ما حبيت روحى هكّة .. أما الحجات لى عشتها خلاتنى ؛ وفيبالك مرتاح هكة؟

ـ لا ماكش مرتاح ونعرف ، ولا موش ملّى عشتو إنتى هكّة .. فيبالك بكيتنى وقت خرجنا لل كليف ؟ نهارتها لبست شماته فيك قصير.. وما كلمتنيش .. وقت قعدنا فمة واحد كبش يخزر وفقت بيه إنتى.. بدلت كرسيك وعطيتو بالضهر ، بقيت كل شويا تتلفتلو وتحاول تتصرف عادى.. بعدها جبدت التاليفون وتبسط راسك، مت غادى ؛ حسيت قداش قلقتك من جرتى وقت أحنا صحاب كهو وماعندكش حق تتدخل فى حجات كى قبل ؛ وقت تقتل فى الغيرة لى فيك باش ما نتعاركوش .. ووالله عارفة إلّى كان جيت مزلت نخرج معاك لانخرج لابسة أكاكة موش كى ينبت الورد فالصحرة.. وعارفة زادة إلى كان جيت مزلت معاك وخزر أكاكة.. راك قمتلو وفات بعركة..

ـ أيا باهى كى تعرف..

ـ مزلت نكمل فى كلامى وإي نعرف ! موش حاجة باهية لى نعرف! .. وماكش ملّى عشتو هكّة .. وصدقنى كى نقلك فالمدة لى ماحكيناش فيها جرّبت .. شفت لى يكتب إلى يلعب موزيكة لى يخدم كيفك وحتى لى يسرق من كتيبتك.. وشيئ.. شيئ فيك ما تعاود عندهم ..

ـ شيئ كيمة شنية..،؟

ـ كل تفصيل فيك.. حتّى شدتك قبل ما تقص بيا شارع وبوسة تصبح على خير .. وقهوتك .. آش توحشتها وشويت عليها وبعد ما تغرمت بيها ومالقيتكش.. 

ـ أحكى عليا موش قهوتى..

ـ الزوز كيف كيف .. قهوتك قوية كيفك وكحلة كى ضلامك وقت تكحل قلب وتولّى حجر.. بنينة أما تحرق فالقراجم كى كلامك وسكرها ما تفهموش.. حلوة أما قوية تبقى المرارة لى تأكد لى هيّا قهوة ما يعلى عليها شيئ .. كى خشمك ..

ـ باهى علاش البكاء.. نقوم نطيبلك قهوة..وتسكت؟

ـ لا ينفع فيك لا قهوة لا مونداغين.. توحشتك وكهو .. توحشتك..

ـ هانى بحذاك شيــراز علاش الكبّى .؟

ـ خاطرك بحذاية وماكش عندى .. تى حتى تاليفوناتك معاش عارفتك مع شكون تحكى

ـ كان فمة حاجة مانخبيش عليك.. ديجا تفاهمنا نحكيو.. موش هكة ؟

ـ إي .. هكّة ..

ـ باهى شنية أحوال صاحبك حقة .؟

ـ هاهوكة .. بروجيياتو ودينتو

ـ هههههه كى لها الدرجة باعثتو فاش قام تصوحب فيه .؟

ـ .. والله لا نعرف .. يمكن خاطر ماكش هونى وما حبيتش ترانى

ـ باهى إيجا خوذ تعنيقة وإمسح دموعك.. شنية عاد عشية سبت..

ـ باهى // قداش توحشت هالتعنيقة .. ريحتك لى تشبه لريحة الورد العربى ؛ ومطعم سكّر فانيليا ..

ـ باهى يا شوكولا دِيزِيرْ نْوَارْ

ـ ههه سخطة هذا .. حقة ماقتليش آش تحب كادو عيد ميلادك ..؟

ـ إمممم إيجا نكتبو هالأرتيكل كيمة تفاهمنا وبعد نقلك 

ـ باهى .. نكتبو أنا .. كيمة تفاهمنا..

ـ باهى أما نقص شوية موش كل شيئ يتحكى

ـ ... إي .. موش كل شيئ يتحكى سيــّد غــــراب

{قامت بطباعة هذا النص شيـــراز أون برسون ؛ P.S}

إخـّر لحكـايــة1 : {كان.. وأخواتها}

[لا تبـكى ياصغــيرة ..، فالحـب ّاُسطــورة .. والوطـن اُكذوبـة .. ،
وكلّ ذلك الز ّيــف .. يحميــه جسـدك النـّحيـف .. . ]

ـ تسجّـل ؟
ـ نرمالمون بديت
ّْ‎"soundcloud" ـ إحم إحم مرحبا بيكم متابعينا أحباء حْكَايَاتْ مَا نَجْمُوا نَحْكِيوهَا لْحَـدّْ‎
ـ لا ماتنجحش الفكرة ، لى نحكيوه باش نروح نكتبو
ـ وشكون قال باش تكتبو كيما هوّا ؟
ـ شوية ثيقة يا عمرى ؛ تحب نقصوها ونكملو قهوتنا رايضين ؟
ـ لا لا باهى، مصدقتك
"hit me" ـ أيّا مالة
ـ شبيك نرفوزى ؟
ـ هذا سؤال تتقام عليه الدنيا يعنى ؟
ـ تى نفذلك ، باهى نخاف نسئل ..
ـ لا إسئل؛ توّا إنتى فى مساحة حرّة
ـ السؤال لى نحب نسئلو بالحق .. علاش توّا ؟ كنت تنجم تكلمنى فى أي وقت أي نهار كنت تنجم تكلمنى حتى وأنا موش هونى تعرفنى ما نرجعكش ، تعرفنى نجيك ولى نحسو ليك أقوى منّى ؛ علاش بعد كل هالوقت..
ـ سايس أمان .. وما تنساش فمة حقيقة كى ما نسمعوهاش خير
ـ لا أحكى لى تحب .. موش قتلى مساحة حرّة ؟
ـ باهى .. ما تتغشش مالة ؛
وبعـد ما مشيت إنتى .. هكة تحب تسمع ماهو؟
بعد ما مشيت ياعمرى ضعـت .. ضعت ونلقى روحى وحدى وكمل حسيتك كى تبدلت، إنتى لى حبيت كل شيئ معاك ولى بقى من عمرى ليك .. تبدلت معايا وعليا ، الغربة تبدل صحيح أما موش هكة ؛ كمل إنتى نوع لى مايحكيش ما نخرج منك كلمة كان ما نتعاركو أربعة مرّات بالمرتاح
ـ باهى علاش الكلام لى دراكيفاش توّا!
ـ أسكت نكمل نحكى ،
عاد نلقى روحى وحدى ؛ وبعد كادو عيد ميلادى العالمى منّك وصلت للحضيض ، ونفسر للمستمعين هالكادو لعزيز ؛ قتلى صوحب وأعمل آش تحب ، حسيت روحى ترميت كيف كورة البسكات سونتر! وجعتنى منّك .. وجعتنى حتى بالوجاعة معاش نجم ناخو نفس ..
ـ باهى يزّى
ـ لا نكمل ،
عاد يا للّا فى ليلة وأنا نندب فى زهرى حال آكة الباج وحاط موزيكة درامية من النوع الثقيل .. دايخ فى عجب الدنيا .. وصلتنى أنفيتاسيون بالغالط
ـ هذى شطر الآكس ؟
ـ ما تزربش ؛ وحدة وحدة ،
عاد من كلمة لأختها طلعت طفلة محلاها .. مابنها فى كل شيئ .. عدينا أيمات نحكيو نهتريو فى كل شيئ وحتى شيئ وحتى نقلقو نحكيو على قطاطسها.. عجبتنى برشة وحبيت منها ثيقة وحبيت نراها؛ وخفت تكرهنى من كثر ما وخرت رونديفواتى معاها ، حسيتها مالنوع لى مايلزمكش تخسرو
ـ موش برشة على وحدة عرفتها فايس بوك ؟
ـ آش تحب نقلّك ؟ نكذب عليك ونقلك عرفتها فى مضاهرة شادة حجرة وسط الڨاز وهيا تحلف وتتكتف؟ وإلّا فى لاڨار وأنا مروح فى تران البون ليو وهيا فى تران صفاقص كى ترانات جاو جنب بعضهم جاء شباكى وشباكها جنب بعضهم ؛ ضحكتلها ضحكتلى وتلاقينا وصبحنا وكذا ؟ الله غالب بلى رومانسية فايس بوك وكهو ..
ـ باهى ؛ ياخى ..؟
ـ ياخى شنية ؟ أكيد مشيتلها وتلاقينا ،
ماهو زهرى بالتعب .. كينى مالقيتش ولاية أبعد .. كهو، محلاها ومحلانى ماللول زادة
ـ وجه السّوق ؟
ـ لا .. حبيت نجرب حاجة جديدة .. حبيت نتكلم ، نحكى ، حبيت نصب كل شيئ بلّى صار فيا الكل بتعبى والدنيا لى ضلمتنى من أول ما عفست الدنيا لحكايتك إنتى
ـ و نجمت تحكى ..؟
ـ نحكيلك تضحك ؛ أول ما حبيت منها حبيت على تعهّد ، إلتزام بالكلمة باش نبقاو عشرة سنين ، أنـا ليها هيا كهو.. وهيّا ليّا
ـ إي قداش عديتو منهم عاد ؟
ـ ههههه حتى واحد
ـ باهى باهى كمل ..
ـ شوية شوية ريت فيها حجات محلاهم ، حنينة و فينو و محلاها لدرجة تحسها بهلولة أو تتبهلل سعات، ومن خوفى علاها خاطر لى كيفها فالدنيا يتعبو .. مرجتها .. ومن لول حاولت هيا مسكينة، حبيتها تنحى العرى لى تحبو وتريض شوية .. تاليفوناتنا كانت برشة وسكايب حتى ترقد ومع أول نفس أول فضوة نمشيلها
ـ ياخى ما كفهاش ؟
ـ يمكن خاطر تخسابنى مع الناس الكل هكة ، يمكن مافيبالهاش كيفاش أنا مع غيرها وعندها الحق
ـ كيفاش عندها الحق ؟
ـ خاطر الفيلم الفايس بوكى العضيم لى تعمل شماته فيك كل ربع ساعة تصويرة مع طفلة قهوة طاولة عليها باكو دخان ومفاتحى وآكة الفازات وإنتى مولا الدار موش هونى
ـ وإنتى فاش قام عليك ..
ـ حبيت نوجعك حتى شطر ما وجعتنى
ـ باهى سيب علينا منى وكملى على كاملة الأوصاف متاعك
ـ باهى يلى ماتغيرش إنتى ،  عاد .. كيمة قتلك ، حكيتلها ، وخبيت شويا للأعوام الجاية ، فيبالى كيف الصرار و نملة وأنا جايبها نملة
ـ نتفكر مرّة وريتنى ستاتو متاع فاطمة شريف ، صديقتك عاد ، تقول "فمة رجال جوهم باهى مع البنات، تلقاه بوقوس مثقف مزيان و طبيعتو عسل، أما خدمتو تحرمو من الحياة الإجتماعية؛ هذومة يلزم يعملولهم بريم إسمو بريم البنات.. خاطر باش يعدى حياتو باير! "
ـ هههههههه هيا قالت حاجة أما موش هكة بظبط ، ونصدمك ؟ حكيتلها كل شيئ ، موش قتلك ماللول ؟ فيبالى باش تبقى وماريتش علاش نخبى
ـ لا لا مستحيل ! إنتى لى مقسم حياتك خطوط عريضة لى دار فالدار والخدمة فالخدمة و شارع للشارع و ..
ـ إي أنـا، حكاياتى عجنتهم عملتهم كفتاجى و ضيفتها
ـ صحة لأمهـا !
ـ أيّا عاد !
ـ وما تحبش فيها زادة .. كمل كمل
ـ ما نحبش فيها كيمة ما نحبش فيك ، المهم ،
ما نعرش فين بظبط .. وقت عرفت روحى بديت نشربها، وقت بدات تتبدل ، وقت تحكى حكايات مايركبوش ، وقت لى ولات تكنكتى ليل كامل وماتحكيش معايا .. وهكاكة واتات خدمة متع جمعة، وتحولت الطفلة ، تقول هزيت إنسان حطيت إنسان!
ـ يمكن ترى فالستاتويات فالباج وشيئ قلبها تعبّى ؛ موش منها
ـ لا .. صدقنى على خاطر الحكاية هذى بطلت معاش نكتب كى حسيتها تتقلق ، ماكتبت كان كى مشات وقبلها وقت عرضتنى فالمطار صدفة إنتى وحبيب القلب متاعك
ـ مالة ؟  شبيها ..؟
ـ نعرش .. سئلتها .. حاولت ، شيئ النافع ربى ،هيا ديجا موش نوع لى يحكى ..
ـ إي و بعد ؟
ـ ما بعدش ، شديت فرشى وخليتها على راحتها تقرى وتعدى وقتها ، وفى جمعتها عيدميلادها .. عملت آكة الفزات المفرخ متاعى .. صنعتلها دريم كاتشر فى لون لى تحبو ، و ورد قد عمرها على كل عام وردة؛ وفزات أكاكة ، كى طلبتها ماحبتش ترانى .. وصدقنى كى نقلك موش تريفز
ـ ياخى شبى سماها ؟
ـ أيا عاد ماتحبش نكمل !؟
ـ صار مزال ؟
ـ إيه .. أيا ياللّا بعد البلوكاج
ـ مزعمك فيه ! مخف يديك تكْ بلوك
ـ هههه إي باش مانقولش حجات نندم عليهم
ـ تقولهم ميساجات تاليفون أذوكم عاد
ـ ههههه بظبط كينك حاضرة ياعمرى
ـ كمل ..كمل..
ـ أيّا يا للّا رجعنا نحكيو نص نص .. وهنا المشكل ، ماهيش لى نعرفها
ـ كيفاش يعنى ؟
ـ يعنى معاش عندى قيمة وحتى قلّت الكلام ولات معدومة .. وشوية شوية نلقى روحى خسرت روحى وقت لى هيا بصاحبها ديجا وأنا مزلت نخاف عليها ونغنى فى هنينى عليك ..
ـ الزح .. الجباروت والقوة .. دعى البنات لى ماحبيتش تعمل معاهم قهاوى طاح فيك
ـ ههههههه ممكن والله ؛ أما موش هكة نحب نتذكرها..
ـ كيفاش مالة سى شباب ؟
ـ خلاف كل شيئ . وحتى بعد كل شيئ ، يبقى شوية من عمرى لى عديتو معاها ،
ضحكت معاها مالقلب وكانت فرحتى أكثر من مرّة؛ قدام لى حبيت نعيشو معاها مانتسمى عشت شيئ .. برشة بلايص حبيت نمشيلها وأنا معاها .. برشة برشة حجات خبيتها
ـ هزنى أنـا
ـ ههههه لا ياعمرى ، كل حد وشيرتو
ـ ريت ، هذا مالخايب لى فيك ، تعطى قيمة أكثر مالّازم
ـ كيفاش هذى ؟
ـ باهى خطانا ، ماقتليش وقتاش كلمتنى ؟ بعد مابلوكيتها عاشر مرة مثلا ؟
ـ لا .. وقت لى عرفت روحى نجم نسامحها على كل شيئ .. وقت حسيتها بدات تفك بلاصتك.. ووقتها عملت عملة بصل
ـ لى هيّا ..؟
ـ وقت بدات تعيش مع غيرى فى حجات حلمة بيها أنا معاها ..
ـ حيت ...
ـ تى طز ؛ عادى يعنى وديجا قلتلها راك باش تمشى كيمة لى قبلك وهيا قتلى لا
ـ باهى نقلك حاجة .. تعرف علاش يمشيو ..؟
ـ ما نعرش ومانحبش نعرف ، نحكيو حاجة أخرى
ـ باهى باهى ونقص بلى دخان ، أيا الجو تكهرب ، كلمة أخيرة ؟،
ـ أكيد .. ، موش درامة أما لى نخاف منو نطيح كان فيه .. والله حاولت؛ أكثر ما نجم حاولت ، وغايضتنى روحى فى الوقت لى راح وتعبى الزايد عالفارغ
ـ لا لا موش هكة ؛ أوفا بكلمة حلوة
ـ إممم .. نكذب كان نقول ما توحشتهاش ؛ أما إنسان معاش عينو بيك ، تخيل توصل وين أنا وما تكلمنيش آش مزال ؟ باش نفرض عليها تتوحشنى بالسيف ؟ تكلمنى بسيف ؟ تحكيلى بالسيف؟
إنسان ديجا خرجك من حياتو .. وقالهالك بالفم والملائ "أنسانى"
ـ لا عاد؛ هذى مافيباليش بيها
"record"ـ يزى ماحكيتلك مالة ؛ قص الـ
ـ كلمة أخيرة للمستمعين
ـ قرّاء* ! يديا باش تتكسر وأنا نعاود نكتب
ـ هههههه أسكت برك تاو نرضيك بكيلو مونداغين
ـ كيلو مادالينة؟ قيمتى عندك كيلو مادالينة؟ أصدقائى القراء ؛ متابعى "حْكَايَاتْ مَا نَجْمُوا نَحْكِيوهَا لْحَـدّْ" للأسف صوت الشلابق لى باش تاكلها شيراز موش باش تسمعوه




  
الغـــــــراب#

ألف حلمة

سى بون بابورى زفّر وما لقيت بيها وين، وأنـا الغالط أكيد ،
إي ، الغلطة عمرها لا كانت مالزمان ولا ناسو غلطتى إلى ما نعرش نختار وما نعرش فين ناقف .. هكة تخلقت بزربة ما نجمش نتلّف ونطفى الضوء ما نجمش نسكت قدام لى يمسكى ولاعبها سيد الأيمّة وندخل روحى فى دغاغر ما عندهاش إخر جرت إلى ما يستاهلش .. واليوم .. كى نتباع بالرخيص نستغرب ..،
ما عطيتش قيمة الروحى من لول وفبالى قيمتى تزيد بالعشرة خبيت أكثر من ألف حلمة وستنيت غدوة قلت بينى وبين روحى كى نطيحو فالغربال نبقى أنـا بعد ما يمشيو إلى غرتهم الدنيا وجابهم طمع ونزوة .. وتبعت .. تبعت موش حتى بالرخيص تعلقت فالنص و بوبلاش عاد لصقت العيوب فيا وزت كسرت ڨزاز روحى فى ثنيتى الضلمة و .. و .. بلعنى الخوف بعد ما لقيت روحى فى غدوة غربالك المنقوب بكذبك طحت منّو دڨدڨت كرايمى وقلت العيب منى كى هزيتو فالليل وإنتى تتبنن فالڨمرة مع غيرى ريحتك شراب وبرفانتو الماركة السيني حبيت نطردها بريحة قهوة من يديا ويا حسرة .. يا حسرة كيف كانو يعجبوك يديا لى تشقت وتجرحت على دين أم شهرية ما تجيبش من سهرياتك معاه ليلة ولا برفانتو لى تنوحت عليها وقت ما لقيتهاش .. فيبالى باش تفهم .. إلى البرفانات لاموضة كيفها كاللبسة هاي جيفنشى هاي كتيالو هاي فريرى هاو سماك وما فهمتش إلى القهوة دوامة وكل صباح تلقانى أنـا موش لي حاشتو بيك بالليلة يا غالية كنت عندى وتوا عيوبى أكبر من أنك تحكى معايا من غير تكبر بعد الكونفور الركشة الكلاس وكرهبتو المزيانة وأنا لى تعبتك بغشى والعصب الزايد عاللبسة وكسرتلك ساقيك فالمدينة العربى نحكيلك على التاريخ لى تعدى وفيبالى توا فمة إنتى ،  قلى .. يا إنتى آش بقالى منك بعد ما عراك ؟ آش مزال منك مخبى نجم ناخوه بعد ما كل عين رات .. موش هكة تفاهمنا ولا هكة الحكايات المزيانة توفا أمان ! مانيش جاي نقلك حبنى ولا رجعنى أما قدر فى روحك فيق .. فيق أمان فيق براس والديك براس سبابطك وروب العرية والدونو لى تحبو والدنتال.. لى يشهينى فيك .. فيق .. ،
كنت تعاركنى ليالى على ثنيتى الخايبة مع روحى، ترى فى ثنيتك ؟ راهى مزينة من برّا كهو ورى الخيمة وإخر الدروج وكى يغطس بيك البيئر... كان منّى ينعن بويا أما موش هكة ما تغركش ضحكت لى تسماهم شلة وصحابك راهو إلى يلعب فى كورس الزوايل ما يحبش الحصان وفى عرك السرادك و قمار الستريت بوكار عمرو لا همو كان لى وصلو لى شيختو وربحو جرد نومرو يتنسى بعد شوية .. ورد بالك تخسابنى بلى تكثر عيوبى كيفهم نساي ..،
أكثر من ألف حلمة خبيتلك وخسارتك .. حلمتى ماهيش سينيى ولا مارك ديبوزى

بــدّو بتــمامْ

ياولدى إسمعنـى يهـديك، كى طلبـت المـرّة لولـة وما هزّتـش ماهيش باش تهـز فالعاشـرة، ولا حتّى فالعشرين، صدقنى يخرج نومروك كى تطلب وكان جاء حاشتهـا بيك .. راهى كلمتك وإلّى رجعـت ميساج، كمّل يمكن كيما المرّة لخرة ، "ماهيش وحدها" تقلّق فيهم علاش ..؟ علاش الرخص الزايد وآش همّك فيه شكون؟ وإذا لى معاها موش فالمستوى وموش ناوى عالخير و و و بختصار كل أفكارك الشريرة، آش دخلك ؟ آش يهمك ؟ إلّى جابتـّو ساقيه إفهم ! ومدام خرجـت من حيـاتك ..، هيّ المسـؤول الوحيد على عواقب كل قرار أو خطوة تاخوها فى حياتها، ما فماش علاش تعمللها هالقيمة الزايدة وهالخوف الكل، ديجـا .. هكّة تلزها تكذب عليك وتخبّى أكثر ما خبّات، وفى لخّر .. إنتى الخاسر الوحيد ، تعلم تسيّب وكى مشات ما تزيدش تصعبها على روحك، ما تخليش روحك رخيص وإفهم إلّى كل ما تعمل و تتلفت تلقاك مزلت حذاها راهى باش تعمل أكثر وصدقنى حد ماهو خاسر فى هالنّازلة كان إنتى ...، صحيح قصدك موش خايب وصحيح تخاف عليها وعشرة وألوان المحبّة وياخى ..؟ هاكم قصيتوها ، وتتبيع بعظكم عصب ومرج وتعب زايد، ياولدى هالدنيا تتعاش مرّة ونصيحتى ليك "ما تعطيش روحك مرتين لواحد باعك مرّة، خاطر كان جاء فيه الخير راهو من لولة ما باعكش"، إفهم يا ولدى إلّى لازمك تتعلم تسيب .. حتّى كانك مقهور ..سؤال علاش وكيفاش كيف تجاوب عليهم ماكش باش ترجع بالوقت وتصلّح شيئ ، خليك فى توّا ، ورد بالك نزيد نقولهالك كى تعطى قيمـة وقدر لإنسان رخيص.. راهو ما يغلاش، وما تقوملوش قايمة من أصلو خاطرو رخيص.. وراس الهم موش هونى فى تضييع وقتك وتعبك فى إنسان ما يستاهلش، الكارثة كى ترخص فى جرايرو إنتى، إنسان هكة ما يعلّيكش، بالعكس هذا يتعبك ويخليها بيك وينقص من قيمتك، رهوط حشاك ! ما تستغربش ، فمة لى هكة ، ما يرضى روحو كان شلاكة مع لى ما يسواش ، أبعث عليك ويزّى ، فى لخّر راهو لى خلقو خلق غيرو ، شوف يا ولدى.. هالحالة لى وصلتلها .. وهكة زعمة عاجبتك روحك؟
نعرف ...نعرف إلّى صعبت بيك هالدنيا لذى ما تزيدش تصعبها على روحك.. ،
قبل؛ كانت النهاية السعيدة لكوبل فى حارة مفرخ دويرة ولمّة عائلة السعيدة لى تبلعت بالقروضات ، ماهم واصلين لشيئ أما متهنّين ..، فمة محبة .. حتى كى تصعب بيهم الدنيا تتحل ..، توّا ؟

النهاية السعيدة لكوبل كى يقصوها سلامات ، من غير حرب أهلية وكلامات وتسميع للحكايات المخبية فازات الشماته وقلّت المعروف ، توّا ؟ ولّيت تتسمّى رابح كى تقصها بأنقص أضرار ، لذى .. يزّى مالأضرار ورتح روحك وبيع كيمة باعو ، يزى ما عطيت من بدنك وتعبك ووقتك .. فى لخّر لا راو بيه لا فهمو ، بيع كيمة باعو إلّا نقلّك ؟ أبعث عليك ، إبرد كيمة بردو وأنسى ..، فيق مالحلمة لى منيت بيها روحك خاطر حد ما يبقى لحد ، يزّيك ما هزيت رزن زايد ، إنفض كتافك وإرتاح ، خاطر فى لخر .. الدنيا موش ناقصة تعقيد ، بالأخص من إنسان رماك ؛ عزنفسك ياولدى ، إخرها نفسك لى تعبتها فى جرت لى ما يستاهلوش هيّ لباش تلقاها معاك ، هيّ كهو .. عزها ، وبالك عليها ! خاطرها المكسب وراس المال ، ودّها بالفرحة ، وغير هذا ؟ أبعـث .. وقول ملّـة راحـــة

لتراتيل القهوة

ـ صباح الخير يا عمرى .. قمت عند برشة ؟
ـ أفقت قبلك ، لكننّى لم أقدر إعداد القهوة لوحدى ..
ـ يا حبّى شنية اللوغة العربية ؟ سهرت على فيلم الرسالة بعد ما رقدت وإلّا شنية ؟
ـ لا يا قرة عيني شوقا .. فقط هي محاولة منّى لأتصالح مع لغتنا التى إبتعدنا عنها كثيرا .. ومحاولة منّى أيضا.. لدفعك نحو الكتابة ، يكفيك هجرا لها .. .
ـ باهى .. أوكّى .. لكنى أخاف الأثر المعكوس ..
ـ كيف ذلك ؟
ـ يحكى أنه في زمن قديم جدًا، تعلمت امرأة امتطاء حصان أعرج لتثير إعجاب أحد فرسان القبيلة، فشلت فى إعجابه أو لفت نظره، فقتلت الحصان، أخاف أن تقتلى كتاباتك إن إعتزلت أنا .. .
ـ لا أخفيك سرا .. فكل النساء تتساوى فى مثل هذه الحلول الإنتقامية ، الفوضوية ..
ـ يا حومة ! نخاف أنا يعنى ..؟
ـ حبيبى !
ـ هل أخاف إذا ..؟
ـ هل أنت حصان أعرج لتخاف مثلا ..؟
ـ أكهو ! بدينا فى تسميع الكلام ! حصان يا بايبى إخر عمرى ؟ إذهبى إلى المطبخ وأعدى لنا القهوة لا نقوم نمسح بيك القاعة يا آكس إنتى
ـ لوحدى ..؟
ـ هانى معاك ..
------------------- *فالكوجينة . ---------------------------
ـ أتعلم ما أريد منك حقـّا ؟ أنا لا أريد أن تكون الصديق المقرب، كما وأني لا أريد أن أصير صديقة عادية، كنت أريد أن تتفهمني من منطلق أنني غريبة عن المنطق وعن هذا الكون .. وإنطباع جنون إن كان له إنعكاس مرآة .. فسيكون صورة لك.. لك فقط، إنّى جائعة .. جائعة لنفسى ولأكون نفسى..، أن تكتمل الصورة ولو للحظة .. الآن جائعة.. وأستحق الحصول على نصف تفاحة".
ـ لم يكن ذلك طلب صداقة .. كما أعرف أني لستُ بحالة تسمح لي بسؤال جميلة مثلك عن إعادة الكرّة، لكن يُلح الطقس المائل إلى البكاء هذا لأعرف نهاية هذا الطريق ..
ـ أن اكتب لك.. "المخلصة لك".. ثم أطوي رسالتي و أضعها بين كتاباتى الأخرى إليك ، أن أكتب على الظرف اسمك ولا أذكر عنوانك ثم أترك مكان الطابع بريدي أجوف..، معناه أنّي إمرأة تحبك بلا مكان .. أوطن ..، قدر ما حاولت استئصالك بالكتابة لم أنجح.
ـ أتعلمين أننّى لا أكتب إلّا الأحداث الواردة ... ففي نهاية هذه الحكاية ترتبط الخيوط لتتضح أنها ليست خيالية ، هي الواقع وتمتُّ بصلةٍ تامة للأشخاص بين السطور، فقط .. كانوا أحياءً حتى تاريخ الكتابة وبمجرد كتابة التاريخ ماتوا..، بالكتابة أدفن الماضى وهي طريقتى للتجاوز ..
ـ ولم طال غيابك إذا .. ؟
ـ يا صغيرتى .. الرسائل التي لا تصل لا طائل من كتابتها
ـ إذا بعد كل ما حدث .. أنت لا تكتب للعابرين حقا ، بل بكتاباتك وجهة ..؟
ـ لا .. بل أنا متعب من العابرين، أتعبتني تلكَ الزائرات المتطفلات، وأتعبتني قلة اكتراثهنّ بالتفاصيل الصغيرة، إنّ عابرات السرير اللواتي يرقصن طوال الليل على ضوء القمر لا يثقن بنور الصباح.. قررتُ الابتعاد عن هذه العادة، عادة استقبال أي امرأة في قاعة الإنتظار التي أملك، أقصد "قلبي".
ـ تقصد أنّك قررت أن تصادق الوحدة وأنّ أمر العلاقات قد ولّى ..؟
ـ لا ، أقصد أنّى فقدت صبرى وأشتهى قهوة !
ـ إممم .. إدمانك للكافيين عالى .. سأعد إليك ما تطلب ..
ـ إذا .. أنصتى لتراتيل القهوة جيدا ، أشعلى سيجارة في البدء.. لا تصدري صوتاً، أصغي لصوت النار، إفتحى علبة البن وإستنشقى منها رائحة الصباح .. ضعى القهوة على النار وإعتني بأناقة فنجانك ولا تهتمي لغير ذلك،إيّاكى أن تضيفي القهوة ماء بارد ! .. على يمينك يسارك باب خلفى، اسرقي ياسمينة واحدة فقط.. لا تنسي فيروز فالصباح لا يعد صباحا دونها، غني معها ..وتعالى إلي .

Périmé

طبعـا بحكـم علاقـاتى المنهـارة جـدا و تجـاربـى الفـاشلـة .. منجمـش نكـون إنسـان تاخـو من عنـدو باش عـلاقة تكمـّل وتواصل.. أما نجـم ننصحـك كيفاش تمنعهـا كى تحبهـا ماتوفاش وتنهـار وتجـى للحفـرة لى أنـا فيهـا ،
المشكـل إلّى يتعـاود بصيفـة عامة عنـد برشـة إلّى يخسـايبو "التصـوحيب" إذا تصح الكلمـة "تبنـّى" .. موش المشكـل كى تحكـى مشاكلـك وتصـب كل لحضـة ضعـف وخوف وإنهيار للإنسان لى معاك ساعة حاجة تفرح وتدل على ثيقـة كبيرة ، أمـا موش معناها طول قبل "صباح الخير" أو "توحشتك" و "عسلامة" تدخل على والدين بوه بالأخبار الزبالة .. سايس يرحم والديك .. حتّى العرك لى سبب متاعو الأهم "الغيرة" راهو كى تكثر منـّو يمساط ، معاش يرك تحب تستحفظ عليه أو تخاف عليه .. يولى يراه خنقـة وعقدة نقـص تسيب فيهـا عليه أو أزمت "ثقــة" أو حتى شمـاته إذا باش تمررلـو كل تحريكـة ... وهنا تخليه يتعلم يخبّى وغادى فين خلات ، صحيـح أحنـا كـ "شعـب" مريض برشة وإلّى موش سوسيوباث تلقاه سكيزوفران أما .. موش هكة ، حتى العقد باهى كى تحلوها مع بعظكم أما موش بطريقة تقديم همجية ، هكاكة العقدة تزيد تتكبس.. لذا.. إيجا نفسرلكم هالتصوحيب بعنيـّا فماش ما تفهمو علاش خترت هالحالة المدنية والقهوة وحدى كيف نكتب فى هالكلمات ،
الصحاب الأصدقاء .. حاجة باهية وتعاون فى هالدنيا وعلى إحساس الوحدة مإلخ .. أما .. تبقى ديمة فى حاجة لإنسان تخليه بئرك الغارق ..، كيمة يلزم ترضى بالخايب فيه قبل ما تتغر بالباهى.. هو زادة ما يلزموش يحاسبك على شخصك أفعالك أقوالك فنـّك وبالأخص ماضيـك ، خاطر إذا يحب يبدل فيك راهو يحب يحطك فى قالب غيرك لذا بكل بساطة خليه .. لغيرك  إلّى يواتيه هالقالـب ، والأهم .. تجنبـو العلاقات الهدّامة المبنية عالتهديد ، ريق رانى "جعب الدين باشا ونعرف قبلك وبعدك" وريق "كان تبعد عليا نعمل ونعمل" ، هالأشكال غلطة حياتك راهى خاطر العشـرة موش هكة .. موش ماخذة بالخاطر .. هكة تولى ربطيـة .. وعذاب فى خاطر إنسان مايستاهلش ،

التصوحيب ومانعرش كان هالكلمة موش بيريمى أو غير نافذة المفعول موش هكة ..، فيبالى زوز ينقصو على بعظهم هـم الدنيـا و تعبهـا .. آكة الإنسـان لى تعرفو موجود حتى كى تنهار الحيوط لى دايرة بيك الكل ، الإنسان لى ينقص عليك موش يزيدك لى يلصق فيك كى تضعف موش يخليها بيك موش إلى كى تطيح يسيبك ياحاشتو بيك الفوق يا لا ! فيبالى .. إلّى هالدنيا صعيبة ديجا وتزيد تصعب .. هذاكة علاش يلزم تلقى لى تتكى عليه ويتكى عليك راحة لبعظكم موش مرج وشمايت ترجيع فازات وعصب ، هكة بلى بيها خير ، موش منضر أو ديكور أو لأوقات وأوقات لا .. يعنبوها الخيانة لى باش تخليك تخسر إنسان معاك وراضى بحالك مهما كان تي وين مزلت تلقاها ! .. المشكل ، إلّى هالكلام مايفهمو حـد ، وبصراحة عندهم حق ..، أما الفرق بيناتنا إلّى أنتوما كل فترة تجيكم تعديوها مع بروفيسوار .. وأنـا ؟ لا يزّى ، هانى صــايم .

دامــــوس الخنــــڨة

موش ديمـة نهـاية أي عـلاقة تعنـى بالضرورة نهـاية الارتباط، بالأخـص .. إذا واحـد مالأطـراف ما إقتنعـش بالفكـرة ، خلـّى عاد .. كى يبداو الزوز ، التسميـات والمسميات تختلـف .. كمّل فى هالوقـت تسمع حاجات غريبة ، غير الـ الأنتيم..الـ آمـى ـ بروش.. و ساكس فراند ، الباست فراند ، الآكس ، والتسميـات عديــدة.. وأنـا ديجـا نكره أسامـى الحاجات .. نكـره التسميـة خاطر كينـّو كنتراتو باش تصحح فيه ، مدامك صاحب يعنـى عندك الحق فى كذا و موش كذا ، مدامك خطيب يعنى حقك يوفى هنـا .. وإذا آكس .. موش من حقك كذا ، نكره التسميـات والحدود لى تصورها ، الخطـوط العريضة للجبـر و دور المتفـرج ، وبرغم الكره هذا .. الآكس لى عمرى ما سميتها .. عشت معاها زادة الحلـو بعـد ما قصيناها ، يمكـن خاطر وقتها غارق فى حبهـا أو تعلقـت بيها أو عشرة أو سميها آش تحـب .. حسيت روحـى مزلـت مسـؤول عليها ، خفـت عليهـا من الذكـورة المفرته .. خفـت تعمل بشماته وإخر باب بينـاتنا يتسكر ، خفت نخسرها أكثر ما خسرتها وبشوية بلادة رجعنـا نحكيو بعـد مدة طويلة ، طبعـا .. كان أكثر كلامنـا عرك فى هـاك قلـت هاك عملـت .. وقت إلى كان ووقـت إلى عملـت ، تاريخ النكسـة .. شوية بلادة وشوية قباحـة ، وسعات .. شماته زادة، يقعـدو أيام حلوين ومشاو وإلى مشـى ما يرجع ، حبيتـها بالحق وموش شوية ، خاطر إنسانـة تستحـق ، موش نحكـى على زينها وقلبهـا الحنين حتى تحسهـا نيّة .. لا.. خاطر حبتنـى وحببتنـى فى روحى والدنيـا وقـت كرهت كل شيئ .. وأولهم روحى ، خاطر من غير شيئ حبتنـى كيمة آنـا ورات الباهى لى فيّـا ، خاطر كان موش منهـا هيّ رانى ضايع أكثر من هكة ، من غير ما نحكى أو نرجع نكتبلها ، ديجا مرئ معرسـة توّا .. وحتى المحبة معاش هيّ، كانت محبـة و وحش ليها كشخص ، توّا؟ ولّات لأيمات تعداو معاها ، وقت فى نهار مالنهارات حسيت روحى عندى كل شيئ ، واليوم .. هانى كيمة قابلتك إنتى .. نقابل فى شيـراز ، خـط النهاية سى بون يلزم هالحكاية تاقـف خاطر ولّات تعـب ، وأنـا أنسان تاعب ديجا والدنيـا عاملتها معاه .. وشاهى يرتاح .. .
حبيـت نستـدعاها ونحكيلهـا كيفاش وفات مع الآكس لى عمرى ما سميتها .. خاطر سئلتنى برشة وقلتلها "تاو نهار نحكيلك" ، حبيـت نحكيلهـا باش ما تبقـى تسالنـى شيئ ، وبنسبـة للى وعدتنى بيه وكلام اللّيل مسامح فيه .. عالأقل موش كى غيرها، شيــراز لإخر لحضـة بقـات تحاول ، أمـا .. مع هالبعـد وسكوتها زايد لى نعملو فيه الكل ، الغلطة الوحيدة .. فالوقت .. ،
حبيت نستدعاها على قهوة فالـ "ناكسـت ـ وان" فين مستانس نقعد آنـا والمـدام سابقـا ، صدقونى لا عرفتها .. الديكور تحطم ! مبقاتش هيّ بالكل .. وهذى حاجة أخرى تغيض .. برّى قلـت نمشيو للأرتيستو .. نلقـاوها تحرقت ! كى سئلت من وقتاش قالولى مالثورة .. صار ماس وشعلت !! القهوة مقابلة دار شباب المنزه 6 .. تأزمت !! لهذه الدرجة حتى القهاوى حالفة ما ندخلها مع حد بعـدك ؟؟ هيـّا موش مشكل ، الحل فى أي قهوة ، الحكاية حكايتى وموش لازم مؤثرات بصرية للمونتاج و نستالجيا زايدة ،  نهز شيـــراز وديريكسيون أي قهــوة ، فى وسـط البـلاد ركشنـا ، ليتـوال .. برغم كرهى الغريب ليها .. برغم كنت تنجم تقول "عايش فيها" ،
قداش القهـاوى بزايد .. وكى تحب تلقـى فين تقعـد معاش يعجبك العجب ؛ الحاصل ..
شيــراز جنبـى .. مزالـت كيمـة هيـّا ، هـبالها وفنهـا وموزيكتهـا ودنيتهـا ، كاينـو شيئ ما تبـدل نحكيو ، كأنى عندى هيـّا.. ضحك وشوية تنبير ، حتّى جات العشيـة ، ستدعانى على قهوة من يديهـا .. وتوحشت القهوة من يدياتها ، روحنـا .. وفالكوجينا ركشنا .. وهنا فين بداء الكلام ، بسؤال ماسط منّى .. وقت سئلت "تعــرف إلى إنتى معاش متاعـى؟"
هنـا .. بكلمة وحدة سكتنا .. "نعـــرف"
سكات مخيبـو ، سكـات .. تسمع فيه صوت السيڨـارو كى يتحرق .. حس الريح و النـّاس فالشارع .. سكات دفينة .. سكات كينّو الكلام وفئ مالدنيـا ، كينّى كل كلمـة باش تزيدها باش تغرق أكثر ..،
كاس القـهوة .. دخان .. ومانجمتش حتّى نخزرلها ، آش عندى نقول .. ؟ علاش تخليها بيا ؟ شبيك فى لخر طلعـت كى غيرك ؟ نحكيلها إلى طول بعـدها مشيت نجرى تعرفت .. وفى لخر حتى لى جيت نداوى باهـا هلكـت الكل ؟ .. زعمـة نشكيلهـا .. ؟ نشكيلهـا منهـا من لى بعـدها .. من بنـات حوّاء وتعبـى فالدنيـا ؟ زعـمة آش نحكـى وآش نخلـّى !؟ نلوم زهرى ونسكـت .. يزى ما حكيت ، خلاف طرف الجامات من باج سعات نكتب فيها ماعندى ما عملت ، غارق ونزيد نغرق وإلى تجى تعفس وتتعدى ؛ منين باش نشدها .. ومنين باش نسيب ، سارح فى حالى وأحوالى قصّت على أفكارى السوداء شيــراز بكلمـة .. "عالأقل .. متهنيـة عليك"
ما فيبالهاش .. عندها الحق .. "وبربّى فاش متهنية ؟"
"إلّى تنجم تلقى إلى تستحق .."
"وجـد عليك؟ تواسى فيّا بكذبة ؟ يزينا بربى من هاللوغة"
"لا .. موش لوغة"
"وآش فيّا يعجب يهديك! ماك تعرف الحال .. "
"بكلك تعجب .. "
"نعجبك إنتى .. أما غيرك ما نتصورش"
"إممم .. يعنى تقول إنتى يلزم يراوك بعنيـّا ؟"
"قلّـى قبل .. عينيك كيفاش ترانى ؟"
هنـا جات قعدت مقابلتنـى .. طفاتلى سيڨـارويا .. وحكات ؛ "مشكلتـك تدفـن فى روحك بالحيـاة .. صدقنى لاك خايب ، مانيش باش نحكى عالمنضر خاطر كيمة قلت إنتى قشرة ومافيها ما يتعاب هالقشرة .. أما البنّة لى فيك .. آكة الإنسـان الدافى المخبـّى لداخل ورى ملامح الشـر ؛ من بعيد تبان دكتاتور .. عنيف وقمعى .. ومن قريب تتأكد ، أما لى يعرفك .. يولّى يخزر للدنيا بلون جديد "
هنا قصيت عليها "بركيزول آنـا؟"
تضحك "لا .. شيخة أخرى"
"إممممم .. سايس لا نتشالو .. تحليلى موش نضيف برشة وهالكلام ناوى نكتبو"
"مالة ما تنقص حتى كلمة .. خلّى يعرفوك .."
"بلّى نجم ... كمل شيــراز"
طفـاتلى السيڨـارو دوب ما شعلتو ، وقالت "آش تموت عليه هالدخان.. قداش تخبى ورى ثنيتك الخايبة .. مشكلتك ما تعمل شيئ لروحك على خاطر روحك، مشكلتك تختار الثنية الضلام وتتخيل إلى فما شكون باش تجى تمنعك .. أما عندك حاجات .. تنجم تخلى أخيب حاجة فى الدنيا مزيانة .. كى تفسر علاش وكيفاش .. كى تختار الموزيكة .. بوست صباح والقهوة من يديك"
"بدينا نخرجو عالموضوع .. موش هكة ؟"
"حقّـك .. باهى توّا ؟ نجم نبوسك"
"لا شيــراز .. لا خاطر معاش فمّة علاش ، نكذب عليك كان نقلك مانيش شاهى وإلّا ما توحشتكش .. أما كل وقت ياخو وقتو؛ ديجا هالقعدة غلطة .. ماحقنيش جيت .. حكايتنا ديجا وفات، مانحبش كالآكس نتفرج فى حياتك تقدم ووقت تاقف بالباهى ونستانس بيك نتلفت ما نلقاكش ؛ إنتى سيبت .. وكيمة سيّبت تعاود تسيّب وأنا موش قطعت حوايج تلبس وتنحى كيمة يضهرلك "
"وحدة وحدة شبيك .. الكلام لى دراكيفاش علاش ؟"
"خاطر عفت هالعيشة ! خاطر حتى بعدك جربت والنافع ربّى خاطر تعبت .. خاطر شاهى آنـا لى نغلط موش من غير ما نفهم أو علّق على كلمة ضروف و مكتوب نترمـى .. خاطر كل مرة نطلع نفحة و مرحلة .. خاطر مابقالى حد .. وليت نتذكر فى ناس قرات معايا فالمكتب كى نحب نعمل قهوة؛ .. دورتها زملاء خدمة خاطر مالقيتش صحاب وهالغلطة عارف باش نندم عليها"
"تعرف لى عندك أنـا .."
"حتى تركح فى تونس قبل وإنتى عاملة المطار كى محطة باب عليوة ؛ وحتى إذا .. تبقى آكس .. وموش حل هكة .."
"يعنـى ... ؟"
"كل حد على روحـو .. يزّى .."
"باهى نصوحب باش ترتاح ؟ وهانى معاك صديقة .. يزى .. "
"وشنية هالصاحب لى باش تخرج معاه ؟"
"حس نتونّس بيه .. ومخدة نعنقها .. وحاجة نلهى بيها روحى عليك .. "
"و مبنك فالصراحة يا بايبى ؛ أنّستك بيه عاد .. آش مزلت تندب بيّا؛ شوف شــيراز.. وفى الكلام وتوّا بدينا نغلطو .. كهو.. يزى"
....
بعد ما قتلى سامحنى .. وطلبت آنا السماح زادة .. حبت نحكيلها حكاية باش ترقد ،
أنـا ما حبيتش .. خفت من تعنيقت الفرش .. خفت من روحى و منها وحياتى معاش فيها بلاصة لتعقيد آخر ..، جيت خارج وهنا فيت قتلـى "كان تفوت الباب . . . أنسانـى .. خاطر باش ننساك"
قلتلهـا "نسيــتك ديجـا" .. سكرت الباب وهيـّا واقفة وراه ..، وزوز نعرفـو .. إلّى هيـّا تكــذب .. وآنــا نكــذب

ببـّــوش بـو مصـّـــة

شـوف ، هـوّا عمـرها ما تكـون نهـاية أي عـلاقة أكاكـة فجأة من غيـر مقـدمات أو فازات دراكيـفاش ، ديمـة فمـة ملامـح الأولى .. و نصيحتـى ليك باش ما ترخسـش روحك {كيمة صار معايا} أول ما تشـم ريحتهـم إجبـد روحك طول ، لا تقـول فرصـة أخرى لا بحكـم العشرة لا راس لنبـوط.. خاطر وقتهـا الطرف المقابل مخنوق منك ويراك حاجة زايدة برشة ولا ينفع فيه لا دواء لا كيّان ، ديجى شطب عليك بالباهى وجوست يستنى فيك باش تزلق أي زلقـة يتسبّل بيها و يخرج ملايكـة ولا حرج عليـه .. ،
أولهم آكة الفازات لى ما تتفسرش .. كيمة تعرفها تقرى أو تخدم وحافض الوقت .. وتقلك لا موش صحيح نهار السبت نقرى أما الإربعة ما نقراش أو ستاج أو ما نخدمش ، هي نفسها فازت الأور ليني وتلقاها مادّة خلقتها سكايب .. كينّو الماسنجر جوست يكرهك إنتى ، الأعذار التافهة موش عيب كى تصدقهم .. خاطر على نيتك .. أو 'بهلول' بكيفك ، جوست إفهم إلّى وقتها تخلق فى وقت مافيهش إنتى ، لغيرك .. وبلى بيك .
طبعـا كى إنتى يرحم عمـّى هالفازات تكثر .. والوقت إلى بلى بيك يزيد ، وملى تكون أسئلة تافهة من نوع "زعمة كى نقصوها نبقاو صحاب؟ كان قصيناها نبقاو نحكيو؟ ..وهكاكة" للأسف .. الأسئلة تولى عمايل ؛ بلّى تكون العملة ، ما تلومش روحك ، ما تعدلش ، ونرمال ، موش خاطرك يرحم عمّى و قصتها معاك بطريقة غير مفسرة ، لا ،
خاطر فمة بنات هكّة ، فمة بنات ما تشبعش تحب العينين الكل عليها ، تحـب حتى وهي معاك تعرّى وزين لولاد أخرين ما تعرفهمش و تحب روحها "ساكسى" وآكة الفازات الكل، خاطر فمة بنات من أول نهار تبدى فيه معاها تبدى تستنى فيك باش ترميها وكى تطوّل ترميك هيّا ؛ هكّة .. ما تستغربش عقد النقـص موجودة وموش ذنبك إلى وقفت على سبخة ، موش ذنبك كى تعطى فرصة للّى ما تستاهلش و موش ذنبك حلمت مع إنسان مالقاش الخير فى روحو ، باهى سيب علينا وهاو الأهم ،
إنسانة هكة .. تحب تلعب بالغورة، حتى بعد ما تقصوها باش تبقى تبربش تبربيش شماته ، جوست باش تحس عندها قيمة كي تغير إنتى وقت تحكيلك على مشاريع و مخططات و تحسك إلى سى بون كل شيئ وفئ كل ما يضربك العصب من كلامها و تفسرلك لى ما فماش علاش هالغيرة ،
نصيحة وحدة ليك ،
إبرد .. إبرد كيمة بردت هيّ عليك و كى تموت قدامك قلها "بون سوارى" و تعدّى ؛ هالنوع لا يستاهل حرقان أعصاب لا معزّة لا قيمة لا قدر ، وكان صعبت عليك ؟
تذكر ، تذكر إلى وقت قررت تبعد عليك حسبتها بيناتها وبين روحها وقالت طز فيك ، إلى وقت طفاتك و خلقت وقت الغيرك تخيلت دنيا بلى بيك ورضات بيها ، إلى وجودك من عدمو ، لذى ؛ إبرد .. وإفهم إلّى حتى كان ماكش غالط و ما تستاهلش لى يصير فيك ، عادى .. تاو نهار تلقى لى يعوضك عالكل ^^

{ملحــوظة: هذه الحالة المتعبة.. فمّا منها عند الرجال زادة؛ عفوا؛ قصدى الذكورة}