خــارج عـن المــوضــوع : " شجــرة الفــل" {2}

السكات .. وسيڨارو يرجع بيّا تّخمام .. نسرح معى خيط الدّخان ليّام تعدّات .. وياخونى الوحش لخيالك .. فى وسط هالسكات نتفكّر كيفاش كنت تتكّا عندى .. نحكيلك فى حكاية من الخرافات القديمـة.. والنوم غالبك وإنتى تحب تكمل تسمع إخّرها .. تنسنيس بنات .. تولّى كالبنّوتة الصغيرة ... وإنتى تسإل شبيه عمل هكة .. شبيه ما عملش هكة .. شبيه هذا ساقط .. هذا ياسر محلاه.. وغادى فين تقتلنى الغيرة.. حتّى من بطل قصّة ما فمّاش منّو .. نولّى نبدّل فالأحداث .. وكيفاش ما تحبش نغيـر ياعمـرى .!
يسرح بيّا تخمام وياخونى الوحش ليّام الصّغر لتعدّا .. وقت كنّا صغار نقراو .. نتحاسبو مع الدّار بالدّينار .. كان موش بالفرك ! كيفاش كنّا نلمو حق قهوتنا .. و نفضلو منها حق هملتنا .. كنت نخسايب مشكلتنا فلوس .. تعرف .. ما توحشتكش ، أما توحشت حلمة حلمتها معاك و بنيتها فى خيالى .. ساسها إنتى .. دار الكرئ ولّات ملك .. وشيئ .. حاس إلّى ما عملت شيئ بعدك .. قدّاش ياخونى الوحش ليّامات هملتنا مرسكيين فى التران .. أيّام التمعشيق على بحر الزهراء .. و تاخونا الحكاية نلقاو رواحنا وصلنا حمام لأنف و مافقناش بالرحلة لعملناها .. بين بوسة مسروقة و نبزة و تحميلة .. قدّاش كانت عنّا حكايات .. ليل و نهار نحكيو .. و قد ما كبرنا و زدنا فحجة فالدنيا .. تعلمنا السكات .. نفس السكات إلّى فى هالخلاء .. آش خلّانى نخمم فيك .. تتفكر أيّام التاكسيفون ؟ و آنا نطلب كى تهز أمّك نعديلها بنت حومتى "يسرا" المشجع الرسمى للعلاقات العاطفية .. وقدّاش كنت تغير منها .. أيّام كنت نتربع فى تاكسيفون و إلّى يتعدّى من ولاد الحومة نحيلو 100 .. 200 .. فمّا إلى يفهم روحو و وحدو يجى يرمى فالتاكسيفون الصرف .. كنت نخسايب مشكلتنا فلوس .. أيّام خيط الفيكس يشق الصالة .. و آنا نحكى و إنتى تعبّر ..  و قد ما كبرنا و زدنا فحجة فالدنيا .. تعلمنا السكات .. تتفكر أيّام الباك ؟ .. أيّام كانت حلمتنا أكبر منّا .. و فرحتى كى تتفكرى بحاجة من النصب .. نحس إلى تخمم فيا و تتفكرنى .. قدّاش توحشت نحس آكة الإحساس .. كان تقرى .. راك أكيد تقول "ملّا وجه فقـر" .. ماك تعلمت كل حاجة تحسبها فلوس .. أما فمّا حاجات ما تتشراش .. قد ما كبرنا و زدنا فحجة فالدنيا .. تعلمنا السكات .. و زاد البد كبر كى ولينا ولاد فاك .. هنا كبرنا وغادى فين .. تحلّت العنين .. 40 معاش تكفى حق تكسيات .. مقياس النجاح مقياس لبهيم "دار و كرهبة" و المستقبل ما يجى كان معى واحد مترسم .. موش واحد كيفى وقتها نقرى .. وكيما تراها إنتى بطّـال .. إنتى تحب تعيش .. تخرج و دّور .. تسهر و تشوف .. وآنا ضروف إقتصاديّة تكح .. و خوّاف .. إي خوّاف .. ما نحب يراك حد كيما نراك و ريق سهريات منحبّوش خاطر نحب نسهر معاك وحدى و تكون ليا ما قسمك بالعينين حـد ! خاطر فى وسط كلمة مرمية و إلّا خزرت تبزنيس عارف باش تكمل التصبيحة فى بوشوشة .. وإلّا أقرب جويور .. هنا وين بدات لحروف تتبدل .. تعرف .. يمكن كملت معايا بأمور عشرة  ... وإلّا خاطر الدّار عرفو الدّار .. أما نستعرفلك بإخر حكاية .. وحدة مالـ حْكَايَاتْ إلى مَا نَجْمُوا نَحْكِيوهَا لْحَـدّْ ..
من صغرى نتفكر حكاية .. لمّة مزيانة ، كل نهار صباح معى ريحة القهوة و صوت فيروز فى الراديون الصباح .. وصوت ممّاتى "حليمـة" يرحمها .. إلّى حكاتلى كل حكاية حكيتهالك وإنتى عندى باش يجيك النّوم ، نتلمّو العايلة على الطاولة الزرقة بحذى شجرة الفــل إلى مونستنا بريحتها .. آش خلّانى نحب الفل خاطر ريحتو مربوطة بذكرى طفولة .. حبـّى لشجرة الفــل هوّ حبّـى للعايلة ودفاء آكة اللّمة .. هوّ صوت ضحكت أمى صباح .. هوّ حبّى لأمّى لخالتى  لبابا لخالى عمتى عمّى ...
هوّ حبّى ليك قبل ما نراك .. و تعرف .. كيفك كى شجرة الفــل ، الزّوز تحبّـو الوهرة ، الزّوز تخنقو أي حاجة بحذاكم تمد عروقهـا .