.
نتفكــر أول ما قصيتهـا مع .. لى عمـرى ما سميتـها ،
كيفـاش حسيـت الدنيا وفات وإلى كل شيـئ فالدنيا بلى لون بلى مطعم وبلى ريحـة .. كالورد البلاستيـك ، حتى الخدمـة قصيـت عليهـا وشديـت الدار .. نسيت روحى وهمّلتـها وستنيت يـد تتمـد لوسط الضـلام وتجبـدنى ، فى رحلـة الدمـار النفسـى ورسالـة الإنتحـار الإجتمـاعى بنيـت حيـوط وقصيـت الخيوط مع العالم البرّانـى وسكرت الشبابـك والبيبـان .. وستنيـت .. . ماللول ستنيتـها "هيـا" .. تخيلتهـا بمحبـة ترجع وتوقفنـى على سقيـا وإلى نعمل فيه فى روحى .. ستنيتهـا "هيـا" خاطر ما عندى كان هيـا وعلى خاطرها هيا عزلت روحى عالعالم .. حتى إذا غلطت أنـا .. أو غلطت هيـا .. هانى نعدى فى ربطية باش معاش نعاودو هالصنعـة ، وهنا كل شيئ تبـدل .
لهنا الفايس بوك والعالم الإفتـراضى ،
خاطـر بمحبـة ولى تبعهـا من غيـرة ووحـش وعشـرة التنسنيس أسهل ، عالأقل بستـاتوياتها نفهم ، تصاورها وغيرهم .. ، أدمنـت الكونيكسيون ، وصلت أيمات ورى أيمات هنا ، ولحقيقة حكينا ..
وصلنـا للتفسيخ ونرجعـو .. عادى .. عرك مفرخ والطفولة لى فينا وكسوحية الراس ،
ولتـوه ؛ لليوم .. لغدوة/ تبقى هيا الأنثـى الوحيدة لى ننهـار قدامها ، نضيـع ونفسـخ .. ومعاش حتى نعرف نتصرف من أصلو ،
المهم .. هالفايس بوك كانلى قهرة .. وبرشة وجاعة ،
هيـا .. عسل الدنيـا ومزيانة .. وفنانة وحنينة والجنـّة .. والحيط لى عامل كى الباراج معاش معاها وبداو المعجبون والملحسون و إليه من هذا المجتمع الخرائى يتقافزون ، إعلانات الحـب والكومونتارات والفازات ، وخلاتها بتصاورها وفترة النقاهـة منى .. هاي وتلة هاي خرجات .. وأنـا هنا ، نعدى فى ذلك الحبس الإنفرادى الإختيارى ، باكو دخان وقهاوى .. داخل خارج عالكوجينة فى حوايج نوم، ميزانى طاح وثيقتى فى روحى إنعدمت ، حافـى ولحيـة متشرد وشعرى قفـة ، الفاميلـيا يخسايبونى دخلـت وخرجت فالحلـّة .. هبلـت أو ما شابـه .. وأنـا كلامـى فالدنيا قد ما ينقـنص .. قد ما نزيـد هونى ، فى هالعالم الإفتـراضى ،
رسائـل مشفـرة فى ستـاتويات ما تفهمهـم كان "هيـا" لحجـات وفازات صارو فى أيامنـا لى تعـدات ، ومن عركنـا والتفسيـخ .. المـور رمتاعـى كلـو بوبليـك ، باش تقـرى.. خاطر حبيتها تقرى، حبيتها تجاوبنـى لألف سؤال قتلنى .. وكل ما تزيد بحياتها لقدام ؛ زدت أنـا لتالى حتى نسيت كيفاش نجم نخرج ونقابل ناس .. حتى وقت لى خسرت كل شيئ لى بنيتو فى الدنيا فى الخدمة فى أي حاجة بعدها هدّيتـو ، موش قلتلكم رحلـة دمار ؟
شوية شوية .. وكان موش ليلـة عشيرة عمرى وكعبات عرفنـى بيهم الفايس بوك .. ممكن رانى إنتحرت ،
وممكن كان هكة المشروع ، بديت نكتـب فى قصت حياتى وبديت ببرشة كتيبة مرة بالعربية مرة تونسى دارجة.. أنـا وسكرة آش تعطينى ، حبيت حاجة تقول إلى أنـا كنت هنا .. عشت بيناتكم .. خاطر خوفى الوحيد فى هالدنيـا .. هو "النسيــان"
من وسط كتيبتـى فمة كتيبـة تشهرت ، كان تتفكرو "سنـة أولى نسيــان"
المصيبـة لى ماهيش الآكس لى نحكى عليها ، لكتبت خاطرها سنـة أولى نسيـان تجـى لى قبلها .. آكس صغرى وأيام القراية الفقر والتمفريخ ..الحلمة البنينة و هكاكة ، موش قلتلكم طفولة ؟
ولات فما ناس تحب تكمل الحكاية .. ووقتها فديت ، خاطر حجات أكاكة كى دمعـة الراجـل ! تصير موش ما تصيرش أما تغمض عليها عينيك ، ما حبيتش لا جامات لا ناس تبع .. وهنا فين فقت بإدمانى عالفايس بوك وقت نحب ما نكونكتيش وما نجمش .. وقت تبعثلى ميساج ومانجمش ما نجاوبش ، ولحقيقة.. دموع لبنات لى قراو سحـرونى .. تبننـت وجاعتهـم خاطر حسيـت لى وصلـت من وجاعتى ليهم .. حتى بكيتهم ، هنا إدمانى قوى وقررت نهرب ، مشيت لإخر خلـئ الكاف ، سيدى رابح .. وغادى كتبت خارج عن الموضوع.. وكتبتو عليها "هيا" .. .
فيبالى هربت لبلاصة لافيها كونيكسون لا من ريحتها باش نرتاح.. حريق فالذاكرة نردم بيه كل شيئ .. والعكس لى صار فى أول ما مشيت .. ، قريب العام .. ورجعـت، رجعت نافح للدنيا حاب نخرج وندور نسهر ونهمل وننتقم للى ما عشتوش وحرمت روحى منو ، رجعت ملهوف عالدنيا ، نحب نخرج ونفييس ونورى خرجاتى وقعداتى ونقول للناس ولروحى إلى نسيتها ، تصاورى مع بنات وريق السواريات وحلفت ! لا عاد نخمم فى أي رولاسيون من أي نوع ، لا أأون كوبل لا ليبر لا حتى شيئ من أي نوع علاقات ، نكذب كان نقول ما ضريت حـد .. فما بنات مشاو فالعفس .. موش منى أو ننكر أما .. عقاب هالرحلة وليت سادى الشخصية، وخاطر جربت نعطى الباهى وما نفعش .. وليت نزرع الوجيعة والورد ولّا شوك ، تبننت بكاهم وكلمت نحبك بشهقت الدموع .. وهكة .. عرفت لى أنـا موش باش نتنسى كيما صارلى مع "هيـّا" ، لى خذات كل شيئ باهى فيا وجردتنى مالإنسانية ، وهكة حلالى .. وتعلمت نوجع ونعفس كيمة تعفسـت ، كيمة حتى يد ما تمدتلى ، كيمة تنسيت .. وتبعت بالرخيص وتعوضت،
خلصو بنات حـواء لى عرفتهم وجاعة .. هوما موش سبب فيها ..،
وبعد هالحال فقت .. أما مخر شوية ..
قررت نبعد ومعاش نعلق بنات كيمة عملت .. قررت نكون إنطوائى ..،
ركحت جو الخدمة ، ركحت الدنيا لى دايرة بيا .. وكل شيئ عادى ..
قصيت الكتيبة و هكاكة حلالى ..
وفجأة ! المصيبـة .. تصدمنـى وحدة نعـرفها مالفايس بوك بعركة ، كيفاش نكذب عليها وأنـا عندى زوز بروفيلات ..، طلع فما سيـد مريض بيا .. يسرق كل حرف نكتبو ، كتيبتى حتى القديمة عندو !
رسائل المشفرة لى حكيتلكم عليها بينى وبين المدام سابقا ؟ من غير ما يفهمها نلقاه سارقها ! كومونتارات تحت ستاتويات تصاور القهاوى والقعدات كل شيئ !
حكيت معاه فيبالى باش يفهم وتجاوزت الموضوع ، فيبالى كى سارق تشدو بعظمتو سى بون وفاء الكلام .. بعدها .. تصير كارثة أكبر .. ،
فمة صفحة إسمها "الحـاج وسكـى"
نلقاها مهبطة من سنة أولى نسيان .. والأدمين يطلب فى جامات باش يكمل ،
يا معلم ! إلى حاطين جامات أكثر من الليست دامى بالليست دامى متاعهم !! الصفحة فيها قريب ميتين ألف !! سبيت فى كومونتار وهبلت .. كلامى تسرق كينو هزلى صغرى معاه .. جهلـت .. وكفرت حتى تخنقت .. وكى طلع سارقها من باج تسرقلى زدت تجنيت !
والأدمين متاعها ؟؟ آكة الميبون لول لى حكيت عليه ، متاع البروفيل لى شديتو بالكمشة ومنو هوا ما نعمل حتى فالباج هذى لا نطلع نشهر فى سارق مريض كيفو
...، لى يقراولو مصدقين لهو كلامو موش يسرقلى وعلى فكرة ، مريض بالحق السيد هذا زادة هاو باش يسرقو وبالحق موش نفذلك .
.. وغلطة كبيرة عملتها ، حقنى وقتها فركست عليه موش توا ،
سرقلى أكثر من حروف ..
فالعادة السرقة ما تقلقنيش ، عادى باش راجل يحير فالكلام .. خاطر يحبها وما عرفش كيفاش يقولها ميسالش .. هز ..
أما باش تنتحل شخصى .. وتزيد تلصق ذنوب بنات كركرتهم للفرش بكلامى !! توصل تنحيلهم فلوس !! تدعى لى إنتى تقرى ميدسين وأمورك ، تنكر فى أصلك وتقول لى إنتى من بلاصة أخرى أومورك ، تستعار من خدمتك أومورك زادة ، أما تسبنى ونولى أنا سبب باش سيادتك فرشك يبقى دافى ؟؟ مانيش ناقص ذنوب أكاكة !!
آفاق بـن شهـد ، إلى تكتب فى ضـد السلطـة وبرشة يعرفوها من
"Un silence assourdissant"
لى كانت تكتب معايا هونى بإسم #البـــومة
صديقة مقربة.. وكان موش منها راهو ما فماش هالصفحة .. لى بكل أسف تشلكت !
حبت تعملى باج باش حد ما عاد ينجم يسرقلى كيف هالمريض .. وتوا ضهرو مرضى أخرين ، كنت نعانى فى واحد توا ولاو بالبالة .. . تتفكروها آكة ستاتو هاذى ؟؟
.
أوكـى .. ، طبعـا العنـاد حاجة عادية فى مجتمعنـا المتخلـف ، القدرة عن الإبداع محدودة .. نضرا للخوف من العواقب ، لكن .. ما تنجمش تلوم ، موش إكتشافك لطريق أقصر يعنى ملكك للطريق ولا لأحد سواك أن يعبر فيه ، لا يعنى إنتمائك لركن بهذا الكون أنّ لا لبعدك أحد .. حق فى الجلوس بأطلاله ..، حتى فالعلاقات ، قصيتها يعنى سيب العزى تشوف حياتهـا ولا باس ، الإنسانيـة لى فيك تضهر وقت تتعلم تتخلـى عن الأشياء ، ولو أن تعلق يكون برابط روحـى .. تبقى الإنسانية لى فيك هي لى تقتل جشـع الملكية النرجسـى ،
والموضوع اليوم موش الآكس ،
فمة فرحـة .. نحب نقسمهـا معاكم ، وفمة غــش زادة ،
الفرحـة كى نلقـى روحى أثرت فى ناس من ورى كتيبـة ، عملو باجات تقول رد خبـر .. على سبيل المثال "الحكايات لى ماكش باش تحكيهم" ، "حكايات ما تحكاو لحد" ، "حكايات حتى حد" .. ، وهكاكة ، جوست حط كلمت حكايات فالروشارش وتاو توف خير الله بكل ألوان الطيف ، المفرح إلى تأثرهم مبنـّو .. <3 وباين ،
من أسامى الأرتيكلات للمواضيع والطريقة ، وشخت أكثر كى لقيتو تأثر موش سرقة ^^
مبنهـا .. وقداش شخت بيهم ، تقول جيل جديد .. نصنع فيه .. كى ولادى <3 !
لكن طبعـا وحسب البرامج التلفزية ما فهمتنا ، لازم فمّـا كبّــول !
سى الطحان إلى مزلت عامل على مرضو جـو ،
فمة صفحة إسمها تخلويض ، فيها بسيكوبات و سوسيوباث .. حتى شلاكة بو صبع مجاش ، يسرق كل حرف نكتبـو ويحكى لى آنا نسرقلو ، أكيد موش مقلقنى بالنسبة ليا "samir hizi" جرد مريض آخر يتزاد لليسته ، أما المشكل فى أنو يستغل كلام نكتب فيه باش يركح بنات بمحبة للفــرش .. إيه .. ومصدق ، جربو تحكيو معاه ،
هبط ستاتو قبل .. فركست عليه وقالولى فى حي تعمير و هبطلو حتى "فين قال يقرى"
للأسف زياراتى الفجأية ما جات بشيئ .. ، الحاصل ، بلّاهى قلولو يشكى بيّا هاو إعتداء لفضى وآكة الفازات الكل وتهديد بالقتل والإغتصاب ، وراس أمك كان نحصرك حتى قدام حاكم تحقيق :)
الحاصل ، هاو باش نعطيه فرصة من هنا لنهار الأحد باش يفسخ الكل موش كان آرتيكلات، مكانش نوريكم حجات لى ما يحب حد يراها و ديسولى ، أما هالمخلوق 3 سنين ديجا عايش حياتى ، لدرجة مانيش نكتب منو هوا ، لذى ، وجب ما ذكر ،
فهمت ها صاميــر ؟ أوكى حبــى ..؟ أوكى ؟
.
ريتو قداش كلامى كان واضح ؟ الفرق بين أنك تبدع أو تسرق بكل تخلف .. تعمل كوبي كولى أو تقرى آرتيكل تعاود تكتبو بطريقة تشليكية !!! عيب والله ..
تاو تلقاوها فى أول ليان بروفيل هالمخلوق الهلامى لى حكيتلكم عليه وباج مالباجات لى شلكو هاذى .
... قبل كل شيئ نحبكم خاطر كان موش منكم رانى موش هونى .. كان نحب حاجة .. هيـا السماح من برشة ذنبهـم الوحيد إمنو بيـا وقت أنا فاقد ثيقة فى روحى ..، وبربى.. قبل ما تقولولى أرجع إكتب ، سينياليو هالخراوات :)
#الـغراب
