Poêle à bois / cheminée

عمرو ما كان تاريخ يبدل فى إنسان حاجة مادية، فقط هيا مشاعر وقت تحسبها بلّى تعدى من عمرك ولى مزال فيه وكى تحوصل لى عندك بين يديك ولى حبيت توصلّو وما خلطتش وبين لى صبح رماد هزّو الريح، التاريخ بنوامرو كى سباردرا / فاصمة تحطها على نفس الجرح، وتركبها لروحك لى ما فماش ضربة لى بديت من جديد بلى جرح ولا ماضى ولى مزال عندك الوقت الكل باش تعمل لى تحب عليه الكل،

كلام مزيان.. كلام ياسر محلاه وقت تلقها فرصة تصفى القلوب ويوفى هزان الخشم بميساج بتاليفون صفحة جديدة بعام جديد وقررات من نوع نبطل الدخان نولى نعمل كذا ومانعملش كذا نبطل هالثنية ونخرج منها وناخو ثنية جديدة نتعلم نطير ونتعلم ننسى خايب لعباد نسامح باش نبرد ومعاش نتلفت و .. برشة قرارت ،

أنا .. مانحبش نبطل الدخان، ما شريتش لبسة جديدة للعام الجديد، ما عملت حتى ريزيرفاسيون، ماكلمت حد باش يتعدالى وماقريت حتى ميساج فيه تهنأة للعام الجديد،

ما حبيت شيئ .. وموش جوّى سواريات الفودكا والبرشة حس.. ،

توحشت لمّت دارنا، خويا وبابا وأمّى ولو باش توفى بتخرنين أما لمّة 

ولليل ..

حبيت على شمينيّة ، 

حبيت على شمينية وأنا وإنتى الفراشية نغلبو فالبرد بتعنيقة تحت الكوات، حيت نلبس كلاسطى الحمرة الطوف الطويلة للركبة وملابس داخلية، موش أكثر من مريول خلعة وبوكسر يزّى، باش نقعد فى تعنيقتك أكثر ما نجم، حبيت حتى كى تغلبنى حشيشة الدخان ما نقومش ونبخل نقوم والبرد يخليك تلصقنى أكثر.. حبيت على شمينية .. وموزيكة وإلّا فيلم.. مايهمش شنية خاطر نأكدلك ماناش باش نتفرجو فى شيئ، لقطين من وسط برشة قباحة كيمة نحب نسميها موش باش تخلينا نفهمو هالفيلم وإلّا نحسو الغناية ..، حبيت عام يبدى بيك وباكو بيتزا فارغ وقهوة من يديا ، سهرية بلاش شراب خاطرك شيختى وفرحتى وكل حاجة بنينة أما فى وقت تعدى، وتوّا .. معاتش متاعى معاتش ليا .. ، أما حبيت .. ، موش معناها كى حبيت نلوم عليك وموش نعارك وموش جاي نسخف نقول رانى وحدى إنتى تعرف إلّى كان نحب نساء الدنيا نلمهم عندى، أما موش أنا لى نفركس على ليلة ..، يمكن نكتبلك خاطرك إخر حد نكتبلو، شطر آكس صحيح أما حتى الشطر موش شوية، حبيت برشة، ويمكن خلاف هالمحبة فالحجات لى نحب وجودك فيهم ما عندى ليك شيئ .. يملئ عينيك ..،

حبيت على شمينية وإنتى والنهار يكون بارد شتاء مطر ورعد كان لزم الضوء يقص ، على ضوء النار على ضوء الشمع كى نقلك توحشتك فالضلام تفهم لى موش تتقال لبدنك، حبيت على شمينية وبوسة موش بسرقة موش قدام العنين ومافماش علاش نعاركك على لبسة ، حبيت على شمينية وأنا وإنتى وسويقرات وميسالش .. خليها سكات.. ، تعرفنى نكره الحس والجوجمة الدنيا المعبية والعنين .. نكره الحاجة لى فى كل يد .. ونكره هالكتيبة خاطرها ليك، خاطرك موش باش تقرى وكان قريت راهو مخّر وصعيب كان تفهم ، 

حبيت على شمينية أما حلمتى وحلمتك موش كيف كيف ،

ما عندى نقلك كان أنستك بثنيتك .. ممكن غادى فرحتك لى ما لقيتهاش معايا.. 

ممكن مع غيرى تلقى لى حاشتك بيه ، لى تفركس عليه ، لى تحب تراه وتوريه بلى سلاسل الـ "لا" متاعى وبلى شيئ منّى ، فى لخر مانيش باش نقلك لا راك كيفهم ولا أخيب منهم ، كلام العيب بالأخص فيك ما يتقالش ، ما نتمنالكش شيئ ، لا باهى لا خايب ، كيمة خليتنى ندفن حلمة نخبى ضحكة نوخر فرحة نزيد فى كرهى لروحى ونرخص كى نتباع ونتبدل مرة أخرى .. نحكيلك إخر حلمة
حبيتها معاك.. ،  حبيت على شمينيّة .. وأنا وإنتى .. ويزّى .

The ART of Letting Go

نرمالمون ما نكتبش ، عالأقل موش توا موش هكة، كأنّو نكتب خاطر راس عام وريق متاع باش نبدى صفحة جديدة بلى بيك و بلى غيرك ، ما حبيتش نكتب خاطر أمورى ما تعجبش ، وأنا كنت ناوى نكتبلك إخر خلامى ونقلك بسلامة من فوق مالعالى كيمة بسلامة لى قلتها إنتى، حبيت أومورى تمشى لاباس ونجم نبعد من غير ما نتلفت، وما نحبش فى بسلامة هذى نقلك توحشتك وتوحشت برشة حجات فيك ، و من غير كلام مرزى، ديجا خاطر مانحبش فيك سبيتك ستاتويات موش آرتيكل يقعد، هذا كان تسمى شوية ملى عملتو معايا كى عاودت كتبتو يتسمى سبان ، هذاكة إنتى ، هكة تخلقت وهكة آنا زادة ، أما على خاطرك حاولت وجربت نتبدل ، ومزلت على خاطرك نتعلم ونبرد، 

فالنورمالمون زادة نحّى البلوكاج ليك وغيرك وزعمة زعمة تعلمت نسامح ونبرد وننسى ووصلت لمرحلة باهية من السلام النفسى وأمرك لا يعنينى ، أما شيئ ، مزلت متغشش ومزلت نغلى بصريح العبارة ، ومزلت .. ما نجمش نسامح ،

الأكيد طبعا إنتى لا يهمك نسامح وإلّا طز ، إنسانة كيفك تتباع وتتشرائ نسّاية تبيع ومتراش بيه فاش نستنى منها ؟ وقت نكتبلك ونستنى فى كتيبتى تعرضك إنتى تفركس على أوفر وإلّا ديل لراس العام ، تفركس فى شيختك وما همك ونحسدك فى هذى لحقيقة ، تمنيت لو تخلقت كيفك ، تمنيت لو عندى مالبرد التمفريخ الشماته قلّة المعروف لى عندك ، تمنيت ونتمنى جيت كيفك نعرف نحسبها أما أنا وإنتى موش كيف كيف ، 

ما نجمش نقلك حبيتك حتى وفات المحبة ، أما حبيت برشة فيك ، حبيت تفاصيل مزيانة منك وفكرة لى عندى إنتى ، وحدها كلمة "عندى إنتى" توصف وتفسر وتفهم كل شيئ ، تمنيتك لى وقت تضيق بيا الدنيا نلقاك و موش نستنى منك باش تكون سوبر ـ ومن لا ، ما تمنيتكش توقفنى حبيتك تاقف جنبى باش ناقف على خاطرك ومعاك ، هكة أنا .. إنسان ما يعمل شيئ كان على خاطر غيرو وفى المضرة لروحو لوّل أول مايلقى روحو وحدو ، ما قتلكش حلّى مشاكلى وأكيد موش نستنى منك تعاونى فى حروباتى ، أما .. تمنيت وقت تاكلنى الخدمة ويصعب بيا تعبها .. وقت نكلمك نحكيو ، نحكيو أي حاجة وتقلى توحشتك ..، نحكيو قباحة نحكيو بلادة نحكيو على جيرانكم فيلم تفرجت فيه حلمة حبيتها معايا .. حتى وقفتك فالكوجينة ، حبيتك تحكيلى قداش من مرة جيت على بالك موش تسميلى لى ستدعاوك والمضروبين فيك ، حبيت بعد تاليفون منك نرجع نخدم ما على بالى خاطر نعرف لى عندى إنتى خلّى تتحرق الدنيا ! موش ربع منك والبقية بين زوز آكسوات و وجه جديد كل مرة ، وستنيتك تفهم ، حكيتلك خوفى عليك ، وما فاد كلام ليل لا نهار ، وسكت .. بقيت نفركس فيك على حبيتو فيك وبدى يذوب بالشوية ، حبيت تخرنينك عركك وخوفك وقت كان عليا ، كسوحية راسك وقت تتغشش وتتهرب تتسبل باش تعمل بانو وهكاكة تتخبى .. تخلى شرعك مبلول والبخل وكسوحية الراس لشكون؟ نعارك ونمرج باش تشيح شعرك وماقمت تشيح فيه كان ما ديجا هوا شاح ،

إي ، مزلت نتوحشك ونتفكر منك برشة ممكن ما ننساهش ، 

موش هذا لى حبيت عليه ، بالأخص معاك ، خاطر خلاف حبيتك فرحتى حبيت نفرحك ،

عالأقل حاولت وهذاكة لى نجم ، مانجمش نلوم عليك كى تحب تعيش حياتك، ما نجمش نلوم عليك خاطر أنا قلت لا ، ما نجمش نلوم عليك خاطر ثنيتك موش عاجبتنى وإلّا خاطر فركست بين الحروف باش تقلى بسلامة وزعمة زعمة جات منّى موش منّك ، ما عنديش حتى حق نتغشش كيف إنتى تحب تعيش هكاكة حاجة بقيمة وقتية ، موش خاطر حبيتك تكون كل شيئ وخترت إنتى تنقص قيمتك وتبع المضاهر الكذابة ، هيا حياتك ونرمالمون غشى عليك يوفى من وقت لى خرجتنى منها ، نرمالمون ما يهمنيش إذا مشات الدنيا معاك إلّا خلاوها بيك ، نرمالمون زادة ننسى كيمة نسيت إنتى أما وقت حسبتك برشة غايضتنى روحى موش إنتى ، كانت تتبدل برشة حجات كان عرفت حقيقتك من لول ، يمكن كيفك كيف برشة مضرة فى حياتى راضى بيها ونستنى منها فى حاجة تصلح، 

يمكن هنا الغلطة وقت صدقت إلى غدوة فيه إنتى تصرفت كى مولا المول وجبت ما عندى كان جيت عارفك "لوكاسيون" موش باش تدوم رانى فطّقتك ورحيت حق الضمد ؛ يمكن خاطر موش كيمة تخزر كيمة خزرت أنا،

عالأقل نستعرف ، نستعرف ببهامتى وقت ما حبيتش نسيب، 

فمة برشة وحش ما تستاهلوش خاطر نوعك ما يفهمش فالحجات لى هكة ، وخاطر كلامك مع لى ما يفهمكش كى بيه كى بلاش نقص كلامى ليك وأنستك بلى هوّا من غير ما نسمى لا نتسمى نسب فيك ، 

ديجا لاهية وصحة ليك وكيمة قتلك نحسدك ، صحيح تمنيتك تطلب قد ما توحشتك وما نجمش نكلمك خاطر رخص أكثر ملى رخصتو معاك فات كل الحدود ، ستنيت تاليفونك ، ستنيت فالمولد عيد ميلادى نهار أحد .. أي حاجة حتى ميساج ، وكى ما وصلش فرحت ! إي // فرحان خاطرك ما طلبتش ، موش تسميع كلام ولا هارب من وجهك

فرحان خاطر معناها جوك لاباس وماعندكش قلق ولا فضوة باش تتذكرنى ، فرحان لى جوك باهى، والله فرحانلك بالحق خاطر مانحبلكش الخايب ..

حتى كان صدفت وقريت هالكلام أكيد حاجة تفرحنى تكملنى أما موش توّا ، مزلت مابردتش كيفك وقدك ونخاف موش نخسرك ديجا خسرتك نخاف نكرهك ، ولو أنو الإحتياط واجب وفالأصل هذاكة علاش بلوكيتك

وهانى كتبتلك ، وتعرف لى كتيبتى قبر 

أما مزلت باش نتوحش فيك برشة عارف أما فاهم ويزّى ما ستنيتك ،

بنسبة ليا أنا مزلت كيمة أنا ، نسب فى كل شيئ ونرضى بالشوية ، نعديها على روحى بقهوة ونرضى روحى بتفاهات ومزلت حتى فالموزيكة كيمة أنا ، حتى بعد كل شيئ .. خاطر ما نحبش نعاود من لول وديجا جربت كل شيئ وما نفع لا نحكى لا نخبى ..

حبيت نقعدو صحاب ، حبيت نقعدو أكثر مالصحاب ، حبيت تشكيلى وأكثر مالكل تحكى ، حبيت منك لى ما تنجموش حبيت منك ماتخبيش ووقت تطيح بيك تلقانى ، حبيت أكثر من كلام الليل وما حبيتش نسميك خاطر النهار هذا ، ما نجمش نقول خسرتك خاطر هذا لى نجّم فوق طاقتى موش مرضّيك وقتها العيب معاش فيا، ومانيش باش نقول خسرتنى خاطر مانحبش نحسبها معاك ، يمكن عندك حق تبعد ومعاش نلوم عليك ، 

فهمت إلى وقت تربط روحك بإنسان موش هامو فيك شيئ ما يبدل فيه ، فهمت إلى كى نعرف لى تحبو وتكرهو ما يتبدل شيئ ، فمهت إلى الحاجة كى تصير معناها حاجة وفات زايد نبقى متفكر ونتذكر ونحكى ملى فات ، فهمت .. إلى برشة حجات فى هالدنيا تتشرى وتتباع وغادى القيمة موش كيمة نعطى أنا قيمة الحجات ، فهمت إلى مايلزمش نستنى من حد يتصرف كيفى خاطر حد ماهو كيف حد وفهمت ، إلى حتى هالحروف زيادة على شبع وموش مشكل إذا كتبتلك وما قريتش ، ديجا كنت كلّى ليك وعندك وحدك .. وما فهمتش .

أزرق

وستنيتك، فيبالى فرحتى إنتى وحلمتى إنتى ووجودك كل شيئ حبيت نعيشو ونعيشلو.. صباحاتى تبدى منّك وبيك بشوية بلادة وشوية قباحة مافيها باس المهم نحل عنيا نلقاك عندى.. خبيتلك منّى وخفت نخسرك وأكثر منها خفت عليك، خفت عليك من هالعالم حتى الخوف كلانى وحلّفتك تبقالى وحكيتلك قداش الدنيا جبدت بيا.. قتلنى البعد ورضيت التعب وقلت ميسالش، إخرها عندى، واسيت روحى بحلمة فيها ديسمبر دافئ ونوفمبر نطفى فيه شمعة تكون إنتى كادو عيد ميلادى.. كادو السّماء ليّا..

علقت فيك حلمة غدوة ونسيت لى تعدى نسيت التعب نسيت لى مشاو نسيت لى باعو نسيت لى هجرو ونسيت حتى لى حبّو.. وقلت يهون.. أكيد بعد التعب راحة و تخيلتك الرّاحة لى ستنيتها يا تعب قلبى يا إخر سطر نسيان يا ألف حلمة يا سكات طويل يا عذاب الليل.. يا إنتى ..

فيبالى الأزرق لون الفرحة وعلقت فرحتى بيك قلت كبر البحر كبر السماء كبر جوانحى بيك.. وقلت الحصرة لى حصرتها لروحى فى بعدك وقت ماعاد نقابل حد كينّى من ورى شباك أزق فالمدينة العربى.. وإلّا سيدى بوسعيد.. شباك مزيان وراه ألف حلمة وراه إنتى وحكايات مزيانة وضحكة مالقلب موش للتصويرة .. أزرق .. حبيت الأزرق خاطر تحبو .. وحلمت .. طلع أمارة متاع طيحة ضربة توجع .. أمارة فى بدنى تتزاد للأكسيدونات لى كلاتنى وطيحات الصغر وقت نزلع ركايبى أما وقتها كل طيحة تعلم .. تنجم تقلى آش عندى منك نتعلم ؟

.. أزرق .. يخلينى ما نجمش ناقف قدام المراية .. كى ضربة فى وجهك .. تحشم بيها ..، علمتنى نكره وجهى بدنى خدمتى مكتوبى وكل شيئ نحس فيه منّى.. علمتنى نكره روحى أكثر .. 

كرهت المراية حتى غطيتها وبعد كسرتها ، كرهت وجهى معاش حامل الناس تخزر فى وجهى وكرهت الأزرق اللون لى تحبو إنتى وكرهت نلبس كيمة تحب إنتى وكرهت حوايجى لى تعرفهم إنتى وكرهت بدنى .. تتذكر وقت كنت تحبو ؟ توا هانا الزوز نكرهوه لا نحبو أنا لا تحبو إنتى ،

ستنيت منك برشة وقت ما نجم نعطى كان شوية .. آش عندى نعطى بربى ؟ نتحير عليك وكى نحسك موش فى صحنك نمرجك ونسيب بلادتى الكل حتى تسمعنى ضحكة فالتاليفون ؟ آش نجم نعطى خلاف خوفى عليك وتخمامى فيك ونكون ليك وحدك بلى قسمة ؟ خلاف تعنيقة .. بوسة وحش موش كذابة .. قهوتين وفطور سعات ..؟ .. شيئ .. من غير لا نسمى لى نجمو ولى ما نجموش .. إنتى حسبتها مليح وأنا لى مفرخنى مزلت ما نحبش نفهم ، 

ولومى لروحى موش ليك .. وبره تعنيقتى دافية وبره ما نحبش فيك وبره نتذكرك كل لحضة وقبل نومى وبعدو وبرى قتلنى الوحش وبره بره بره ... 

نحب نبرد ..

الصّيف يوفى.. وتكمل الضحكة، يجى بعدو الخريف، تتخبى الشمس شوية شوية وتطيح ورقة ورقة من شجرة الفيراندة.. ما جائ الشتاء كان ما بقات عريانة.. كيفى، بلى بيك ولا أصحاب، ڨرسان والكبابط ما تدفيش.. حوايج الصوف ماتنفع شيئ لبرد الروح.. ، دخّانى ونسّى روحى ونكذب كى نقول هكة خير ، تعبت .. تعبت ومعاش نجم نخبيلك كلام أكثر معاش منجم نحفض أكثر بلايص نعرفك كاتراهم تحبهم وحكايات عليا نعرفهم يضحكوك.. معاش منجم ! معاش منجم نستناك أكثر ملى ستنيتك شطر عايش باش كى نحكيو هذا كان واتات وحكينا نقلك مانيش كيفك! بعدك ما عشتش سكرت على روحى وقطعت المفتاح وتخبت تحت الفرش وبعدت.. على ثنيتك.. وستنيتك.. والله ستنيتك وجيتك أكثر من مرّات ونسكت، ما نقولش هانى هونى.. نستناك تتذكرى وقت تتكلم نقلك هانى هنا ، 

معاش منجم... إي .. نحب ننساك نخرجك من عقلى ونطفيك ، نحب نعمل كيفك ونفركس على ضحكتى ، نحب نخرج من هالضلام نحب فرشى يولى دافى نحب ندورها شليلة ومليلة نحب .. نحب نرجع نسكر.. نحب نشرب وما نتذكرش شعرك وقت يهزو الريح ، ما نحبش نتذكر خاطرك ما تستاهلش وإلّا تستاهل ..، مانعرش مع شكون فيكم نحكى يا زوز بنات ، وحدة لى هيا إنتى أول ما عرفتها عسل الدنيا ومحلاك ، وثانية إنتى لى تبيع كل شيئ بساهل ، تبيعنى وتبيع روحك .. تبيع الدنيا .. ومانحبش نحكى أكثر موش خايف وجاعتك ، خايف نزيد نتذكر .. ،

حبيت أكثر من هكة معاك ، حبيتك حكاية مخبية وخبيت عندك منّى وخبيتلك لليامات لى جاية ، ما كفاك شيئ .. 

نحب .. نوجعك .. قد ما توحشتك ، ونحب ننساك كيمة نسيتنى إنتى ، نحب نبيعك كيمة بعتنى ، 

معاش حامل فى هالبلاد شيئ ووليت نكره ، وليت نكره نخزر لروحى هكة بلى قيمة عند لى عمتلو قيمة ونحب نهرب ، تخبيت بالضلام وخرجت النسوق فى الليل .. نلقى روحى مزلت نفركس على وجهك .. شتاء.. وقريب نثبت فى كل كوبل كل كرهبة كل دار ضوء شباكها شاعل .. نفركس عليك ونضحك على هبالى ، شعلت سيقارو وخرجت للشتاء تحت المطر وقفت وسط الشارع .. تنفخت .. قبل رونبوان الفلوكة .. ، نسب فى المروحين مالسهريات ونقول علاش ماكش معايا ؟ كملت دخانى فالمرسى .. 4 متاع الصباح .. الدنيا خلئ .. روحت .. نرقد ونقوم نلقاك مزلت على بالى .. تخنقت ... كفرت .. نسيت وكذبت وطيبت قهيوة ،  رجعت نقرى فى ميساجات السكايب ، وفرق بين أولهم وإخرهم .. بين يا روحى وعمرى ودينتى .. وبين هاك هونى موش ساعتين لتالى قتلى تصبح على خير ؟ تتبدل الحاجات ومشكلتى ما نحبش نبدل ولا نتبدل ، وإنتى طلعت أم البويا سماك ! 

أم البويا بطبلية بيضة .. تنجح .. عشية وموش عارف إخرها فين ، ليل طويل يستنى .. ومزلت نحب ننسى ومعاش نجم نخبيلك أكثر ؛ تعبت يا تعبى.. تعبت من هالبلاد هالناس ملّى كيفك ولى قبلك .. تعبت منّى .. ونحب .. نحب نبرد ما عينى فى شيئ ، لا نحب نعيش لا نموت .. نحب نبرد .. كهو .

Fear Saison

ديسمبر، هذا لى نخاف منّو، وقبلو خوف نوفمبر وبعدو خوف جانفى، خوف سيزون يعنى ،

ولو أنّو ماهوش خوف وعمرو ما كان خوف أما خاطر مالقيتلوش إسم هالإحساس لى دراكيفاش.. سميتو خوف، يمكن خاطر الخوف حاجة خايبة وهالإحساس خايب، خايب برشة زادة،

نرمالمون إنسان كيفى يحب هالأشهرة، خاطر نحب الشتاء صوت المطر فالليل دخانى وقهوتى مايواتيهم كان البرد ونحب المدالينة، نحب الكيسات الفارغة وركشة القهاوى البنينة ريحة المطر ونكت الماء عالبلّار الضلام وضوء الليل وريحة التراب وحيوط الجير كى يتبلو وأكيد.. صوتها فالليل يونسنى .. وسعات كى تركبلى ونهبط شوندوليى منهم ونشعل الشمع، وقتها نولّى فى دينتى معاش دنيتكم . تقول إنتى هالخوف وإلّا لى نسميه خوف منين جاء ..؟

خاطر وحدى.. وأنا فرحتى ما نحسها كان بالقسمة.. خاطر حتى كى نفرح نحب نحكى نحب نورى شعندى وما نحبش حد يعرف ، موش إنفصام، هكة آنا نأمن إلى إنسانة وحدة وقت تكون ليا تكفينى عالعالم بما فيه ، وحتى القهوة والمدلينة لى نحبهم يمساطو كى نبدى وحدى وريحة المطر تخنقنى .. تدخل للروارى وتمس الروح وتخلخلها.. تقتلنى بتقسيط ممل بليد .. وتخلينى نكره برغم مانحبش نكره .. ونهبل وناكل روحى نخرج من عقلى وقت نتلفت.. وما نلقى حد،

حد.. حتى حد باش تحكيلو تقسم معاه فرحتك تخرنن عليه يزين ليلك وتحس.. إلّى بايت فى فرشك وحدك صحيح أما عندك شكون.. ياخو بخاطرك ويخاف عليك.. ما يحبش يخسرك.. يقدرك.. وهكة يزى موش لازم محبة..

ديجا لى سميتو يعوض على كل شيئ !! وقت لى تلفت وما لقيت شيئ والسكات زاد والموزيكة قوات والشتاء بان ومراول الصوف خرجت .. وما لقيت كان كلام، كلام هزّو الريح كالرماد ولقيت روحى براسى ..

نواسى روحى ديمة ونقول العيب منّى برغم نعرف آش عملت وشنية ما عملتش ، نغمض عنيا ونقول ينعمبووها الدنيا ونحكى لاباس كذابة، وهالقلب تعبى حتى معاش ينجم، سكت.. حتى وليت معاش نجم فحجة جديدة.. معاش نجم نتعرف.. حتى كى تقلى وحدة بتفذليك "راك تعجبنى" نسمعها "هيا نخسرو بعضنا".. نسمع آكة لى كتبتو المرة لخرة فى آرتيكل "أيّا تجـــى"*

وباش نعوض.. خاطر باش تعيش وحدك صعيبة ولحقيقة صعيبة برشة زادة، نخلى خيال لى كانت معايا مونسنى.. 

سعات فى ليلة كيمة هكة نرجع للميساجات القدم نقراهم.. ونضحك.. على روحى أكيد، ونشعل كل مانلقى وعد محبة وإلّا حلمة مخبية وسط السطور، كأنى آكة الصغير لى وعدوه كى ينجح ياخو لى يحب حرق روحو فى لخر نجح ؛ ما خذاولو شيئ، طفاوه نساوه وقعدت فى قلبو .. وهالقلب آش هز، كينى نفس آكة الصغير لى حكيت عليه فى سنة أولى نسيان .. جاو خارجين حب يخرج معاهم؛ قالولو برّه بدل شلاكتك وإلبس سبادرى وهيا ، بدّل طاير .. وكى رجع يلقاوهم مشاو.. خلاوه.. نساوه.. ومزال عالعتبة لتوّا يستنى.. ، 

هكّاكة أنا.. نستنى، وكى ياخونى الوحش ويقوى نعطيها آكة التنسنيسة ، ونتقهر.. وقت لى نلقى حلماتى لحلمتهم معاك أنا تعيشهم مع غيرى، نتجن !! نزيد نجهل !! وسعات .. نكتب ومرات نحسب روحى ما ريتش.. وسعات.. نبدع فى تفسيخ عقلى، نعطيها آكة الجونته وإلّا ما كتب حتى نولّى شرشبيل وسط السنافر، 

كنت نكتب برشة قبل فالفازات هذومة، خاطر ما نلقى بيها وين كى السم لى يجرى فالعروق لازم نزيد نحل الجرح باش يخرج.. ونكويه باش يتبع السخانة..، كنت نكتب خاطر نخسابها تقرى، وإذا قرات باش تفهم ؛ باش تحس؛ باش تفيق..، نلقى روحى نكتب ونصبّح فى آكة البوكس نعطى فى نصايح تافهة عالمحبة ونقلهم عديلو كيمة عديتلها ودموع وخناين .. وقتها هيّا ساهرة فى سوسة وإلّا الحمامات كان موش ڨمرت .. شيما تاليفونها تحلو بسّيف خلّى باش تقرى 476 سطر محبة وعرك وغيرة وحش و.. تى سيب بركة حتى هذا موش باش تقراه ، 

نكتب خاطر فقت قداش كنت نزمر على سعدى؛ قداش حصرت روحى وأنا نستنى؛ فيبالى مسلسل مكسيكى والحق يبان والكارما لى كنت نمن بيها .. يدها ،

لى حقنى فهمتو من قبل موش من هالليلة لى وحدى هكة ميسالش؛ خير من صحبة كذابة .. شطرها ما يتحكاش ، غلطتى لى نخسايب الناس تتصرف معاك كيمة تتصرف معاهم إنتى ، وجبتها لا نخون لا نلعب تحت الخط رغم توفر الفرص، مشكلتى حبيت عالثيقة عاد عطيتها وستنيت ثيقة فيا ، وهذا الكل رد بالكم تعملوه ! ماتعطيو الثيقة فى حد !! راهم زنوس وحتى باش نقول كلاب الكلاب ترى بيه عالأقل !! راهم عالفرنك والفيزا و حتى بزازل أكبر بنسبة للولاد و آبدو بنسبة للبنات يطيشو ربك !! رد بالك تصدق لى مزال فمة خير فالدنيا ! وإشرى كرهبة ننصحك راهى فى تونس الكرهبة وسيلة حب موش نقل ! ونزيدك ، ريت كى تبدى تخرنن عالديستونس ؟ يجى واحد عندو كرهبة خير ملى عندك ويسكن ورى البلايك يولى فيه العسل ، لا ديستونس لا شيئ !! وأهم حاجة ، رد بالك تكون راجل أو فيك ريحة الرجولية ، تحب تسكر خليها تحب قعدات ديار خليها ماشية هيا و 7 ذكورة فيهم واحد يبزنس عندو عام خليها !!! خليها لا تولى رجعى ومتخلف ومعقد وياسر تكبر فالحكاية ! تقلك نحب نعوم بـ بيكينى ؟ قلها أهبط كيفى بقطعة وحدة علاش زوز ؟ يا ولدى باش تستحفض كلمة راجل فسخها من قاموسك ، خليها تعرى حتى يولى كلو على برّه ، وكى يخزرلها واحد رد بالك تكملو ، قلها ليها هيا "ريت محلى ضحكتك.؟ الكل يخزرولك"، الأهم .. الأهم مالكل يعنى ، رد بالك تعمل منها راس مال ، خوفك عليها راهو خنقة ، لا تخاف عليها لا تغير ، وخليك ديمة معبى إحتياط باش وقت تجبد بيك لا تحاول تفهم لا تعمل كى سمايا تبقى ترحى وحدك ، الدنيا تبدلت ، وكى تراها تبسم وإمشى لا تعنق لا تبوس ، كهو  ، كل وقت ياخو وقتو  ، يزى ما عطيتها من وقتك :)

عـــروسـة الشـــوالق

وسعات.. كيمة توّا، ياخونى الوحش ليك، نخمم نطلبك، نسمع صوتك بلى ما نتكلم، نسمع الحس لى داير بيك.. وأول ما نسمع حس لى معاك يسئل "شكون؟" نعلّق، نتهنى عليك.. ونكمل فى ثنيتى.. ،

نجم نطلب، نجم نجيك، نجم نلقاك وقت نحب ونجم نجبدك من كرش الحوته ونفكك ملى داير بيك الكل، أما موش هكة، موش هكة نحبك فى حياتى وإذا ما بقى كان هالحل بلى بيك خير، مانجمش نفرض عليك تتوحشنى وإلّا تعمل عقل وتفهم، هذى حاجة ما تجى كان منك.. وبكيفك.. وإنتى كيفك عالى وبنسبة ليا ياسر غالى، مانجمش نعطيك وإنتى تحب تاخو كرشك كبيرة وعينك التراب مايكفهاش، تحب كل شيئ وأنا بالخشم لى عندى قتلك.. يا أنا يا هوما، وأكيد هوما خترت ، ما نلومش عليك إذا ما عجبكش العجب ، إذا رخصت والطمع لى فيك خلّاك بالليلة.. كل ليلة وليلتها وكل ليلة مخدة وريحة ، 

نخاف نجيك ، نخاف نجيك نعنقك نفركس ريحتك نشم ريحت كرهبتو وإلّا برفان من فلوسو كأنك حاجة من حاجاتو متاعو ملكية أما.. كرية، موش على طول كيمة حبيت أنا ، 

نخاف نتوحشك ، كيمة متوحشك توا ونسإل على حوالك.. نخاف نزلق فالكلام ونحكيلك وتفهم لى ماعندى حد وموش هكة نحب نتوحشك ، نخاف نكلمك ونحكيلك قداش ضايع صايع غارق وإخرها موش عارف فين، مستانس ديمة نحلم حلمة بو زوز حلمة ليا وحدى.. فيها كان أنا.. هذى ما نجمهاش، نخاف يجى نهار لى نتوحشك وكى نراك ما نعرفكش.. نخاف تطلع صارتلك حاجة سكاتك طوال ومانحب نسئل حد باش حد مايجى يعاودلك، باش تفهم ! بالعربى نستنى فيك تتوحشنى؛ نستنى فيك تفيق مالتفاهة لى دورتها بيك نستنى فيك تفهم الفرق بين لى يعاركك خاطر ماتحبش تمشى وقوات بيك نومت صباح وإلّى يعاركك خاطر راسك وجعك وموش قد بعضك حبيت تروح وعندو هوامزال بكرى، حبيتك تفهم الفرق بين لى يتغشش عليك خاطر صباح بدى من غير صباح الخير من عندك وإلى هاز خشمو خاطر ما حبيتش تمشيلو تبات حذاه، حبيتك تفهم الفرق بين إلى ختار التعب ليه.. وإلى حبك تصويرة.. بين لى سايس وقت معاش تنجم.. وبين لى ماعلابالو بيك، بين لى عوضك فأقل من دقيقة كى غلبك النوم وبين لى مزال عايش بخيالك.. بين لى خلقلك تصويرة أحلى منك، ولى عملك "عـــروسـة الشـــوالق"

وما نجمش نلوم ، موش خاطر اللوم بعد القضى بدعة وموش خاطر نستنى فى دموعك باش نقلك "مانى قتلك" لا !

ما نجمش نلوم.. خاطر موش أول من خلاتها بيا، خاطر حتى كذبك .. عديتو قبل ، خاطر وقت كنت نحكيلك ما تقلى كان "بحرنى.. غرقنى بالكلام وكولنى هكاكة"

ريت وقت نقلك نقلك ما نبعد كان كى تسيب، وكى سيبت بقيت مكبش.. ، وإخرها تعوضت تبدلت وترميت، إي آش بيه، المشكل عمرو ما كان فيك ولا باش يكون، مشكلتى نصدق..، والحق الحق مشكلتى نحب نصدق ، 

ومن العادى وقت توفى هكة ، العيب عمرو ما كان فيك ولا فى الدنيا ،

العيب فيا وحدى ، خاطر مانيش نفحاوى كيفك ونفركس عالعشرة