أزرق

وستنيتك، فيبالى فرحتى إنتى وحلمتى إنتى ووجودك كل شيئ حبيت نعيشو ونعيشلو.. صباحاتى تبدى منّك وبيك بشوية بلادة وشوية قباحة مافيها باس المهم نحل عنيا نلقاك عندى.. خبيتلك منّى وخفت نخسرك وأكثر منها خفت عليك، خفت عليك من هالعالم حتى الخوف كلانى وحلّفتك تبقالى وحكيتلك قداش الدنيا جبدت بيا.. قتلنى البعد ورضيت التعب وقلت ميسالش، إخرها عندى، واسيت روحى بحلمة فيها ديسمبر دافئ ونوفمبر نطفى فيه شمعة تكون إنتى كادو عيد ميلادى.. كادو السّماء ليّا..

علقت فيك حلمة غدوة ونسيت لى تعدى نسيت التعب نسيت لى مشاو نسيت لى باعو نسيت لى هجرو ونسيت حتى لى حبّو.. وقلت يهون.. أكيد بعد التعب راحة و تخيلتك الرّاحة لى ستنيتها يا تعب قلبى يا إخر سطر نسيان يا ألف حلمة يا سكات طويل يا عذاب الليل.. يا إنتى ..

فيبالى الأزرق لون الفرحة وعلقت فرحتى بيك قلت كبر البحر كبر السماء كبر جوانحى بيك.. وقلت الحصرة لى حصرتها لروحى فى بعدك وقت ماعاد نقابل حد كينّى من ورى شباك أزق فالمدينة العربى.. وإلّا سيدى بوسعيد.. شباك مزيان وراه ألف حلمة وراه إنتى وحكايات مزيانة وضحكة مالقلب موش للتصويرة .. أزرق .. حبيت الأزرق خاطر تحبو .. وحلمت .. طلع أمارة متاع طيحة ضربة توجع .. أمارة فى بدنى تتزاد للأكسيدونات لى كلاتنى وطيحات الصغر وقت نزلع ركايبى أما وقتها كل طيحة تعلم .. تنجم تقلى آش عندى منك نتعلم ؟

.. أزرق .. يخلينى ما نجمش ناقف قدام المراية .. كى ضربة فى وجهك .. تحشم بيها ..، علمتنى نكره وجهى بدنى خدمتى مكتوبى وكل شيئ نحس فيه منّى.. علمتنى نكره روحى أكثر .. 

كرهت المراية حتى غطيتها وبعد كسرتها ، كرهت وجهى معاش حامل الناس تخزر فى وجهى وكرهت الأزرق اللون لى تحبو إنتى وكرهت نلبس كيمة تحب إنتى وكرهت حوايجى لى تعرفهم إنتى وكرهت بدنى .. تتذكر وقت كنت تحبو ؟ توا هانا الزوز نكرهوه لا نحبو أنا لا تحبو إنتى ،

ستنيت منك برشة وقت ما نجم نعطى كان شوية .. آش عندى نعطى بربى ؟ نتحير عليك وكى نحسك موش فى صحنك نمرجك ونسيب بلادتى الكل حتى تسمعنى ضحكة فالتاليفون ؟ آش نجم نعطى خلاف خوفى عليك وتخمامى فيك ونكون ليك وحدك بلى قسمة ؟ خلاف تعنيقة .. بوسة وحش موش كذابة .. قهوتين وفطور سعات ..؟ .. شيئ .. من غير لا نسمى لى نجمو ولى ما نجموش .. إنتى حسبتها مليح وأنا لى مفرخنى مزلت ما نحبش نفهم ، 

ولومى لروحى موش ليك .. وبره تعنيقتى دافية وبره ما نحبش فيك وبره نتذكرك كل لحضة وقبل نومى وبعدو وبرى قتلنى الوحش وبره بره بره ... 

نحب نبرد ..

الصّيف يوفى.. وتكمل الضحكة، يجى بعدو الخريف، تتخبى الشمس شوية شوية وتطيح ورقة ورقة من شجرة الفيراندة.. ما جائ الشتاء كان ما بقات عريانة.. كيفى، بلى بيك ولا أصحاب، ڨرسان والكبابط ما تدفيش.. حوايج الصوف ماتنفع شيئ لبرد الروح.. ، دخّانى ونسّى روحى ونكذب كى نقول هكة خير ، تعبت .. تعبت ومعاش نجم نخبيلك كلام أكثر معاش منجم نحفض أكثر بلايص نعرفك كاتراهم تحبهم وحكايات عليا نعرفهم يضحكوك.. معاش منجم ! معاش منجم نستناك أكثر ملى ستنيتك شطر عايش باش كى نحكيو هذا كان واتات وحكينا نقلك مانيش كيفك! بعدك ما عشتش سكرت على روحى وقطعت المفتاح وتخبت تحت الفرش وبعدت.. على ثنيتك.. وستنيتك.. والله ستنيتك وجيتك أكثر من مرّات ونسكت، ما نقولش هانى هونى.. نستناك تتذكرى وقت تتكلم نقلك هانى هنا ، 

معاش منجم... إي .. نحب ننساك نخرجك من عقلى ونطفيك ، نحب نعمل كيفك ونفركس على ضحكتى ، نحب نخرج من هالضلام نحب فرشى يولى دافى نحب ندورها شليلة ومليلة نحب .. نحب نرجع نسكر.. نحب نشرب وما نتذكرش شعرك وقت يهزو الريح ، ما نحبش نتذكر خاطرك ما تستاهلش وإلّا تستاهل ..، مانعرش مع شكون فيكم نحكى يا زوز بنات ، وحدة لى هيا إنتى أول ما عرفتها عسل الدنيا ومحلاك ، وثانية إنتى لى تبيع كل شيئ بساهل ، تبيعنى وتبيع روحك .. تبيع الدنيا .. ومانحبش نحكى أكثر موش خايف وجاعتك ، خايف نزيد نتذكر .. ،

حبيت أكثر من هكة معاك ، حبيتك حكاية مخبية وخبيت عندك منّى وخبيتلك لليامات لى جاية ، ما كفاك شيئ .. 

نحب .. نوجعك .. قد ما توحشتك ، ونحب ننساك كيمة نسيتنى إنتى ، نحب نبيعك كيمة بعتنى ، 

معاش حامل فى هالبلاد شيئ ووليت نكره ، وليت نكره نخزر لروحى هكة بلى قيمة عند لى عمتلو قيمة ونحب نهرب ، تخبيت بالضلام وخرجت النسوق فى الليل .. نلقى روحى مزلت نفركس على وجهك .. شتاء.. وقريب نثبت فى كل كوبل كل كرهبة كل دار ضوء شباكها شاعل .. نفركس عليك ونضحك على هبالى ، شعلت سيقارو وخرجت للشتاء تحت المطر وقفت وسط الشارع .. تنفخت .. قبل رونبوان الفلوكة .. ، نسب فى المروحين مالسهريات ونقول علاش ماكش معايا ؟ كملت دخانى فالمرسى .. 4 متاع الصباح .. الدنيا خلئ .. روحت .. نرقد ونقوم نلقاك مزلت على بالى .. تخنقت ... كفرت .. نسيت وكذبت وطيبت قهيوة ،  رجعت نقرى فى ميساجات السكايب ، وفرق بين أولهم وإخرهم .. بين يا روحى وعمرى ودينتى .. وبين هاك هونى موش ساعتين لتالى قتلى تصبح على خير ؟ تتبدل الحاجات ومشكلتى ما نحبش نبدل ولا نتبدل ، وإنتى طلعت أم البويا سماك ! 

أم البويا بطبلية بيضة .. تنجح .. عشية وموش عارف إخرها فين ، ليل طويل يستنى .. ومزلت نحب ننسى ومعاش نجم نخبيلك أكثر ؛ تعبت يا تعبى.. تعبت من هالبلاد هالناس ملّى كيفك ولى قبلك .. تعبت منّى .. ونحب .. نحب نبرد ما عينى فى شيئ ، لا نحب نعيش لا نموت .. نحب نبرد .. كهو .

Fear Saison

ديسمبر، هذا لى نخاف منّو، وقبلو خوف نوفمبر وبعدو خوف جانفى، خوف سيزون يعنى ،

ولو أنّو ماهوش خوف وعمرو ما كان خوف أما خاطر مالقيتلوش إسم هالإحساس لى دراكيفاش.. سميتو خوف، يمكن خاطر الخوف حاجة خايبة وهالإحساس خايب، خايب برشة زادة،

نرمالمون إنسان كيفى يحب هالأشهرة، خاطر نحب الشتاء صوت المطر فالليل دخانى وقهوتى مايواتيهم كان البرد ونحب المدالينة، نحب الكيسات الفارغة وركشة القهاوى البنينة ريحة المطر ونكت الماء عالبلّار الضلام وضوء الليل وريحة التراب وحيوط الجير كى يتبلو وأكيد.. صوتها فالليل يونسنى .. وسعات كى تركبلى ونهبط شوندوليى منهم ونشعل الشمع، وقتها نولّى فى دينتى معاش دنيتكم . تقول إنتى هالخوف وإلّا لى نسميه خوف منين جاء ..؟

خاطر وحدى.. وأنا فرحتى ما نحسها كان بالقسمة.. خاطر حتى كى نفرح نحب نحكى نحب نورى شعندى وما نحبش حد يعرف ، موش إنفصام، هكة آنا نأمن إلى إنسانة وحدة وقت تكون ليا تكفينى عالعالم بما فيه ، وحتى القهوة والمدلينة لى نحبهم يمساطو كى نبدى وحدى وريحة المطر تخنقنى .. تدخل للروارى وتمس الروح وتخلخلها.. تقتلنى بتقسيط ممل بليد .. وتخلينى نكره برغم مانحبش نكره .. ونهبل وناكل روحى نخرج من عقلى وقت نتلفت.. وما نلقى حد،

حد.. حتى حد باش تحكيلو تقسم معاه فرحتك تخرنن عليه يزين ليلك وتحس.. إلّى بايت فى فرشك وحدك صحيح أما عندك شكون.. ياخو بخاطرك ويخاف عليك.. ما يحبش يخسرك.. يقدرك.. وهكة يزى موش لازم محبة..

ديجا لى سميتو يعوض على كل شيئ !! وقت لى تلفت وما لقيت شيئ والسكات زاد والموزيكة قوات والشتاء بان ومراول الصوف خرجت .. وما لقيت كان كلام، كلام هزّو الريح كالرماد ولقيت روحى براسى ..

نواسى روحى ديمة ونقول العيب منّى برغم نعرف آش عملت وشنية ما عملتش ، نغمض عنيا ونقول ينعمبووها الدنيا ونحكى لاباس كذابة، وهالقلب تعبى حتى معاش ينجم، سكت.. حتى وليت معاش نجم فحجة جديدة.. معاش نجم نتعرف.. حتى كى تقلى وحدة بتفذليك "راك تعجبنى" نسمعها "هيا نخسرو بعضنا".. نسمع آكة لى كتبتو المرة لخرة فى آرتيكل "أيّا تجـــى"*

وباش نعوض.. خاطر باش تعيش وحدك صعيبة ولحقيقة صعيبة برشة زادة، نخلى خيال لى كانت معايا مونسنى.. 

سعات فى ليلة كيمة هكة نرجع للميساجات القدم نقراهم.. ونضحك.. على روحى أكيد، ونشعل كل مانلقى وعد محبة وإلّا حلمة مخبية وسط السطور، كأنى آكة الصغير لى وعدوه كى ينجح ياخو لى يحب حرق روحو فى لخر نجح ؛ ما خذاولو شيئ، طفاوه نساوه وقعدت فى قلبو .. وهالقلب آش هز، كينى نفس آكة الصغير لى حكيت عليه فى سنة أولى نسيان .. جاو خارجين حب يخرج معاهم؛ قالولو برّه بدل شلاكتك وإلبس سبادرى وهيا ، بدّل طاير .. وكى رجع يلقاوهم مشاو.. خلاوه.. نساوه.. ومزال عالعتبة لتوّا يستنى.. ، 

هكّاكة أنا.. نستنى، وكى ياخونى الوحش ويقوى نعطيها آكة التنسنيسة ، ونتقهر.. وقت لى نلقى حلماتى لحلمتهم معاك أنا تعيشهم مع غيرى، نتجن !! نزيد نجهل !! وسعات .. نكتب ومرات نحسب روحى ما ريتش.. وسعات.. نبدع فى تفسيخ عقلى، نعطيها آكة الجونته وإلّا ما كتب حتى نولّى شرشبيل وسط السنافر، 

كنت نكتب برشة قبل فالفازات هذومة، خاطر ما نلقى بيها وين كى السم لى يجرى فالعروق لازم نزيد نحل الجرح باش يخرج.. ونكويه باش يتبع السخانة..، كنت نكتب خاطر نخسابها تقرى، وإذا قرات باش تفهم ؛ باش تحس؛ باش تفيق..، نلقى روحى نكتب ونصبّح فى آكة البوكس نعطى فى نصايح تافهة عالمحبة ونقلهم عديلو كيمة عديتلها ودموع وخناين .. وقتها هيّا ساهرة فى سوسة وإلّا الحمامات كان موش ڨمرت .. شيما تاليفونها تحلو بسّيف خلّى باش تقرى 476 سطر محبة وعرك وغيرة وحش و.. تى سيب بركة حتى هذا موش باش تقراه ، 

نكتب خاطر فقت قداش كنت نزمر على سعدى؛ قداش حصرت روحى وأنا نستنى؛ فيبالى مسلسل مكسيكى والحق يبان والكارما لى كنت نمن بيها .. يدها ،

لى حقنى فهمتو من قبل موش من هالليلة لى وحدى هكة ميسالش؛ خير من صحبة كذابة .. شطرها ما يتحكاش ، غلطتى لى نخسايب الناس تتصرف معاك كيمة تتصرف معاهم إنتى ، وجبتها لا نخون لا نلعب تحت الخط رغم توفر الفرص، مشكلتى حبيت عالثيقة عاد عطيتها وستنيت ثيقة فيا ، وهذا الكل رد بالكم تعملوه ! ماتعطيو الثيقة فى حد !! راهم زنوس وحتى باش نقول كلاب الكلاب ترى بيه عالأقل !! راهم عالفرنك والفيزا و حتى بزازل أكبر بنسبة للولاد و آبدو بنسبة للبنات يطيشو ربك !! رد بالك تصدق لى مزال فمة خير فالدنيا ! وإشرى كرهبة ننصحك راهى فى تونس الكرهبة وسيلة حب موش نقل ! ونزيدك ، ريت كى تبدى تخرنن عالديستونس ؟ يجى واحد عندو كرهبة خير ملى عندك ويسكن ورى البلايك يولى فيه العسل ، لا ديستونس لا شيئ !! وأهم حاجة ، رد بالك تكون راجل أو فيك ريحة الرجولية ، تحب تسكر خليها تحب قعدات ديار خليها ماشية هيا و 7 ذكورة فيهم واحد يبزنس عندو عام خليها !!! خليها لا تولى رجعى ومتخلف ومعقد وياسر تكبر فالحكاية ! تقلك نحب نعوم بـ بيكينى ؟ قلها أهبط كيفى بقطعة وحدة علاش زوز ؟ يا ولدى باش تستحفض كلمة راجل فسخها من قاموسك ، خليها تعرى حتى يولى كلو على برّه ، وكى يخزرلها واحد رد بالك تكملو ، قلها ليها هيا "ريت محلى ضحكتك.؟ الكل يخزرولك"، الأهم .. الأهم مالكل يعنى ، رد بالك تعمل منها راس مال ، خوفك عليها راهو خنقة ، لا تخاف عليها لا تغير ، وخليك ديمة معبى إحتياط باش وقت تجبد بيك لا تحاول تفهم لا تعمل كى سمايا تبقى ترحى وحدك ، الدنيا تبدلت ، وكى تراها تبسم وإمشى لا تعنق لا تبوس ، كهو  ، كل وقت ياخو وقتو  ، يزى ما عطيتها من وقتك :)

عـــروسـة الشـــوالق

وسعات.. كيمة توّا، ياخونى الوحش ليك، نخمم نطلبك، نسمع صوتك بلى ما نتكلم، نسمع الحس لى داير بيك.. وأول ما نسمع حس لى معاك يسئل "شكون؟" نعلّق، نتهنى عليك.. ونكمل فى ثنيتى.. ،

نجم نطلب، نجم نجيك، نجم نلقاك وقت نحب ونجم نجبدك من كرش الحوته ونفكك ملى داير بيك الكل، أما موش هكة، موش هكة نحبك فى حياتى وإذا ما بقى كان هالحل بلى بيك خير، مانجمش نفرض عليك تتوحشنى وإلّا تعمل عقل وتفهم، هذى حاجة ما تجى كان منك.. وبكيفك.. وإنتى كيفك عالى وبنسبة ليا ياسر غالى، مانجمش نعطيك وإنتى تحب تاخو كرشك كبيرة وعينك التراب مايكفهاش، تحب كل شيئ وأنا بالخشم لى عندى قتلك.. يا أنا يا هوما، وأكيد هوما خترت ، ما نلومش عليك إذا ما عجبكش العجب ، إذا رخصت والطمع لى فيك خلّاك بالليلة.. كل ليلة وليلتها وكل ليلة مخدة وريحة ، 

نخاف نجيك ، نخاف نجيك نعنقك نفركس ريحتك نشم ريحت كرهبتو وإلّا برفان من فلوسو كأنك حاجة من حاجاتو متاعو ملكية أما.. كرية، موش على طول كيمة حبيت أنا ، 

نخاف نتوحشك ، كيمة متوحشك توا ونسإل على حوالك.. نخاف نزلق فالكلام ونحكيلك وتفهم لى ماعندى حد وموش هكة نحب نتوحشك ، نخاف نكلمك ونحكيلك قداش ضايع صايع غارق وإخرها موش عارف فين، مستانس ديمة نحلم حلمة بو زوز حلمة ليا وحدى.. فيها كان أنا.. هذى ما نجمهاش، نخاف يجى نهار لى نتوحشك وكى نراك ما نعرفكش.. نخاف تطلع صارتلك حاجة سكاتك طوال ومانحب نسئل حد باش حد مايجى يعاودلك، باش تفهم ! بالعربى نستنى فيك تتوحشنى؛ نستنى فيك تفيق مالتفاهة لى دورتها بيك نستنى فيك تفهم الفرق بين لى يعاركك خاطر ماتحبش تمشى وقوات بيك نومت صباح وإلّى يعاركك خاطر راسك وجعك وموش قد بعضك حبيت تروح وعندو هوامزال بكرى، حبيتك تفهم الفرق بين لى يتغشش عليك خاطر صباح بدى من غير صباح الخير من عندك وإلى هاز خشمو خاطر ما حبيتش تمشيلو تبات حذاه، حبيتك تفهم الفرق بين إلى ختار التعب ليه.. وإلى حبك تصويرة.. بين لى سايس وقت معاش تنجم.. وبين لى ماعلابالو بيك، بين لى عوضك فأقل من دقيقة كى غلبك النوم وبين لى مزال عايش بخيالك.. بين لى خلقلك تصويرة أحلى منك، ولى عملك "عـــروسـة الشـــوالق"

وما نجمش نلوم ، موش خاطر اللوم بعد القضى بدعة وموش خاطر نستنى فى دموعك باش نقلك "مانى قتلك" لا !

ما نجمش نلوم.. خاطر موش أول من خلاتها بيا، خاطر حتى كذبك .. عديتو قبل ، خاطر وقت كنت نحكيلك ما تقلى كان "بحرنى.. غرقنى بالكلام وكولنى هكاكة"

ريت وقت نقلك نقلك ما نبعد كان كى تسيب، وكى سيبت بقيت مكبش.. ، وإخرها تعوضت تبدلت وترميت، إي آش بيه، المشكل عمرو ما كان فيك ولا باش يكون، مشكلتى نصدق..، والحق الحق مشكلتى نحب نصدق ، 

ومن العادى وقت توفى هكة ، العيب عمرو ما كان فيك ولا فى الدنيا ،

العيب فيا وحدى ، خاطر مانيش نفحاوى كيفك ونفركس عالعشرة

0

عكس الثنية ، كياس فارغ والشيرة لخرى معبى ..، نرمالمون رانى كيفهم؛ كالبڨرة شاد ثنية للخدمة ومعاش بكرى نطلب فى ماريو باش يغطى عليا حتى نوصل وإلّا نألف فى درامة لى باش نحكيها كى نوصل .. نرمالمون ..،
نرمالمون برشة حجات، نرمالمون ما نعفس المطار اليوم، نرمالمون ما نقولش بسلامة من غير هنينى عليك،  نرمالمون نقول باش نتوحشك، نحكى برشة كلام نحكى برشة سكات، موش نحكى نكته ونسب التفاحة.. ،
هواء .. باردة الدنيا أما شميسة، موزاييك وحاط ونس كلام راديون، أهيكة ناس تحكى،
ما حرقت حتى ضوء، ما عندى وين ماشى.. نقتل فالوقت.. ماعينيش بقهوة وأكيد مانحبش نرى وجوه كذابة، هذوكم، وجوه العادة
نحسب كيمة لى خرج مالربح ودخل فالخسارة، يكمن أول مرة ما نختارش سياسة التقسيط، كلو فرد ضربة على نفس النفس بلى شيئ وحتى شيئ، اليوم فالتقويم الجديد 0
نحب نروح .. ومانجمش .. مزالت ريحتها هونى، إخر سواڨرى معاها هونى، حاجات يمكن نلقاها صدفة تذكرنى ويمكن خلاتها هيا بالعانى ؛ صفحة جديدة ؟ لا ؟ كتاب جديد؟ يمكن ، أما موش للى يجى

كهو ، يزى ما عطينا قيمة

أيا تجى .. ؟

أيا تجى .. ؟

أيا تجى .. تحبنى و نحبك وخاطر المحبة صعيبة نكذب عليك ونقلك نحبك وتقلى نعشق دين ربك نهبل بيك و تهبل بيا حتى نطيرو مالدنيا هذية، هيا تجى ؟

إيجا إكذب عليا و على يسمعنا إكتبلى حب و محبة و نكذبو حتى نصدقو الكذبة.. وهكة.. تكبر بيك الهبلة وتقلى هانى معاك لإخر العمر، وأنا ننسى الكذبة و نصدق.. نقول برد السناء موش وحدى ونبدى نلم لفيفرى ونخبى نسرق منك كل مرة شوية نخبيه للأيام الجاية باش حتى كان غلطت تسامحنى كى نوريك طروف منك مخبيها لداخل فالقلب فالجواجى ..

أيا تجى .. ؟ أيا تجى نحلو فالبحر ثنية ونشقو وديان وسعادى نشقو الخلاء خلى يقولو هبلو خلى يحكيو و ما نعدلو خلى نتخباو حتى ينساونا وكى تجى الصدفة ويراونا اليد فى اليد مزلنا يلقاونا

.. أيا تجى .. ؟  

أيا تجى .. تمسحلى دموعى ونهزك على ضهرى وقت يقوى بيك التعب نعاركك غيرة وخوف عليك ومن كل لى داير بيك .. تونسنى ليالى طويلة ونحكيو حتى يوفى الكلام وكى يشدنى الوقت نطلبك ما عندى ما نحكيلك .. نقلك طلبت خاطر متوحشك .. طلبت خاطر نحبك وكل لحضة على بالى وخفت تتلهى فى حاجة أخرى تنسانى قلت نطلب ونقول هانى هونى ونقلك.. أيا تجى .. ؟

أيا تجى تعملى قهيوة؟  نقسموها الصرة عندك وسكرها عندى .. بالعربى وريحة القهوة العربى ما حاشتى كان بيك إنتى والدنيا مرارت وسكرها  إنتى من غير رشة زهر خاطر زهرى قام كى جيت إنتى ، أيّا اش قلت ياعمرى ..  

؟ هيا تجى .. ؟

تجينى وإلا نجيك ؟  .. 

يا تجيني يا نجيك يا نتقابلو في شطر الثنية شيطانك يعرف الدّار و انت تعرف لبقيّة

 .. نهربو .. نبدلو أسامينا و نتبدلو .. بعدها نبدلو لبعضنا موش طبايعنا.. لا .. حوايجنا ♡

إي ، آش بيه .. موش هكة يقولو ؟؟ تعال نمارس الحب ؟؟

  إيجا .. نمارسو الحب مالة و نعيشوه كذبة بنينة بكيفنا،

يزى ما خانونا وكذبو علينا إيجا نكذبو نحنا شوية نعيشو كيمة حبينا نعيشو بلى خوف نسيبك وبلى خوف تسيبنى ، إكذب وقلى رانى ليك وحدك وعمرى ما نكون لغيرك حتى بعدك 

و بعدها .. أهرب و أنسانى و كى يقوى جناحك أرمينى مالعالى وقلى هذيكة المحبة ، أنسانى بعد العشرة و بدلنى .. أم توا .. قلى.. أيا تجى ؟

إيجا نحبك بعنف و فرض وقوة حرمان وشهوة مدفونة.. إيجا نعشقك بهبال و حبنى ! حبنى أكثر ملى نحبك بشوية حب عبادة بلى حسابات وترجيع فازات بلى تمفريخ وشماته بلى قداش عندك وإيذى فرغ مكتوبك نسيبك وننساك ،

إيجا . . نعشق فيك .. و نكتبلك نعاركك نخضك نمرجك و ترضينى بعد الفوضى والحروبات بين غيرة و خوف عليك .. ببوستك... و تعنيقة .. والناس هونى مخلطة تاو نقلك وحدك كيفاش بتوشويشة خفيفة كلها محبة وأفكار منحرفة وحش بزايد ودفئ كى تعنيقتك،أيا تجى ؟

أيا تجى ننساو لى قبلى و لى قبلك.. 

نهبل بيك و تهبل بيا و تتنسى الكذبة و تغلب العشرة و كى تموت الضحكة .. فى إخر عركة .. كى تقرر تنسانى .. إكتب عليا .. 

 توحشنى .. وذكرنى علاش عشقتنى .. 

عاركنى وقلى ماحبيتكش كنت خارجة من عقلى كنت ما نعرش نحسبها ..

أيا تجى .. ؟

نعطيك ليالى طويلة ومن عمرى نزيد فى تعبى على راحتك نضحكلك وقت القلب معبى ونخبى خوف غدوة خاطر عارفك عندى .. وإيذى موش هذا لى صار وبدلتنى وإلا كرهتنى ميسالش .. قول كى غيرو عمرو ماكان باش يبقى وسيبتو قبل ما يسيبنى ورميتو قبل ما يرمينى بدلتو بالجديد والجديد يا رابح المغروم يجدد و يرحم أيام المحبة ، 

شقولك يا عمرى،أيا تجى .. ؟

حبنى ونحبك قد المحبة مرة وشطر وقول محبتو شوية عليا؛ أكيد عندو غيرى يطلع يهبط يبقى راجل شرقى .. وتبقى إنتى مراء شرقية مخك معبى سم عالراجل بحكايات الغول والمغتصب والخاين ؛

آش قولك ياعمرى .. 

نقصوها قبل ما نصوحبك بلى وجاعت راس قبل مت تتعلم أمك تسئل عليا و قبل ما نحكى عليك .. نعملك قيمة و نعليك .. نجبد روحى مالدنيا و كى نبقالك ليك وحدك إجبد بيا، ما يهمش خاطر شنية ، خاطر كاس شراب وإلى قعدة تحس فيها بالحرية خاطر بوقوس عجبك بدنو خاطر الحالة اﻹقتصادية خاطر .. ما يهمش خاطر شنية المهم لى نسيت تعبى و معاش ليا،

أيا تجينى و إلى نجيك .. 

و نقلك .. إلى توحشتك من غير نعرف شيئ عليك ..

وإلا نقلك .. خليك حلمة، لا تجى لا نجيك 

:)

إِخِـّرْ لَحْكـَايـَـة : { وَردْ عَرْبـِى }

[وإن كــان العيش بلا سبــب ..، 

فالمـــوت على شيــئ أفضـــل .. . ]

وقت لى هيّا قصتها معايا كان عندى صديقة كان تتذكرها ليلـى عشيرتى سنوات من صحبة نضيفة مزيانة، نوع خاص من المحبة فيه.. هيا أكثر من أخت وصاحبة وزميلة وصديقة وكل مايمكن أن تكون أنثى فى حياة إنسان، هكّة كانت فى حياتى؛ عشرة سنين .. مخلاتهاش بيا وما سيبتنى كان ما وقفت على سقيّا .. وسعات نلقى الونس فى آكة ديسكوسيون لى شطرها زرارق يومية بينى أنا و الآكس، بعد ما رجعت نتونّس بيها وتحت الخطوط الحمراء بما أنها مراء معرسة ، قلت ميسالش ، هذا آش كتبلى ، نكمل نفسر ونقول إلّى إختيارى كان فيه عواقب؛ أنّك تعيش متفرج على العلاقات الإنسانية من غير ما تسمح لروحك تعيش حاجة من حقك، بطبيعة صعيبة كانت العيشة سيليباتار.. 

مع الوقت تكتشف إلى هذا لا يكفى؛ خاطر فى لخر حتى بوجود ليلـى أو غيرها أصدقاء موش كوبل، تبقى حجات مزيانة بسيطة وتنجم تقول تافهة تمنيت نعيشها، بالأخص مع الوقت.. الفراغ الذى داخلى أصبح كثقب أسود، وقبل ما نخسر إنسانيتى تماما بطريقة معاش تسمح باش نسترجعها و بتشجيع منها حاولت نتعرّف؛ طبعا الجنون لى فيّا وعلى خاطر نحب نتحب ونحس الحب والخوف عليا والقيمة ..  الغيرة العمياء كان لزم وأهمهم قهوة دافية من شفايف دافية بتعنيقة دافية موش من مخدّة فيها شطر دفاء، تهورت وبديت فى فوضى العلاقات من جديد و ثلاثة محاولات فاشلة بعد الآكس هدّونى؛ قراونى النقص فى روحى ونساونى أنا شنية علمونى خوف المجهول وغرسو فيا جنون الإرتياب وفهمونى إلى الخسارة لازمة وأكيدة، ورضيت .. قلت ميسالش هذى موش دنيتى..،

.. وغادى فين بالحق المليح يبطى 

وقت جيت إنتى .. و كى سيبتنى كرهتك ! :

نكرهك .. و نكره أكثر كرهى ليك كى نتفكر محبتى لى ضيعيتها من بين يدك وقت تلفت وما لقيتك ليلة سخانة وحدى مع السقف سارح دايخ نستنى فى كلمة موش باش نسمعها حضورك لى موش باش يكون ومحبة هزها الريح .. توحشت كلمة نحبك وكرهت هالوقفة هذى نستنى ونكره الوقفة هذى بين لحروف كى نقول نكرهك ..ونخاف نوجعك بكلمة وقت لى إنتى توجعنى بالعملة.. ؛ مزلت نسبح بإسمك ونقول الحمد لله، وكلام الّيل يحضر ويغيب بين لى حبيتو فيك وكرهتو كى غاب عند غيرى مطيش عالتراب نستنى فى زهرى وقسمى معاك حتى كرهتك .. وكرهت روحى كى نتوحشك كى نحب نتذكر علاش هالقلب بارد كى غناية صعبت نتذكرها ندور فى تراكن عقلى ونلقى .. نلقاك إنتى.. وهذا لى ما نحبش نتذكرو ..، نكره وحشى ليك وغرامى بيك ونكره كى نتذكر كيفاش كنت نبشبش بيك وبوسلك يديك .. وقت لى تحط صوابعك على خدّى وتقولى يوفى التعب .. لا التعب وفى لا الكلام تحكى لا عشنا كيمة نحبو أحنا وكرهت كرهى ليك وقت لى أمنت بيك وسيبت كى غيرك وفى لحضة تنسيت.. إي آش بيه كى تنسيت .. أما قلّى آش نعمل كى صدقتك وقت لى عليتك وستنيتك وخبيتك من عيناهم وكفرت بلّى حبك وإلى كرهك وإلى توحشك.. كفرت بالورد لى حبيت وغرت وقت سامحتو عالشوك لى فيه .. وقت تبننت ريحتو وشم من ريحتك قريب من شفايفك وقت توحشت بوستك حتى كرهتها وما لقيتكش ..، وقت توحشت تعنيقت سماحنا وصوت ضحكتنا وبلادة تصبيحتنا وفرجتك فيّا .. وفرجتى فيك .. ، توحشت بوسة صباح منك حتى كرهتها وقت تزادت للحكايات لى وقتها مات وقلت يزّى معاش نجم نعدّى قلبى فاض بمحبّة لإنسان معاش معاك وبلى حكيتلو مشى وخلاك وقبل ما تفهم لى صار وقبل سؤال علاش أنسى وإدفن تى ستانست .. أما ماحبيتهاش منك.. وجعتنى وقد وجاعتك خفت العيب يكون منى هذا الكل ما نسواش ؟ هذا الكل موش من حقى نعيش فرحة ستنيتها وحلمة خبيتها .. ؟ .. كرهت الضحكة لى تتصور على شفايفى كى نكتبلك نتذكرك نتوحشك ك.. كى تعرضنى حاجة تحبها وغناية سمعتها معاك وزناقى درنا فيها وقهاوى ونست سكاتنا و شتاء .. قلنا باش يكون أول شتاء مع بعضنا وإخر شتاء وحدنا والمطر تولى تتونّس بينا وتعرفنا ، كى حلمت معاك على محبة بلى وقت ما فيها كان أنا و إنتى يزى وياخى ..؟ سيّبت .. كرهت نعمّل عليك وكرهت روحى على صدقتك وكرهتك وكرهت تصويتك الكذابة و كرهت كرهى ليك خاطر نحبك ونعادى لى يكرهك ! كرهت دخانى وقت نهربلو كل ما نتذكرك وكرهت كى قتلى بطلو وحسبتها أيام عمر وغيرة وقتلى نحبك تعيشلى أكثر ..، إي .. هانى عايش ..وينك إنتى ؟ كرهت مانعرف شيئ كان لى تحكيه وكرهت نشد روحى باش نسكت وكى تجى نصبلك صبّة وحدة نقوّد بروحى ونورّيك ونحكيلك كل شيئ بلى ما تسئل..، كرهت وحبيت نكره باش نرتاح وكرهت كرهى خاطر نحبك وكرهى عمرو ما كان ليك .. كرهى للخبيتو للوعدتنى بيه ونسيتو للى ما قلتوش للى ما حكيتوش .. للى عملتو .. كرهى للوحش ليك وقت معاش لاقيك .. وحتى وحشى .. موش ليك ؛ وحشى للشفايفك كى تحكى صوتك كى تضحك كى تغنى كى تسب كى تعارك .. وكى تقول توحشتك .. وإنتى مزلت تتوحشنى فى بلاد العكرى .،؟ بعيد عليك تنسيت أنا لى متوحش صوابعى كى تضيع فى شعرك خزرتك قبل البوسة وريحتك بوسة الخال لى تزينك و رقبتك وصوابع يديك وقت ما تحبش تسلم فى يدّى ؛ توحشت نختارلك لبسة نعاركك باش تزيد تسكر فلسة وكى.. كى تغير .. توحشت النفس متاعك فالقهوة توحشت ريحتك !! كلك !! أما وحشى نزمر بيه ؟ وقت منسى ومطيش .. كيمة قلت ماكش باش تعمل عملت .. ، رجعت للى الفرش والديبريسيون وإنعزلت عالدنيا نلقاها أيام عشتها قبل ونتفكرها مليح ،

ـ يزى .. يزّى .. ! 

ـ إنتى لى تحبنى نتكلم ، تحبنى نرجع نكتب ، ريت علاش خترت سكاتى ؟ .. باش تصويرتك المزيانة ما تتبدلش فى بالى ..

ـ أحكى وإكتب أما موش هكة .. هذى ذبية هذى وجاعة هذى ..

ـ ما نكتب كان لى نحسو وقلبى معبى منك وعليك .. 

ـ آنا زادة مزلت نحس ! و مزلت نغير.. مزلت نخاف منّك وعليك..، مزلت نخاف نخسر الشوية لى مزالى منّك و نهبل نخرج من عقلى ونكفر كى نتذكر.. من نوفمبر لى فات..، ماكش مالنوع لى ينسى و لانوع لى يبيع بالساهل .. وتوجعنى كى نحل قجرك نسنس  بين تاليفوناتك المكسرة وأوراق تخنطب فيها وبعد ضربك البخل باش تعاود تكتب .. نلقى باكوات 

"vogue" 

الفارغة متاعها مزالو عندك ..، وقت نحل كتاب تحبو نلقاك شاد صفحات بتساكر التران فيهم من ريحتها .. كينك تخبى فيها باش ح كى تنسى تتذكر..، تحسسنى كأنى مزلت نحب فى حاجة موش متاعى ..! الشوندوليى لى كل وحدة وحكايتها ، خواتمك وشكون خلاهملك .. حتى تصاور فيهم كان إنتى .. والمشكل فالضحكة لى ضحكتها للى صورتهملك ..، تعبت .. وإنتى لا حبيت تحس! كى وليت ماضى بالأخص! وليت نغير ملى قبلى وإلى بعدى وإلى مزالت فالثنية باش تجى! حبيتك ومزلت نحبك ونكره حبى ليك هكة، نكره نتكلم نخنقك ونخاف نسكت يتقص النفس ومعاش نجم، معاش نجم ما نسئلش لشكون لابس وحاط الحطة، نهلوس كى ما تكونكتيش نهارين، يقوى جنونى ونكلمك على قهوة سعات ونخمم نحكيلك بين لى تعدى وفات ولى مزلت نحب نعيشو معاك، أما وقت تجى..؟ يتعقد اللّسان ويهرب الكلام ننسى آش حبيت نحكى ونتذكر لى عندى إنتى.. أما حدنا إخر لعشية، ..نشرى عركة سعات كى نحبك تزيد شوية.. وسعات .. كى ما نلقى بيها وين نبدى كالعزوزة التكناسة نعقد حواجبى نصح فيك باش تتعرف وتاخو الخطوة وأنا بينى وبين روحى طايرة بالفرحة كل ما تقلى لا.. كهو سكرنا ووفى.. نحس لى مزال ليا عندك يمكن تركينة صغيرة فى قلبك .. ، حبك تعب فالبعد والقرب وإنتى بين البينين، لا جينا واحد لا ثنين .. وموش هكة حبك كان، كنت تحب بالغورة بفن بموزيكة والبوسة الحنينة حبك كان بلاد النسيان لا عاد نعقل فيها زمان لامكان حبك كان بسياسة وكى زرارق المورفين وتقلب فى لحضة، تحب بالقوي، بالفكان وبالغورة دكتاتورية بنينة نسلم روحى بكيفى كى شيخة بنارد الحضرة وترهويجة كى حنيّت نهار شتاء قهيوة دافية وموزيكة خفيفة وزوز عصيفرات جاو لشبّاكك وتخباو عالماء .. حبك كان كل شيئ وحتى من غير شيئ ريحة دخانك وحدها فالدار تونّسنى وموزيكتك وكشكولاتك.. تاليفوناتك و تعنيقة سكاتك.. توحشت تحكيلى كى قبل توحشت بلادتك كى قبل توحشت غيرتك كى قبل توحشتك حتى وإنتى بحذاية خاطر ما حاضر فيك كان بدنك، توحشت تعاركنى كى تهز خشمك ونسئلك كيفاش نرضيك وإنتى تجيبها باب مسكر بألف مفتاح وبعد شوية تلقانا رجعنا ونسينا حتى علاش تعاركنا وكيفاش تراضينا.. توحشت تخاف عليا وتسئل بالمفصل وكى نقلك خارجة تقول لا موش كى توا تقلى نكلمك غدوة، توحشت هبالى معاك وحكاياتك لى ماتوفاش والتراكن لى حفضت أسامينا، توحشت وقفتك فالكوجينة، توحشت قباحتك .. توحشت شفايفك ، توحشت نشبع من ريحتك، توحشت ضحكة معاك توحشت مانسئلش إذا غدوة نجم نراك توحشت تكون ليا وحدى! 

ـ وقت ومشى على روحو وإنتى لى صوحبت وكملت ثنية وحدك،  آش تحب نعمل ؟ نبقى بعدك نسب فى زهرى ونكتب عليك وقت ماكش تقرى؟ وقت تخرج تسهر نشد فرشى ونتخيلك عندى كاسك أحمر وكاسى قهوة عربى ونحكى وحدى على الوحش لإنسان ما خلالكش مكان ؟ وقت ربطت روحك بإنسان آخر آش حبيت منّى ؟ نستناك حتى يرجع شاهد العقل وكى تجى نقلك نعاودو من لول كينو شيئ ما صار ؟! ترميت برشة قبلك وحكيتلك خاطر ثيقتك وفيبالى موش باش تسيبنى .. قتلك عديلى وإذا غلطت سامحنى ما تحسبش عليا خاطر مزال بقيت عمرى ليك نعوضلك بيه ، قتلك سامح خوفى وسامح هبالى وسامح تعبى وسامح لى نخاف نهار نعملو موش بقصدى ومن غير لا نغلط ترميت كى جريدة البارح .. لى تقرات كلها ومعاد فيها ما تزيد

ـ لا موش هكة ؛ خوفى لا تسيبنى إنتى غلبنى .. وليت مرض  .. خفت معاش نبرى منك وقلت نهرب قبل ما نغرق كلّى وننساك، خفت إذا تسيبنى إنتى معاش نجم نعيش بعدك وبلى بيك، خفت مالدنيا الدوارة لا ..

ـ كهو مالة ، ماك حبيت هكة ؟ هانا هكة 

ـ فيبالك مرتاحة هكّة ؟ معلقة فالنص.. لانى معاك لانى موش معاك، بإسم صداقة كذابة نواسى روحى ونقول عالأقل... نراك ..، يمشيش لبالك نحب نتعبك وإلّا نحب تعبى لى موش باين .. لا .. أنا مـرائ تعلمت تخبّى ، قبلك تعلمت ما تحسب لشيئ ولى غاب غاب قسمو وخلاف ضحكتى مانفركس على شيئ ؛ توا .. فرحتى إنتى .. 

ـ يعنى ؟  إخر الكلام .. وين تحب نوصلو ؟ 

ـ ما نعرش ؛ أما تعبت ..

ـ ... تحكى كينّى أنا مرتاح ..

ـ إيجا إرتاح ، إيجا عندى وسيب عليك مالتخمام الزايد ! إيجا نسرقو الوقت توحشت ليلة معاك ، توحشت تصبيحة و..

ـ هكة ماكش تعاون ، هذى خطوة لتالى يا عمرى

ـ ميسالش ، سعات خطوة وحدة لتالى ترتحك تعب سنين لقدّام