و يذبل الياسمين ..

ما حبيتش توفى هكة ، ما حبيتش نوصل هنا ، هنا الحالة هنا النهاية هنا لى نحس فيه و هنا .. اخر الحكاية .
عاودت كل شيئ، نشرى فالنسيان بالجديد، بدلت كل شيئ نقتل فى خيالك و خيال غيرك و وصلت .. لى ما حبيتش عليه وصلتلو .. هنا ما عندى منك شيئ ..، حكايتنا لى وفات ما فمة شيئ يثبتها، لى عملتو معايا نجم نقول ما صارش ، تنجم انتى زادة تقول ما صارش ، ما فمة شيئ يثبت كان هالحروف .. و شوية منك انتى بيدك مافيبالكش بيه، شوية منك مخبى بين التوارخ وتراكن قديمة، سيقارو نص الليل ، والبسمة كى نرى لى يذكرنى بيك .. ونتذكر اخر بسلامة ، من غير هنينى عليك .

ما حبيتش نوصل هكة و بعدك ما حبيتش نعرف، ما حبيتش العدد يزيد هكة و الخيبات تتوالى بهذه الصريقة السادية نحوى المازوشية لنفسى، بعدك حبيت لى تعوضنى عليك ، تنسينى فيك ، لى نعمل عليها رونفوا محبة خاطر ذلك الكم من المحبة اذا ما يخرجش ما يتصبش يغرقنى لداخل يقتلنى ! يولى سم ! حبيت بعدك كان على وحدة ، هيا انتى فى وقت آخر .. هيا انتى .. اما من بلاصة اخرى . حبيت على نسخة منك نجم نعاود معاها من جديد بلى ما يقتلنى هالقلب بالوجايع وقت نعفس عليه ومسامح لى ما يتسامحش ، وقت من داخل أتمزق فى احتراق لا يأبى ان ينطفئ .. اما نضحك لضحكتك .. صدقت المضهر و زدت .. ولى فات عمرو لا مات .

بعدك عرفت برشة ، والإعتراف وحدو وجاعة ، اي نستعرف انا المستعمل البالى المهرى المصدد الى تعدى على برشة شفايف و برشة يدين وهذى حاجة حتى بين روحى و بينى ما نستعرفش بيها، اي انا لى بعد منك حبيت لى تجى ترجع لى مات فيا زادت قتلت و زادت هلكت كسرت ردمت و حرقت وفمة حتى لى شطحت على نار جاشى لى تزيد كل مرة وتاكل من داخل .. والضحكة هيا من برة ، تصاور الضحكة اهم مالضحكة و انا نجم ؟ نجم نقلك الى تعفست و تضلمت ؟ لى وفيت و توفيت و ما نجمتش ؟ وقت لى انتى لى ضلمت ثنيتك مزيانة ورد و ياسمين و انا لى تضلمت ثنيتى شوك قزاز وضلام .. شوك وجايع تتعاود و قزاز اخضر والعشرة عالدبوزة و ضلام ياكل منى .. حتى طفيت ، طفيت و قلت معاش نجم نعاود ، قلت وفى و عاودت ، ومرة اخرى نفس لحكاية تتعاود، قررت نقول يزى .. بنيت حيوط بينى وبين لى يسمع ، وهالقلب طلع مزال حي ! المحبة مزالت ! مزالت فيه شيرة صغيرة ما فاقوش بيها، شيرة محبة للمراية، لوقت لى تلبس حاجة تواتيك وتحلى فى عينك، محبة من نوع آخر ، محبة للموزيكة ، محبة للشوارع الفارغة الطويلة ايام الشتاء، محبة لريحة البحر محبة لل خلئ.. محبة هيا .. محبة مخبية منسية ، محبة للكتيبة للتصاور محبة للحجات البنينة ، للماكلة يمكن و لسيقارو وكيت الموزيكة ، بعد ما تتعلم ترضى وتتقبل الواقع ، ترضى لى باش تكمل عمرك وحدك ومعاش تعدل .. اي رضيت و شنية الحل لاخر ؟ يزى معاش نجم و نتعب نحكى من لول ، نتعب حتى نتذكر باش نحكى .. نتعب باش نشكى .. والحقيقة ما فمة لشكون نحكى، غلفت روحى بعلاقات اجتماعية كذابة راس مالها تصاور والضحكة ، اثبات لى انا حي موجود انتمى عايش كيفكم .. و كيفها .. ، ومن حيث لا اعلم ، جات شكون .. مالقيت ما نعطيها اما حاولت، قطعت مع الكل و قلت هيا يزى ، بكذبة حلوة صدقت ، كالبنج بلعت كلامها و كذبت العين ، صدقت الوذن .. الكلام العسل .. وماتت المحبة ، وقت تلقى روحك متكى عالهواء تتعوض تستبدل باي حد من غير سبب مقنع غير كلمة "ما نعرش علاش عملت هكاكة" او كلمت "مانيش باش نقعد لحد" مالة آش جيب ربك ! علاش تبيعلى اوهام نخلصها من شوية روح لى قعدت ؟ علاش سماك وقت لى تربطنى بيك تبنيلى حلمة انتى ديجا تبيع ؟ علاش سماك مريضة تعبتنى بيك وزدت عليا وقت لى والله معاد منجم ؟ علاش .. ؟ علاش هالخايب يتعاود حتى وليت معاش منجم لا نكره لا نحب .. حتى ولات لى نحكيلها آكس نساتنى من اكثر من سبعة سنين ومزلت نشكيلها من همى فى كتيبة عمرها لا باش تقراها .. علاش وقت لى آمنت بيك قتلت اخر عرق بخيوط الشماته، علاش و علاش و الاسئلة ما توفاش و نتخنق كل ما نتذكر و يزى موش باش نحكى اكثر .. ، يوفى الملام و هذا اخر الكلام ، ومعاش نحب نشم الياسمين.

وما تاقف الرحــى

صغار تلعب .. صوت ضحكة وجري وحس عيد .. مبيناتنا باب مسمـّر شبّاك مسكـّر وريدو أكحـل، قلّت نوم مالتصبيح مخلّاتنيش نقوم ولا نجـّم نفارع بريكيّة معاش تحب تخدم لا نشعل ڨاز ولا نتفنن وقت نود روحى بقهوة ولا سواڨر تونّس ولا لقيت موزيكة لنهار هكّة .. ، موش تعب .. وموش فشلت سخانة .. هوّا برد، برد روح برد دخلانى مغلّف بنسيان كذاب وسعات بتاريخ نتفكرو مليح يتحيّر،

مانيش نكتبلك، ولا نحكيلك ولا هالحروف عليك .. وفى هالكتيبة مانجمش نسئلك إذا تتفكر ،

وقتـى فارغ .. وشطـر كلامى سكـات، وقد لى تبدل والوقت لى يتسرسب كالرمل بين صوابع غارق فالصحراء مزلت أنا .. الدخلانى أنا .. ، بدّلت اللّوك بدّلت اللون بدلت بـنْ قهوة الصباح ، بدلت قعدت العادة وسلمـت فى لى فى نهار كنت نحبـو بدّلت المطعم وبدلت الريحة .. بدلت النسمـة .. وعلّقت السبّاط .. كلّو برّانى أما الدخلانى أنا ، 

ولداخل.. ياسر مكسّر، بحكم لى تعدى ، لى رميت روحى فيه .. ولى رميت روحى عليه زادة، لى عشتو ولى عاشرتو ولى فهمتو بمختصر كلمة "دنيـا" ،

خسرت فى هالرحلة الثيقة ، فلّى داير بيا ولى دايرين بيا .. لى لعبت معاهم كالماريونات ، لى هز وما خلّى ، ولى حلّفتو بالإمانات الكل باش ما يبيعش وباع ، لى لقانى رماد وآمنت لى منّو بمحبّة صحيحة تنبت العروق من جديد ونبرآ ! شتهيت محــبّة ! وتمنيت محبــّة ! محبّة ليّا بلى قسمة ما فيهاش خوف نغمض عنيا ونڨز بلى خوف كلمة غدوة حبيتها محبة كالحلمة نعيشؤ بالّى فمّة وموش لازم شبابكنا تحل عالجنـّة ، حبّيتها محبة بين زوز لا يقسمها عرض بحر ومحبة تعنيق وبوس ، حبيتها من نوع عندك إنتى وعندى أنا .. ونڨزت ، هيّا مرّة هيّا ثنين .. ومزلت بهلول ميسالش نقولو مهبول يصدق كلام الليل وما يفرقش بين كلام الليل الشهوة لى تحكمو اللنفحة و لى يحب على بقية العمر ، الرماد زادت عليه نار ولى تكسّر صبح غبرة معاش تتلم و الرماد هزو الريح ، ووفيت .. 

هيا لولة هيا الثانية.. هيا الثالثة .. هيا لى بعدهم الكل وقت قلت معاتش ويزى ما تكويت وطراحت التوبة كانت طرايح، وما شعفتش، نزيد نوحل ونطنبش ونزلق، قد ما تزلعت ركايبى من طيحة ورئ أختها ومزال النفس، وأنا مرّة تقول هابط نتكركب من دروج مرة فى بير مرة مالعالى ومرة من لوطة لتحت اللوطة،

معاش عندى وجه نقابل بيه والضحكة الكذابة صبحت أقوى منّى والوحش لروحى يغلبنى .. وقت إلى وحدى وحتى أنا معاش حاسسنى ، كينى فارغ من داخل .. إنسان بلى روح وبلى حلمة .. ما عندو وين يحب يوصل ويحب الأيام تتعدى بزربة وكل يوم يسب الشيب وينسّى .. يقول لى تعدى مشى وأنا نعرف لى عمرو ما مشى ، الوجيعة مزالت عايشة فينا والكذبة طالت وليام رزانت ، كنت نجم نبرئ .. لو بشر واحد ما كذبش ، لو واحد برك ما سلمش لو إنسانة وحدة .. خلات عندى ثيقة فالدنيا باش نجم نقلكم لى ماهيش خايبة كيمة التصويرة لى تدور فى بالكم ، لى أنا مثال حي إلى وقت تعطى تاخو وكى تمشى مستوى ما يجبد بيك حد ، حبيت نقلكم إلى الدنيا موش تصاور كذابة ، أما ناس هالدنيا أخيب من هكة .. كيمة تحكى كيمة تسكت وهذاكة علاش غلب السكات .. وقتلى تقول "هنا وجاعة" ياقفو غادى ويستحلاو الشرب عالجرح ويطفيو سواڨرهم فيه كان لزم ، قداش شهيت نكتب حاجة أخرى .. على سبيل المثال نقول قد ما تتسكر فى لخر تتحل، وقد ما تصبر على قد صبرك تاخو ، موش كلام عزايز وموش نصبر فى حد، هذا واقع، نعرف لى برشة موش باش يصدقو هالكلام وما يشهد على صحة كلامى كان الوقت ،

أما ناس هالوقت تغدر بلى ما تحس وإذا تحس كان بعد ما تخسر وبلى رجعة مشئ ، 

كيمة مشيت إنتى يلى كنت نكتبلك ، ومنحبش فى كلامى نبدى بلحن "تتفكـر"

نسّاية بيّاعة وما عليك ملام ، ومن آكة الوقت لى تنسى معاش عندى الجهد لعركة كلام ولا نكتبلك ..

نسيت إنتى ، وخذيت أنا خطوتك إنتى مخّر صحيح أما حتى أنا بريت ونسيت ، وكبرنا وتزادت أعوام لعمرنا ، وكبرت إنتى يا صغيرة .. ، برغم تتبدل حجات ، شركة والخاتم والمنقالة واللونات، تتبدل ألوان الحيوط وتسكر بلايص وتضهر تراكن جديدة، يقعد الدخلانى هوا ومعبى باللى ما تحكاش، معلّق كى منقالة وفات عليها البيلات، بلّى موش مفهوم ومخبي ساعة على ساعة يخرج .. كالزيت فوق الماء وكمل موش أنا لى ننسى .. ،

أما هذا ما يمنعش 

معاتش باش نكتبلك ،

معاتش باش نحكيلك حكايات حبيتك تسمعهم وماقريتهمش، لى مانيش نرضى فيك بالكلمتين هذومة باش قلبك يحن.. ووقت ترانى نعاود نقراهملك بصوتى ونغطس فى كل حرف بتعنيقة ليك وخشمى فى شعرك، يدى على يدك، وبين الطفية والطفية مالسيقارو بوز مالدنيا نتفرج فيك ، 

كى كنت نكتبلك كانت الحروف تصعب برشة، وقت نحب نحكيلك وما نحب حد يفهم كان إنتى ، خبى كلمات بيناتنا وسط الكلام وإلا نفسرلك عالأحوال لى دخلت فى حيط يامة فالخدمة يامة فالدار ، حبيتك وحدك تفهم ضعفى وقت نحكى بقوّة وجباروت كذاب ، وحبيت نوريك لى خير منك مزلت ، وإنتى ما فهمتش ،

سبيت روحى بكل لغات الكون ولصقت فى روحى عيوب عمرها ما كانت فيا باش كى تقرى وترى من روحك الخايبة فماش ما تلوم روحك شوية ، حكيت بالمقلوب برشة مرات وإنتى حتى كى قريت فهمت الكلام كيمة هوا ،

موش نادم ، وموش باش نندم على شيئ معاك ، 

خاطر الندم برشة فيك والكره برشة عليك والأهم ، كبرتك برشة وإنتى حتى شيئ ،

فى خوفى عليك وقت تقطع عرق الشماته وعملت حقنى وقتها شطبتك وموش بالظرورة نشوف لى بعدك ، مانيش رخيص كيفك ولا قدك  ، رخصى كلام نكتب فيه عليك كلو محبة وحش وأحلام وقت لى إنتى تعيش وأنا دافن روحى بالحياة نستنى ، ما جينا كيف كيف فى شيئ ،

 الشمس قوات ، يمكن فاتت نص نهار ومزلت بلى دخان ، حتى دخانى بدلتو هذا كان تتفكر آش كنت نتكيف ، بدلت برفانتى وبدلت كل شيئ برانى ، بدلت سبابطى وبدلت وبدلت وقد ما بدلت من لول موش كيمة بدلت توا، كنت نبدل باش نعجبك، وبعدك باش نوريك آش خسرت ، حبيت نقلك بلى كلام رانى كيمة لى رميتنى على خاطرو كان موش خير، ما عملتش شماته وما قصدتش وجاعة ليك .. لحكاية وما فيها لى حبيت نترئ .. نتشاف .. نعجب كيمة قبل وقت الكسيبة تلاثة مراول وبالساعة نختار أناهو زعمة يحلى فى يعينيك ويعاون باش تبقى ونستحفض عليك، وقت نخبى حجاتى الصغيرة التافهة ليك .. وقت حبيت نقسم منى ونعطيك ، 

ما نلوش وما يقلقنيش لى سيبتنى ، كان يقلّق قبل .. أما بردت .. ، 

من أول الدنيا كنت أنا لى نترمى موش لى يرمى ، لى يهبط وسط الأوتوروط ضلام حتى القافلة تستمر ، لي يكون وقتى وحلماتى متاع غدوة وحدى نتحمل المسؤلية فيهم ، وحدى وما دخلكش إذا نتوحش إلا نفد ، وعادى موش نشكى هوا صباح وبلى قهوة والمونك يعمل ،

تبديل السروج فيه راحة..  والرّاحة لى  نفركس فيها ما يكفيهاش تبديل سرج ، كنت نفركس على حلمة أكثر مالواقع المر، حبيت .. وحبيت نتحب ، خذيت الريسك وكى غرقت لمت .. بعدت .. كان موش فالأصل هربت وقلت هكة نبرى ، بلى وجاعة قلب ولا كذبة بنينة ستيتها تكون حقيقة ليا برشة تغلبنى مطامعى ونصدقها ونغطى عين الشمس بنقبت الإبرة ونأمن بغدوة .. ويتعاود نفس المــوّال..

 . 

حديث عرضـــى

الإثنين : 8 ماي 2017

رديون صباح وقهوة صباح .. راسى يوجع .. أحد البارح موش لى هوّا .. 

حسب المعهد الوطني للرّصد الجوي، مغشّى بسحب عابرة بالشّمال و الوسط و طقس مغيّم جزئيا بالجنوب، و الرّيح تكون من القطاع الشّمالي بالشّمال و الوسط و من القطاع الشّرقي بالجنوب قوية من 40 إلى 60 كلم/س قرب السّواحل و ضعيفة فمعتدلة من 15 إلى 30 كلم/س ببقية الجهات.

أما البحر فيكون شديد الاضطراب فمضطرب بخليج قابس، فيما تشهد الحرارة انخفاضا نسبيا و تتراوح القصوى بين 21 و 26 درجة بالشّمال و المرتفعات و المناطق السّاحلية الشّرقية و بين 27 و32 درجة ببقية الجهات.

مغيّم ومضطرب .. أنا وإلّا الطقس لى تحكى عليه يا مادام ! 

إحساس وحدة خايب .. وغير مفهوم،

 الضياع وحلمة أنّك عندك شكون .. تدور تدور وتطيح فى نفس الحفرة ، لا لقيت لى تونّس .. ولا ونّست روحى، أحد البارح ضعت فيه، حسيت روحى وحدى بطريقة خايبة، قلبت الفايس بوك منوحة .. درامة .. 

طز، البارح فالبارح ، زوز قهاوى نرجع لاباس ..السيقارو يرعش بين يديا// 

ما عينيش نمشى نخدم .. .

الإثنين : 15 ماي 2017

وفق توقعات المعهد الوطني للرصد الجوي مغشى بسحب أحيانا كثيفة مع أمطار متفرقة ومؤقتا رعديّة بالوسط وتكون بكميات محليا هامة بالمناطق الشرقية، وسحب أحيانا كثيفة بالجنوب ومحليا الشمال مع أمطار متفرقة وتكون مؤقتا رعدية.

والحرارة في انخفاض وتتراوح القصوى بين 21 و25 درجة بالمناطق الساحليّة والمرتفعات وبين 25 و30 درجة ببقية الجهات وتصل إلى 36 بأقصى الجنوب 

وتهب الريح من القطاع الشمالي قويّة من 40 إلى 60 كلم/س قرب السواحل وبالجنوب حيث تثير محليا الرمال وأثناء ظهور الخلايا الرعديّة ومعتدلة من 20 إلى 30 كلم/س ببقية الجهات.

أما البحر شديد الاضطراب بالسواحل الشرقيّة ومضطرب بالشمال.

إي.. نحب الشتاء .. ونعشق المطر.. 

صحيح طقس موش متاع واحد وحدو.. أما كى نتكلم فى طقس هكة الناس تفهمنى، على عكس العادة.. وكيف كلام الليل فى هالطقس نلقى روحى .. ونلقى وذنين .. ،

راديون، نحجم فى لحتى ومعاش وقت ، نزيد نبطى معاش نخلط على ترونسبور والأومبوتياج يغلب الكل .. .

خرجت نجرى، ما لبستش منقالتى.. الخاتم عالطاولة نسيتو، ما نسيتش الدخاو مفاتح الدار.. أما ما رجعتش،

ما غاضنيش نهار ثنين لى نخدم فيه ، ولا المنقالة لى ما نخبى عليها شيئ لى نحسبها طرف منى.. ، ما غاضتنيش اللحية وقت حجمتها ، سى بون إقتنعت لى مانيش مزيان، باللحية وإلا بلاش، بلى نعمل وقد ما نعمل حد ما يرى بيه، ما غاضنيش الآسك .أف آم لى نحيتو، ولآ كونط البادو لى بقى صلة ربط الوحيدة بالآكس، النومرو وبدلتو ومن غير ما نشاور الخدمة ولا نعطيهم النومرو الجديد ؛ باعث الطرح وليت، باعث الدنيا ومعاش نستنى فى شيئ ، أيست من كل شيئ ، هالبلاد ، ناسها ، وبردت .. قررت معاش نسئل على شيئ ، نحب نربح راحة البال .. .

الإثنين : 22 ماي 2017

حظك هذا اليوم : أخبار سارة تصلك قريبا 

إي.. وقت ينبت الورد فالصحرة ،

أيست ؛ مانيش فالخدمة، هي طلة خفيفة وزاد قوى كرهى والتعب لى على كتافى كى خرجت، شاد فرشى ، راكش، وباعث العالم .. أو العالم باعثنى ؛ لا فرق .

خايف . إي خايف وضايع وموش عارف ، 

رمضان معروف عاللّمة وأحنا عايلة مفرته مفركة تاكل فى بعظها وكالحزاز ناكل الخبط بالنيران الصديقة لى كثرت، كل رمضان نهرب نتخبى وكل مرة نكرى فى بلاصة وكل عام يوصى خوه باش يحصرنى وحدى ويذكرنى لى أنا وحدى، رمضان والأعياد تذكير فاشى متسلط يأكد لى ما عندى حد ، 

موش عارف فين نهرب والقعدة فى دار بابا مستحيلة كان ممشاش لى فيبالى ... 

ولى في بالى برشة ، تخمام بزايد وحكايات مشربكة حبيت نعمللهم ألبوم تصاور ونحكيهم باش نرتاح،

نلقى روحى نحكى لحيوط ولى يسمع ما يصدق .. ولى يصدق ما يكمل يقرى .. وما يكمل يقرى كان لى يسرق // 

حبيت نحكى تعبى وإخر حكايتى // نلقاها زايدة ، 

يمكن أكثر من كل مرة تعبت ، يمكن صوتى بح أو معاش عندى صوت ، 

يعنى شنية إخرها ؟ لا حقى المفكوك يرجع ولا حالى باش يتصلح ولا كلمة خير فى لخر ،

أيست / وأول مرة .. نكره هالبلاد ..

قد ما عطيتها من دمى وما راتش بيه ، قد ما خذات من تعبى ، وقد ما ستنيت .. .

أيست يا تونس أيست يا أنا أيست يا كلكم ! أيست وموش حاب على قهوة كذابة .. ولا موزيكة نبرد بيها أعصابى نسمعها وحدى .. . 

الخميس : 25 ماي 2017

نقرى فى كتيبتى ونضحك ،

توا هذا كلام ؟ لها الدرجة نعمل عالناس باش تحسسنى بالقيمة ؟ وشنية موش غايضتنى وموش عاجبنى وموش دراشنية ؟ كان عالآسك وما إليه فعل ماضى وخير كى عملت تسييقا ونضفت القديم ، كان مشكلتك فالدنيا آكس ما تضيعش لى بين يديك وإنتى تخزر لتالى ، لى عملو معاك الخايب كان ما إنتى عطيتهم الجنب ، الغلطة منك موش منهم ، نرمال هكة تحس هالكره الكل ؟ نرمال مزلت ناقم ؟ 

كرهت البلاد ؟ ساهلة  ، أخرج وأرجع كى تتوحشها ، كرهت هالناس ؟ أعمل دولة وحدك وما تدخللها حد ، كان عاليأس هذاكة عادى ، فى أزمة منتصف العمر تلقاك ، أزمة وتتعدى كيمة لى تعدى لى قبلها .

يا أنا فيقلى عيشك  ، أحسن حاجة تعملها تبعث العايلة الكريمة كيمة بعثوك ، ومعاش توجع راسك بحاجات تعدات ووفات ، بيناتنا خير كى ما كتبتش ، حد ما يستحق يعرفك كلك ، 

هانى حكيت قبل وكعبتين فهمو أو هكذا تراآ إليك ، وياخى ؟ عقدة فيهم النوارة والياسمين ؟ فى لخر كان المسكوكة وأختها !

موش أيست من تونس ، أيست من ناس تونس والفرق كبير ، 

أيست من مشى حويجة وإلى يهزو صغارهم لكل بلاصة حتى فى قباظة ، أيس من لى يقشر وياكل كالحيوان لى يفشخ فى الميترو ويغنى تقول فيراج ، أيس من تبزنيس الشلايك حتى الراجل كالمراء بلى قيمة فى زوز ، أيست من ختيشيبى عندو كنهبة و ما نعملو شيئ ، أيست يمكن مالدخان المضروب القهوة الباردة وهيا عمرها ما كانت بلاد فن ، أيست من كثر ما تستنى فى سراب موش جاي والوقت لى يجرى ، إيست البلوز ؟ أيست الجاز ؟ أيست الفن لى فى راسك ؟ أيست الكياس الطويل الضلام لى تشقو عجاجة وإنتى بالفرجة تنسى خوف الموت ؟ أيست الميساجات الحلوة لى تجيك ... ؟ صوت الوتر والريح وتمكسى الفلنجر فى راسك ؟

يزى .. حروفك عمرها ما جبدت بيك أما لى تكتب عليهم هوما صحاب العملة ؛  فيق وإفرز ،

وإلا ننصحك ، إبعد مدّة ، رتح روحك وتخبى ، كى تعرف الغلطة منين أرجع كى تصلحها، كون إنسان جديد وموش بتبديل القهاوى والشركة والمنقالة وخاتم جديد لا ! كون إنسان جديد موش إنسان لابس جديد ،

فهمت يا أنـا .؟ ملخر ننصحك ، يزيك من هالكبى ، وقيت تعيـش .

happy valentine day {vaut mieux tard que jamais}

فودكا، "طقطوقة" ـ كيمة تقول مرحومة منهم ـ البوانت فيها عملو كومة وفوضى كينى خرجت التخمام لى كان يدور فى بالى وصورتو على تابلو ببوانت سواقرى ودخّانى.. ومطعم الرماد، التابلو سوندريّة ونكتب بخيوط دخانى فالهواء حكايات هزها الوقت وتنسات، الكف لول مالدنيا الكف الثانى .. أول حب.. ثانى حب .. ثالث حب.. ووقت إلى هالقلب مات، سته أيام الخدمة وما قالت الناس ونروح بعد الوقت ونمشى زادة بعد الوقت وبيناتهم.. نستنّى، نسرح مع شباك جديد والمنضر موش لى ستانست بيه، أما ميسالش، نقول بينى وبين روحى "هاذى خدمة موش تحويصة ودلال، وغيرك ياكل التراب باش يعفس على ولاد الكلاب، أبعث عليك وخليك بلاش إحساس، ماكينة، مربوط بوقت وبعدو أعمل آش يضهرلك"

ونكمل كل نهار ونشد الثنية للدار بين وجوه هالناس الهايمة والأمبوتياج، كيت وشوية موزيكة تعاون وتذكرنى لى مزلت "إنسـان" ودخان.. نحرق بيه نهار تعدى بعت فيه من عمرى على شهرية، سعات نضحك.. وموش من غناية تذكرنى بحاجة ولا من فازة صارت ولا حب قديم ، كى نرى كوبل.. فى محبتهم لبعضهم.. فى ضحكتهم نضحك، آش عندى نعمل بربى؟ وقتى كى وقت زوز ملاين خدام الكل يتصبو مع بعضهم ! يلزم حاجة تونسنى.. وموش حد، نخاف نتعلق ونعلق ونصدق من جديد وكف آخر ما نجموش، هالناس الرهدانة الكذابة ما نجمهمش، مانجمش كيفهم نمسكى ونعيش تصويرة كذابة وإلّا يمكن.. ما تخلقناش كيف كيف، سعات نحس روحى نحكى لوغة ما نفهمها كان أنا.. لحن نسمعو وحدى ولون كان أنا نراه، وقت نحب نحسس لى معايا آش يدور فى تراكن عقلى ونحلم لى فهمتنى وعلى هبالى حبتنى.. قبل ما نصدق الحلمة تسيبنى، وعادى، موش هنا القلق يامة الحجات تتباع وتتشرى من أول الدنيا وموش خاطر أكثر واحد وقف قدام الفترينة معناها لى تهنيت عليك عندى، نعرف لى الإحساس ما يكفى شيئ ونعرف لى ماهيش أول مرة .. وخاطر موش إخر مرة قلت ميسالش، موش توّا،

تعلمت نبرد وموش أنـا البارد لى نعرفنى، بطلت القهوة وما مزال منها كان قهوة لى قبل المرواح و نزلت عالتيزانة.. تعلمت نسامح وقبلهم نسامح روحى ووفات الغيرة، وفئ لعب الغورة ومعاش حاسب شيئ حاجتى.. معاش نتقلق وقت تتسرق كتيبة أو تعرضنى آكس أو شطر آكس أو خيالها ولا لى تشبهلها تحركلى حاجة، بردت، أكثر مالبرد وليت موش أنـا.. لدرجت نضحك على كنتو وفهمت.. قداش كنت نكبش وخواف وببهامة نعطى سرّى وكلّى والسكينة لى تذبحنى؛ وحدى نشعل النار لى تحرقنى ونقول "دفئ" .. محلاه هالدفئ الحاصل! 

حبيتو دفئ محبة عشرة ونس مالدنيا وناسها طلع كل شيئ خايف منّو، والمشكل.. أنا توّا فلّى كنت نخاف منّو، أما مانيش خايف! 

يمكن خاطر فهمت.. ويمكن خاطر موش أنـا لى كنتو.. ، 

فى الحجات لى نحبها مزلت أنا،  نحب الياسمين ونعشق الفل وريحتو الصباح ترجعنى لصغرى ونحب الهريسة.. ناكل الحار أما القهوة ما تنجمش تكون حارة، نحب التشيز كايك نحب الدورات والبيتزا.. أما مايجيش معاهم صحن ياسمين، فهمت آش نحب نحكى؟ بالعربى فهمت إلى الحاجات تتحب صحيح أما موش الحل تلصقها فيك و معاك تخيل ندور مخبى الفل فى مكتوبى؟ يفسد.. زينو يمشى يذبل.. وفهمت لى كيفى كيفك نحبو الحرية وقت إنتى تختار خلاف لى خترتو أنا تخنقت .. و لمت عليك، خاطر نخسايب خاطرى عندك كى خاطرك عندى وقلت أنا لا وقت واتات نخسايبك كيفى تقول لا، ماتبيعش بالساهل وما تسيبش، أما هذا الكل تخمام قبل وباهت آش صبرك عليا وقت كنت معاك، وفهمت إلى حتى بلى صار الكل مافيه حتى معزّة ليا أو لشخصى يعنى هذاكة إنتى وطبيعتك كيمة إنتى، موش فيها خاطر ليا لحكاية وما فيها الصدفة والوقت لى حطنى فى طريقك.. موش كيفى كى نبدل طريقى وثنيتى على خاطرك، وموش نلوم ولا حاسبك عالخريطة ولا همنى تقرى ولا تحس، أما مانجمش نكتب لشخص مجهول لذى حتى وجودك بين السطور عبثى وموش كره، للضرورة الشعرية فقط،

إي تعلمت نسامح ووقت سامحت روحى على خيبت أمرى فيك .. رجعت الألوان، رجعت نرى البنات بنات ورجعت نخزر بعينين راجل ورجعت نرى المزيانة مزيانة و وقت معاش نخمم فى غشك وقررت نعيش ونعمل كيمة نحب وما عاش فمة لى يحصرنى ويحد بينى وبين الضحكة، سامحتك، سامحتك وقت الضحكة نساتنى فيك وفهمتك ، وقت وليت من نوعك ونخالط لى نوعك، قداش كنت مانيش سوسيابل "إنسان الكهف" تقول عايش! وقت لى بزنستنى وحدة.. ستدعاتنى على قهوة ومالقهوة كثرت القهاوى وضحكت، ضحكت معاها على الدنيا وضحكت عليك وقت ريتك بعين ما تعشقكش، ضحكت حتى سالت دموعى وفهمت قداش نفختلك فى تصويرتك وصغرت روحى، فى عيد الحب ما خممتش نطلبك والغريبة لى شريتلك كادو واحد آخر يتزاد للى مخبيلك كى العادة يعنى والعام لى قبلو، نسيت لى شريتلك تصدق! برغم نهار عادى عديتو نخدم وروحت فيه مخر أما ماستنيتكش، ما طلبتكش وما خممتش "فين نجم نلقاك"، لحضة هالبرد قداش ستنيتها وخبيتلها خاطر نعرف الوقت يداوى خبيتك برشة كلام وحجات وإثباتات باش وقت معاش يحكمنى الغش ويعميلى عنيا غيرة عليك وخوف نحكيلك بكل رزانة قداش وكيفاش، ستنيت هاللحضة باش نحى البلوكاج ونخلى خيط صداقة خاطر عمرى ما حبيت نخسرك.. إنسانة تعريت قدامها وتعرفنى "كان جات تسمع" وحبيتها تركينة نهربلها وتهربلى ووقت تضيق الدنيا أنا معاها وكلى لخاطرها والمصيبة لى نلقى روحى نبلوكى ونبعّد أي حاجة ينجم يكون فيها منّك، خاطر ما تستاهلش يمكن من قصت شعرك لولة من غير ما تقلى ويمكن بلى فهمتو بعد وليت خير منك واليلة نهزك بلاد النسيان ونسكر عليك، إنتى وغيرك ولى قبلك، وشيئ ما يقلق، لا وحش ولا شيئ، حـر وبدرجة غريبة مانيش خايف، موش نستنى فى شيئ ولا طالب منك تطلب سماح ولا تعارك، كيمة إنتى خليك والليلة نخليها بيك، إنتى وإلى كيفك، ولى كيفك برشة أما نحكى على عملونى محطة، من غير هنينى عليك، من غير ما نطلب إخر مرة ولا نختار إخر كلمة، من غير خروج درامى ولا ليلة حمرة، ولا شيئ من شيئ بدنى رفضك كالسم وعقلى تجاوز حشيشتو عليك، ما نطلب السماح من حتى وحدة زادة، هذاكة أنا عملت لى نجم وإذا لى نجم موش مكفى ما فماش علاش نطلب السماح، ما نجمش نقول "سامحنى خاطرنى أنا" برّه للى بعدى يمكن يرضى، خاطر الأكيد بلى يكون حاسبك فى حياتو موش باش يكون حاسبك قد ما حسبتلك وخليتلك بلاصة، وإلّا علاش؟ لا تمشى لا تجى أومورك، وشأنك لا يعنينى، ونهاية، عيد حب سعيد / هابى فلانتين روتار أما خير من بلاش، كى هالفحجة لى جاء وقتها وزعمة لا فات .