الجميلات هن الثوريات ، الجميلات هن القصيـرات الطويلات النحيفـات المرمرمات .. الجميلات هن ذوات الشّعـر الطويل القصير ذوات الأنوثة ذوات ساك شانال بآكة الحسبة وبآيفون 5س أكيد ، مفتاح فرارى أو لمبرڨينى ديابلو يعاون طبعا !
الجميلات هن الثوريات ، الجميلات هن المتصورات على القمـم .. من كافى دى آر وسيدى شبعان لـ نوفو أوتال و الجمايكـة لمن لم تستطع إليه سبيلا ، لكن طبعا .. الجميلات هن الثوريات ، لى يتصورو يد على يـد مع البوات فيتاس طبعا ، هن الثوريات إلى يثورو على حوايجهـم قبل عقلهـم ويقطعـوها ولو بالّام .. لأنهم فى تمرد على المنطـق وعلى المعقول موش باش يثبتو وجودهم بتاتواج كلمة لمحمود سخـط فى صدرهم لى على برّة..وقداش مبنها ومسهلها تلك الثورة الجميلـة .. لأنه طبعا الجميلات هن الثوريات ، لأن الثورة فـن ورسالة إختلاف .. مافيها باس نرخصـو المرا لى ندافعو عليهـا ونخليوها تدافع على رخصهـا زادة .. شنية المشكل ؟ موش قلنـا الجميلات هن الثوريات ؟
إي نحبـك تثـور وتدور وتسكر معايا وتكون ثورية ومتفتحة بدرجة نعمل معاك لى نحب من غير ما نصوحبك ، نحبك تكفر كى نحكيلك عالعرس بـ 4 تقول جهل وتكفر وزيد حارة بيرة عالفازة ونزيد نروح بيك .. خاطرك مزيانة موش على حاجة و الجميلات هن الثوريات.. ، نحبـك تناقض روحك .. ومبنّك كى تجيبها تفهم وتقلب الفايس بوك ! قدّاش نشيخ كى نعملو قهيوة تحكيلى عالقومية .. العروبة .. مناشير 86 وفوضى الوحدة .. تحكيلى على 64 وحق العودة وإنتى .. تتبنن فى سيڨـارو عالآماريكان .. كى نتفرج فى شفايفك تحكى ودخان يتسرسب .. وسط سدرك وبرسينڨاتك .. تاتواجك ودجينك المقطع .. آكيد خاطر الجميلات هن الثوريات ، كى تروح من سوارى الهالويين الريفييون وحتى العيد الصغيـر .. وريحة الفودكا فانى لى طالعة منك نحبـها ..، الجميلات هن الثوريات.. ودبوزت الفان روج الرّاقى على الإكسبوزيسيون الجديدة ، تابلوات الفوزان وإنتى تتفرج فيهم وكاسك فى يدك .. ومفتاح كرهبتك .. وضهرك الباين .. ، قدّاش مبنّـك فى لون الحزن آكة الروبة الكحلة لى ضهرها باين وقدامها باين ولا موش قصيرة .. فيها فونت .. ، خاطر طبعا الجميلات هن الثوريات .. مانجمش نصوحب أوحتّى نتعرف على ما شابه الأخت لى سميتهـا ..، للأسـف أنـا جاهل بالثوريات .. ولحقيقـة عندى ثوريات أخرين بحكم الضروف الجديدة عرفتهم .. خطوط حياتنا تلاقات بحكم التغيرات الجديدة لى تفرضها حياتى ،
مانجمش نخرج مع وحدة من هالجميلات .. لا أسطيع !! يا حبـى شيئ أقوى منىّ !!
ما نجمش نصوحب وحدة هوسها أنها تجمع معجبين ، لأنها بعيدا عن عالم الإثارة لا مكان لها قررت تدافع عن قضايا منسية ، تناقض روحها فى فوضة مستمرة وقت تحب تأكد جمالية "الأنوثة" وتدمر كل ما فيها من معنى ، وقت تلبس كل ما يجبد العنين وتمشى فى وسط الكياس شماته .. وتحكى على عنين الناس لى قلقوها ، وقت تحب تثبت لروحها لقبل غيرها لفمّـا شكون يشتهاها ، يعجهـا المصوحب وأكثر منو المعرس .. باش تثبت لروحها لهيـّا عندها قيمة ، عاجزة فعلا عن إقامة علاقة مع طرف واحد .. تخاف بالوقت يضهر تڨربيعها الفارغ .. قدّاش المعنى تبدل بين لى كنت نراهم ثوريات .. وثوريات وهومة مافيبالهمش لى تعرفت عليهم .. بحكم سبق وحكيت عليها ،
تعرفو شكون الجميلات بالحـق ؟ خطانـا مالشعـر الطويـل وبوسات الخال ودراشنيـة ، خطانا من المارك ديبوزى فاللبسـة والبارفان ، خطانا من الشكـل بكل تفاصيلـو وإيجا نحكيو ،
موش مشكل ثقافة زادة .. فمة شكون حكمت عليها ضروفها ما تتعلمـش كى غيرها .. أما قلبـها باهى ، هذيكـة مزيانة ، تعرف شكون أخرى مزيانة ؟ فمة برشة .. .
التـوانسـة العادييـن لى مايحبوش يخرجـو من قشرتهـم ، لى غلبهـم الواقـع .. كيمـة آكة الطفلـة لى تخدم فى "جينيفار" واقفـة نهار كامل وتضحكلك كى تجى داخل ، كيمة لى تخدم فى زارا و ساليو وغيرهم .. تذكر كى تجى خارج قداش بقاو واقفين باش يعجبو سيادتك .. ، تعرف شكون آخر ؟ آكة كى مسكينة بوها خنقة دبرت ركشة وشهريتها موش مكفيتها .. لقات فرصة باش تشم هواء ولو ملوّث أما أرحم مالخنقة ، ما تزيدش تخنقها وتعبها معاك يا ولد الناس ، وأزين وحدة .. بهلولة تخدم فى معمل .. غصرة الترونسبور والمرج واللّز وكى تجى تقابل سى الطحان تجيبلو باكو دخان .. آكة البهلولة لى ناقصة ألف حاجة .. الكولون بالمونيكير وفطورها مالدار تلم باش تشريلو تاليفون ويبقى معاها .. ترضى فيه ومسكينة ماهيش مزيان .. فى عينيه ، بنسبة ليا زين الدنيا فيها .. وما ننساوش تونيزين لوف ستورى ، آكة البنوته لى دخلت سونتر دابال على شهرين شدان يد .. 7 سنين ديجا تعداو ، وهو وهي يلمّو .. يحسبو وحدهم .. ،
قدّاش من أنتارن عينيها محوقة مالڨارد .. مزينها .. ، قداش من طفلة قوات بيها الدنيا ومزالت واقفة .. بنات فاك العلوم الإجتماعية لي ما هبلوش مزالو .. كل وحدة عرفها خرآا أما صابرة .. ،
للبنات لى يخدمو فى ريستو باتيسورى فى قلب السخانة ميليتار و المعلمين فى إخر الخلاء .. للى حربهم تبدى كل صباح من أول ما تحل عينيها للكاريا فى الشرق وتقرى فالغرب .. ، مزينكم .. ونحبكم ..،
أنتومه الثورة موش وحدة تحكى على فرشها شكون جاب البارح موش وحدة تعدى 18 ساعة نوم وكى تقوم 4 فالماكياج موش وموش وموش .. للى تبلع السكينـة بدمها .. نحبك .. للى قوى بيها تعـب .. نحــبك .. ، للى تعبت نحبك للى مزالت تحلم بغدوة نحبك للى مزالت تمنى روحها بنهار حلو نحبك .. للى ماكتبلهـا حـد .. "نحـــبك"
ومزيانة ..كان موش فى عيناهم ..، فى عنيّــا يزى .
للى ما سميتهمش الكل ..،
نحبكــم .. زينكم لداخل وأحلى من قشـرة .
