إستـــرخــى

تعلى حيوط مشاغل الدنيا وتزيدنا بتعبها، تحصرنا، عينين الناس، الحكايات القديمة وخوف غدوة، تقوى الريح وقد مايعلى الموج كون أقوى، كون حجرة منارة تكسر كل موجة تحاول تتجبر أوتتكبر، وقد ماتعب يزيد تذكر إلى الراحة بعد التعب أحلى، قد ماتعلى حيوط اليوم هدها بالضحكة، وإذا شيئ مايستحق فالدنيا؟ مالة علاش تخمم؟ إذا اليوم كى غدوة؟ علاش تحرق فى عصابك.. تى سيب عليك وبيع بضحكة، آنا معاك وكيفك ونزيدك فوق هذا متونس بيك، إيجا.. نوريوهم إلى أحنا هكة، بلى ماسكوات وضحكة صفرة،إلى ضحكتنا مالقلب موش أفلام، أضحك وبيع بضحكة ,
إيحا، تى إيجا عاد نفسرولهم الدنيا، نفسرولهم إلى تتعاش بهبالنا وبلادتنا والضحكة موش للتصويرة، إلى البلايص المزيانة بناسها، إلى تتعلم تسامح روحك قبل ماتسامح الناس ومايهمكش لا فلى صار لا إلى تقال، إلى لحضة تعيشها لحضة جديدة، إسئل روحك على كل حلمة حلمتها بدلتها بتنهيدة،زعمة تستحق؟ سيب عليك من ماضى مشى وإحلم حلمات جديدة، عيش اللحضة وأصنع الفرحة من حجات بسيطة،أضحك على روحك مع روحك وأبعث العالم بكل مافيه،خاطر بيناتنا.. شيئ مايستاهل وشيئ مايستحق، أخطاك من تخمام الزايد ورتح عقلك أرحمو وإفهم الدنيا بسيطة,
الكلام ساهل؟ أي، والفعل زادة، يزى من لوغت تاو نبدى غدوى دافن روحك بالحياة وتمنى فى روحك بنهار جديد؟ حد ماسكر عليك كان روحك، حد ماحرمك كان روحك، حد ماحبسك وبكاك كان روحك، تعلم خوذ بضحكة، خوذ موقع المتفرج وعاود شريط حياتك، راضى؟ هذا إنسان تبكى عليه وإلا هذى حاجة باش لها الدرجة تغيضك؟ نضف قلبك لكحل وأبدى من جديد، من توه ومن غير ماتحكيلى حكاية غدوة! نحبك تصنع الفرحة لروحك قد ماتعبتها عوضها، دللها حتى بحجات بسيطة، ود روحك وإفهم، إلى ماتعبت كان جرايرك وماتدفنت كان جراير خوفك وضعف إرادتك، فيق، يهديك!!!
السعادة.. الفرحة، عمرها ماكانت حاجة صعيبة، خوفنا مالتغيير هو إلى قتلها، ربطناها بإنسان وإلا بلاصة.. ونهار إلى تبدلت حسينا تعاسة، غلطة كبيرة أنك تصدق أنو سعادة مربوطة بحاجة، السعادة بسيطة ومخفية فالتفاصيل، بين حكاية قديمة وأحلام غدوة، بين نجاح أوإكتشاف جديد، فن أومكان أوإنسان أوحتى ..فى نفسك، الفرحة تنجم تصنعها لروحك بلحضة يهزك فيها التخمام تذكر روحك إلى محلاك، إي محلاك ..غيرك مزال يكذب على روحو وإنتى.. فهمت الدنيا كيفاش تتعاش



ولا شئ .. يستحق التركيز ^_^

والحــالة تعبــانة يا ليلـــى .. .

ـ أحكيلى.. أحكيلى أي حكاية.. صوتك يرتحنى، أحكيلى حتى يهزنى النوم.. حتى يسرقنى الموت، أحكيلى عالمحبة..
ـ مانجمـش .. بالى مشغشـب ومانيـش قـد بعضـى ..
ـ شبيـك..؟
ـ لا.. شيـئ..
ـ هكة تعلـّمت تخبـّى..؟
ـ متقلـّق شوية.. أزمة وتتعـدّى
ـ من شنيـة؟
ـ..لازم تمرج روحك بالدّمـار الزّايد؟
ـ إي، أحكى ، إيجا أقربلى و أحكـى
ـ تعبت، تعبت وتعـب بيّا قوى.. نتصنّـع فالضّـحكة عنـدى برشـة تى نسيت مطعـم الفرحـة.. تعرف شعرك محلاه تقصو نقتلك !
ـ أحكى ماتبداش تلحّـن
ـ توحّشتـها.. وبرّغم هانى معاك ومحلاك أما نخمـم فيـها..
ـ مزلـت تحبـها ؟
ـ أما.. توحشـت روحـى وقـت كنـت معـاها.. يمكـن توحشتنـى.. إي توحشـت روحـى! هذا مـوش آنا هـذا دراشكون مانعرفوش.. توحشتنى وتوحشت ندلل روحى ونعيش بهبالى لاهمنى ناس لانقرى حساب لكلامى لاهمنى غدوة.. نتقلق.. نضيف روحى على قهيوة من يدي.. وإلا نخرّج روحى ندور.. نحكى لروحى على حلمات نسيتها، نقرالها ميساجات قديمة وإلا نهزها فين قريت.. وأكيد دورة عالبحر نرجع إنسان جديد.. .
ـ علاش؟ توه شبيك؟ أحكـى..
ـ حاس روحـى مخـنوق ناقـص حاجـة مانيش عارفهـا نفركس علـى حاجة نسيـت فيـن حطيتها وتذكرت إلى تكسرت وإلا تهلكـت ..  حاسـس روحـى ضايـع .. توه؟ روحى معاش متاعى! معاش فما نوم ومانتذكر فى اليل الطويـل كان عاركنا.. خلى آكـة نبزات الكبيـرة.. ياحسرت كى كنت من كلامها نعيش وعلى صوتها تتنفس، ليلة بلا بيها موت.. توه ، أدمـت الوحـدة
ـ كمّـل أحكـى ..
ـ حاسـس روحـى كأنّـى مـت.. وما جاء حد لدفينتى كأنّى بلى قيمة بلا معنـى وجود عبثى عدمـى ..غلطة مستمرة على طول سنيـن عمرى.. حاسس روحى متروك ومنسى، لا ! أكثر ، حاسس روحى طفل صغير كى جاو دارهم خارجين وحب يخرج معاهم قالولو: "برى بدل شلاكتك" لبس سبادرى بزربة بفرحة كى رجع مالقى حد.. مزال يستنى فيهم باش يروحو لتوه.. قاعد عالعتبة.. حاسس روحى مكسّـر كى المراية.. قزاز يلمع من بعيد أما حد ما يمـد يديـه لا يتجرح.. تعبت، من كل شيـئ، من نفس الحكايات إلى تتعـاود.. من كل صبـاح كى خوه من كل ليلة كلى قبلها.. من حلماتى إلى ماعنـدى معى شكون نعيشها ولا نحكيها ! تعبـت.. من كل مرة نقول لا موش كى قبلهـا ولا حد يفهـم! تقول نحكـى لوغة مايفهمهـا حد! قد مانعيط نفسر نصيـح.. كان صدى نفسـى مونّـسنى.. غربـة.. ماتحبـّش توفى.. عزلة.. لا حد لها..حاسس إلّى البرد المـرّة هذى غلبنـى.. .
ـ باهى يزّى يا "بائعــة الكبريت" ..هاك عندى تدفـئ بتعنيقـتى..
ـ تعرف..ياسر متعبك معايا..
ـ إممم.. تعبك راحة يا سيـدى..
ـ لا.. هكّـة مانتفاهموش.. لوقتاش باش نبقاو هكّـة.. تعرف إلى باش يجـى نهار وتبعد.. تعرّس.. وقتها مزلنا نجمو نبقاو صحاب؟ مانحبـّش نخسـرك صحيـح أما.. نهار جاي..
ـ أششش.. أحكيلى يعجبــك هكّـة شعـرى، خلّـينا فاليـوم و غـدوة فى غـدوة
ـ لا ، إمالة خلينا فى تـوّه، وتوه أنا شاهـى قهــوة
ـ كهو؟
ـ وتـارت سيتـرون
ـ كهو؟
ـ إممم.. كهـو
ـ صحّيـت يا ملايكـة مالة قوم طيّبها وحدك القهـوة والفريجيـدار قدّامـك
ـ هههه.. تعرف.. خلاف كل شيئ توحّشتـك..
ـ كهو؟
ـ هانـى فالكوجينة كان تحب تعرف أخلـط



ـ موش كان القهـوة تغلـى .. حاسّـك تقلّقـت كى حكيتلـك .. هكّـة تندّمنـى؟
ـ لا .. أما ..
ـ أحكـى ...وإلّا تلومنى وإنتـى إلّى تعلمـت تخبّـى ..
ـ مانيش باهية فالكلام قـدّك ..
ـ ميسالش .. آنا نحـب نسمعـك ..


أول مرّة تحكى.. حكات برشة حكايات.. سمعت كل حرف وقد ماسمعت حبيت نحسسها إلى فهمتها.. إلى تعدى عليّا برشة ملى تحكى فيه.. أما غلبنى السكات، هي تحكى وآنا ساكت بلا حراك كى شمعة وسط الريح خايف عليها تطفى.. خفت تسكت.. هالقلب آش هز ياعمرى وقداش ورى قوتك.. بنوته صغيرة خايفة من غدوة.. من فحجة جديدة، تمنيت نحكيلك ونخلط إلى عندى وعندك و لا موش نقسمو..! ندفنو.

ـ تعرف حبيبى، نخاف.. نخاف تبعدك الدنيا والحكايات القديمة.. خلى الناس إلى تحبـك وإلا إلى قتلتهم الغيرة!
مانجـّمش نخمم فى غدوة مافيهش إنتـى، وبيك.. تعلمت نعيش اليوم، كنت نتنفـس موش حيّـة وإنتى عطيت للدنيا قيمة، نحبك يامغشاش.. نحبك يا  كارثـة، صغيرة نبقـى بيـن يديـك بنّوته عمرها ماتكبر.. نحبك ببلادتك وهبالك والمساطة إلى قريب تجلطنى.. وترجع فيا الروح بكلمة
"توحشتك ونحبـّك.. وماتسئلنيش قداش!"
ـ هو نهـار جاي .. آنا وإنتـى أصحاب وعمرنـا ما نجمـو نكونو أكثـر من هكـة .. عشرة سنيـن توه .. وكان تتفكـر إنتـى إلى خترت أوّل ثنيتنـا، مايجيش توه نبدلـو نوع هالعلاقـة.. إنتى الصاحبـة إلى نحكيلها وتحكلى كى نتعارك مع إلى نخرج معاها.. إنتى إلى شجعتنى باش نعاود من جديد أكثر من ألف مرّة! إنتى إلى تشكيلك إلى مصوحبهـا منّى .. ترضيها وتلوم عليّا .. وسعات ..تكون معاها فى عركها أكثر ملّى وقفت معايا .. ما نجمش نخزرلك بطريقة أخرى ..
ـ تعرف.. أكثر حاجة نكرها هي الإحساس بالعجز، أنك تاخو دور المتفرج وما يبقالك حتى حل كان إنك ترضى.. قدام إلى مخبيه المكتوب ..التنازل والتضحية وحتى الحب معاش يكفيو سعات، إذا الإنسان إلى حاشتك بيه ماقدرش ومافهمش معنى "العشق حد التوحّـد" ..وقت إلى مايهمك فالدنيا شيئ كان هو، وهو مزال يبجّـل "حجات" عليك ..
خاطر تحبو تبدى كاتـم ساكـت، تتفرج فيه يبعد.. يسرقوه منك بكيفــو وغادى فين معاش عندك الحق تتكلــم
ـ عمـرى ما بجّلـت حاجـة عليك وإنتـى تعرف ! وتهنّـى حتّـى غيرك مافمّاش ! تى تعرفنى أكثر من روحى نستغرب منّك هالكلام!
ـ إيجى نحكيو بصراحة، لوقتاش باش تبقى تجرى لناس ماتستاهلش ماتقدرش ماتترباش وماتفهمش حتى مالكلمة العاشرة، بصراحة؟ يزى من حرقان الأعصاب، إلى يحبك مايبعدش؟ ماينساكش؟ مايبدلكش؟ مايخونكش؟ مايغشكش؟ مايخليهاش بيك؟ ما ما ما.. تى طز! وجد عليك إلى فماشكون تحبك قدّى؟ تى فيق! فما إلى تجى طمع وإلى تحل فالعقـد متاعها إلى شهوة إلى تحسب وإلى تستغل فيك حتى باش تخلق غيرة فى إنسان آخر وإنتى جرد وسيلة، مزال العرض متواصل.. سنيـن نتفرج ساكته وماعاد نجم نعدّى .. !
ـ والحـل ؟ نخرج معاك ؟ لا ميسالش ما نحبش نخسرك ! نخسرك هكة خيـر ملّى نخرج معاك ونخسرك ، مدام هكة خاسرك وهكة خاسرك ؛ خلينـا صحاب وتفارقنا موش آكسوات
ـ شنيّـة إلـى ممكـن تتمنّـاه أكثـر من هكّـة؟
وحـدة تحبـّك وتخاف عليك، تسمع كلامك وتتبنـّن غيرتك، تتوحش صوتـك، ماتسئلـش كى ماتنجمش تحكـى وماترتاح كان ما ترضّـيك.. قلّـى كان نحكى على حاجة موش موجودة..؟ يمكن تستغرب صبرى عليك ...أما خاطر مالقيت حتى حـل لقربك كان هكـة.. وشكون قال إلى لازم نموتو باش نمشيو للجنة!؟؟ وكلمة منّـك.. تعيشنـى الجنـّة ... قولها ! أنطقــها !
ـ خليـك تحبنـى .. سامحنـى أما ياسر مخّر توّه .. أصلا محطّم ومعادش نجم ندخل علاقات ... خلّى عاد معاك إنتى!
ـ ... باهى سى المحطـم .. هانى سكت ..



ـ القهوة فاضـت .. قلبـك معبّـى
ـ "آآه ..يا قلبى ياغارق، وقد ماعفسوك وشاطوك، كورو بيك ومرمدوك وطفاو فيك سواقرهم.. ومزلت ماتعلمتش؟ مزلت تسامح؟ ..تى زعمة فما شكون يسامح قدك؟ .. زايد.. مانتعلمش ..مانترباش "

هي تحكى وحدها.. وآنا نسمع فى سكات..

تعرف حبيبى.. كيف كنا صغار.. كنا نرقدو عالقاعة.. نحسبو رواحنا ميتين، توه.. ناقفو على ساقينا.. حاسبين رواحنا عايشين.
قداش يضحك اليوم والبارح، أكهو عاد ماو كثر الهم يضحك.. أما حتى ضحكتك مبنها.. هي إيمانى بغدوة معاك .. إلى فى الدنيا حجات منك تستحق نقوم كل نهار باش نعيشلها.. حتى ولو أنك موش ليّا .. تخلينى نذوب فى تفاصيلك البسيطة.. من غيرتك لخبيتها.. لبلادتك لتوحشتها..
وقد مانقول نحبك.. لا كلام يوصف.. لا يعبر حتى على وحشك .. علاش الدنيـا هكة ! وقت جات فرصتى معاك خفت وهانى نعانى فى غلطت خوفـى لتوه .. تفاهة أنى نستنى ميساج منّك عارفتو موش باش يوصل، أفكار صبيانية أنى مزلت نستنى تذكير منّك بمحبتك ليـا .. خاتر موش المحبـة إلى نستنّى فيها، تقول إنتى علاش المرج!؟ خاطر مانجمش نحيك من بالى .. نعرف إلّى الحياة كلها مشاغل.. مهاش مقارنة بالأولويات أما.. سطر.. أو حتى كلمة وحدة تراها تافهة تنجم تبدل خط حياة..، أبسط حاجة منك فى عنين إلى يحبك حاجة لا تعوض وقيمتها أكبر ملى تتخيل لذى.. سايسو فى تصرفاتك، يهديك وحدة وحدة.. خاتر إلّى تحـب بالحق ما هياش باش تعرف تتصرف معاك، حتى لو كانت "خبيرة" فى العلاقات الإنسانية.. إذا حبّتك تنسى المنطق والمعقول.. يمكن تراه خنقة ومرج وغيرة وشك بلا سبب أما هذاكة خوف.. خوف من غدوة بلا بيك موش شماته موش بلادة موش تحكم! .. وعندها حق؟ قلى.. من وقتاش الدنيا عطاتنا حاجة حبيناها؟ من وقتاش الدنيا باهية؟ ناسها باهين؟ من وقتاش تكمل الحجات الحلوة؟ وقتاش وقتاش وقتاش..؟ تحبها ماتخافش.. تؤمن إلى بالصـّدفة الدنياـ معاك تتبدل حلوة وماتستحقش تستحفض عليـك! .. يمكن.. إذا المحبة عندك ساهلة..يمكن.. وقت الكلام معاش يفسر
ـ يزّى يهديك .. عارف إلى ضالمك معايا .. أما موش هكة تحكى ! ناقص آنـا باش نجى نكره روحى ..؟ إنتـى إلى نرتاح عندك وتسمعنى .. وقت الشدّة والفرحة .. صحبة وعشـرة ومحبّـة .. أما سامحنى موش المحبـة من نوع إلى تحب عليه إنتى ..
ـ باهى شناقصنى ..!!؟
ـ ..ما ناقصك شيئ ..سعات نحسك أحلى من أنّك تكون حقيقـة.. أما "القلـب وما يريد" وآنا لا أريد من أصلو.. ما تخسرنيش فيك ..
ـ ... هالدنيا غريبـة عجيبة ! آنا قدام عينيك ومزلت تفركس على تحبـك ..
ـ إي .. أحـنا صحاب .. وحتى كان نجم نرجع بالوقت .. مانبدل شيئ فى حكايتنـا ..
ـ آنـا نبدّل ..
ـ كيفاش تخليها تكون ؟
ـ إمممم ..نسكت خير..
ـ على راحتك ...
ـ تعرف آش نحب توه .. نحبك تحكى أي حاجة .. أحكى ..نرتاح فى كلامك، نحسك هونى..عندى..،

حبّــى.. أحكيلـى حكايــة.. حتـّى يجينـى الـنّوم.. وتهزنـى الحلمـة..، أحكيلى حكاية.. حتى يسرقنـى الــموت.

هــــدنـة

تتحل ..بيبـان السمـاء وما يبقـى كان السوفونير ، الدمعـة تشيـح وتفسخهـا الضحكـة ، لاحال يدوم وشيئ مايبقـى كيمة هو، تتحـل .. نعرف إلى الصبـر بيك طال ونعرف إلى تقول بينك وبين روحك إلى الصبر وفئ، أما بيناتنا ، هاك طلعت أقوى ملّى تتخيل ، إنتى نفسك فاجئت روحك بلى عديتو صبرت عليه وخبيتو ، إي نعـرف ، يزيك مالهم والكبّـى وكان كاتب حاجة تاو تصير ، علاش حرقان الأعصاب الزايد وخوف من غدوة وبعد شوية ، بيـع بلفته وإجا معايا ، هيّا تجـى ؟ نستدعاك على لحضة تسمع فيها عزيز عليك عندك برشة ماكلمتوش ، أكثر إلى تعبت فى حياتك وناسيه شوف عندك قداش ، ترميه فى أول مشاكلك وتطلب منو أكثر وأكثر وأكثر ومزال صابر معاك ، إي ، روحـك إلى تعبتهـا بتخمامك بتعبك بسهرك بتعبها فلّى مايستاهلش وإلى يسوى أقل منها .. .
إسرق هاللحضة ، أخزر بحذاك ، شوف إنتى فين وفاش تعمل وقلّى .. هذا إلى حبيت عليه؟ هذى حلمتك ؟
ما تخزرش للناس ولا تخمم فيهم، صلّـح قعدتك وخوذ بوز ترتحك ، أخزر للسقف للسماء للحيوط للقاعة ، حـس إلى إنتى موجـود وتوه .. أخزر لروحـك ، أخزر ليديك ، آقف قدام مراية وأخزر لوجهـك ، إسئل روحك إذى متعدى فالكياس تعرفو هالوجه ؟ لا مانيش نسئل على زينك ! تفوه للى يخزر للقشرة ونسى القلب! طز فالطامع والشاهى والرخيص وإلى يجرى عالمنظر ! طز فالناس ! هذى لحضة ليك ولروحـك ، تكـّى .. إرخـف عصابك وقبلها دلل روحك بقهوة ، سويڨر وإلّا حاجة حلوّة ، وخمم .. شنية يستاهل هالتخمام الكل ؟ شنية الفرحة بالنسبة ليك .. ؟ رولاكس ، وتكّـى .. غمض عينيك وإسرح .. تفكر بلاصة مزيانة ترتاح فيها وشوف قداش عندك مامشيتش ، قداش لهاتك الدنيـا على روحك ومارتحتش .. قداش ملى وعدت روحك باش ترجع ومارجعتش .. تخيل روحك غادى .. حط موزيكة حلوة ، وإلّى خليها أزين بالسكات ، شعـل شمعـة وإلّا حل الشباك ، حس لهواء على خديك .. حس اللحضة .. لحضة راحـة ؟ لحضـة سلــم معى روحك وشنية الأحلى .. رتب أولاوياتك من جديد ، نحى الزايد وأعطى ثيقة فى روحك والوقـت ؛ بالوقت كل شيئ يجى ، أحكـى ، غنّـى ، صوّر ، أعمـل حاجة تذكرك بالحضة لى تعيشها توه ؛ وكل ماتحس روحك تخنقت تفكر هاللحضة ، إلى حد وشيئ ما ينجم يحكم فيك ولا آش تحس ، السعادة بسيطة ومخبية فى التفاصيل ، تنجم تكون فى صغير عرضك يضحك بالصدفة ، موسيكة جديدة ، إنسان عزيز عليك مانساكش ، كبر السماء ، موج البحر ، صوت الشتاء ، شمس الصباح ، صوت أمك ، خواتك ، عايلتك .. الفرحة كى هاللحضة تفهم إلى أنا نكتب ليك إنتى .. {مبنهـا آكة التبسيمـة }
ريت قداش حجات حلوة ؟ وتوه ، بكل ثيقة فى روحك نحبك تعيش ، ماتعدل على شيئ ماتعدل على حد ، خاطر فى لخر "إلى حبـك ما بنالك قصر، وإلى كرهك ماحفرلك قبر" طز طز طز فالكل وإلى موش عاجبو يطرشق !
عيش لروحك وأخرج من قفص المنطق والإيتيكات وأبعث العالم ! إلى يستحق تاو تلقاه معاك بلّى تكون ، إلى موش عاجبو هذيكة أمورو ، كل مايزيد يحرق عصابو أضحك عليه، أضحك خاطر بأنا حق يفرض عليك كيفاش تعيش ؟ أضحك على سيب روحو وتلها بيك وأعمللهم عرض بالذمة ، وريهم إنتى على حقيقتك وروحك القوية ، هكة نحبك ! ونزيد نحبك ! وأحلـى يا حبـى .. كان تتعلم تحـب إلى تعبتهـا معاك ، تحـب روحــك .

ذكــــرى .. .

تتبدل العادات والتقاليد ، إلى كانت بيناتنا ، أوقات التليفونات وخرجـت العيـد، كى نختارلك لبسة وتختارلى لبسة ، المرج باش نسيب إلى فى يدى ونبداو الرحلة، كى كنا نخرجو مالصباح ندورو من دار لدار، نهنيـو العايلة ونتلمو فى الدار الكبيرة ، صحافـى العصيـدة ونذوقو بعضنـا .. أناهى جات أبـن .. والوحلـة بين صحفـة أمـى .. وصحفتـك إنتـى ..، هنـا وحلـة بالحـق! باش تخيـّر شكـون على شكـون ..!؟ أما اليوم ، الوحلـة إلى رتحـت منهـا .. توحشتهـا .. .
قعـدة الصالـة فى دار ممّاتـى ، وإنتـى تلعـب معـى أولاد بنات خالاتـى .. نتفكـر كى حليت ساكك وفرتو على كعبة بابيى.. تمسـح فى فم ولد بنت خالتى بلبـز روحو بالعصيدة .. خالى يحكـى معايا وأنا سارح فيك .. كى حطيتو فى حجرك .. وبديت توكل فيه .. تهز المغرفة وتقلو طيارة !! أيّا جات .. يممممم.
نتفكـر ضحكتك مع أمى .. الحكايات إلى مانحبكش تسمعهم من صغرى،تصاورى صغير ، خوالى وخالاتى كى يحكيولك فضايحى القديمة .. أنا نبدل فى الموضوع وإنتى تحب تعرف أكثر .. تتحلّف فيّا كى يحكيولك على كارثة .. ومشمتهم خوالى تقول ما ينساو شيئ .. !
نتفكر العيد إلى فات .. حـد ما سئـل عليك مالكبار وحسيتهم يحبو يعوضونى عليك ، فيبالهم إلى إنتى فالعيد جرد صحفة عصيدة والكل جابولى صحافى! أما الصغار .. فقدوك .. يسميوك "تاتّا" .. مانساوكش، كى سئلو عليك سكت أكيد وبربّى قلّى كفاش باش تفسر لصغير عقد هالعلاقات والروابط الإنسانية .. ، مروّح بقداش من صحفـة .. أما .. تعرفنى طماع وغاضتنى صحفة من عندك إنتى .
تتفكر كى كنا صغار ؟  وقت تهربلى صحفتى من داركم .. كى نطلب نحكى معاك وإنتى تزين فيها ، نتلاقاو بالسرقة قريب من داركم .. بوسة العيد وكره العطلة إلى تحرمنى منك وتخليك تشد الدار، حكاياتنا إلى ماتوفاش وصحفتى من عندك مونستنى فى ثنيتى ، واليوم هانى لتوه شاد الفرش .. تاليفون للعايلة ، ميساج للأحباب ، ويزى ، خطانى من خرجة زايدة وأسئلة ماعندهاش إجابة ! خطانى من قعدة تقول عليّا قاصد خاطبة ! تخرنين عالعرس وقيّت تلم روحك وتركح ساقك معبوكت كل مناسبات وأعياد!
تعرف ، نحكيلك وعارفك ماكش تقرى ، كيما عارف إلى ماكش باش تطلب لا تسئل لا تقلى حضرتلك صحفة ، ويمكن هكة خير ..
فرحتلك كى قدمت فى حياتك .. بصدفة ريت تصاورك ، سمعت حكاياتك وعلى أحوالك، فرحت لفرحتك ، وأكثر من هكة تهنيت عليك،
عيدك مبروك وسنين دايمة ، لامحالة مانيش حاسو عيد .. حاسو نهار أحـد ، وقـداش نكره نهار الأحــد!
أكثرمن كرهى لنهار لحد تعلمت كره جديد ، كره الأعياد ،
قلتها ونزيد نقولها ، خاطر فى هالوقت تحس روحك وحدك ، وقت ناس تهنّى بعضها وحد مايتفكرك ، وقت كل واحد جنبك ينوقز تاليفونو يهز يهنى ، يضحك .. وإنتى تاليفونك بارد ساكت .. وقت إلى تسمع واحد يحكى يسب فالخدمة خاطر خلاتو يقعد كان سويعتين معى عايلتو.. نحسدو عليهم عالساعتين .. كى يعارك شكون طلبو قال شنية ما يطلب كان مالعيد للعيد .. نحسدو .. خاطر ماطلب حـد ، وعادى ، يمكن هكة خير .. ممكن، كمل إلى يحبـك مايستناش عيـد .. هكة فيبالى ،
بنسبـة لنهار اليوم ، ورقـة يومية أخرى تتنحـى ، بنسبة ليكم أنتومة عندكم الحـرية باش تختارو كيفاش وفين ومعى شكون تعديوه ، أما نحبكـم تفرحـو .. موش بالعصيدة! بالناس إلى طيبتها على خاطرك ، إلى تفكرتك وبجلتّك على غيرك ، حس بقيمتك وأعرف إلى ماكش وحدك ، وإلّى المحبـّـة .. هي النّاس إلى تتذكــرك ، حتى كى إنتى تنسى روحك،

عيدك مبروك وسنين دايمة ، مافيها باس تطلب تسئل ، تعيّـد، فما ناس، ممكن تحياها كلم منك، فما ناس، عيدهم مايولى عيد كان .. بكلمة منـّك ^^ .