آ ـ ديـــو

الليّــلة .. نكتبلـك إخّــر كــلامـى .. ماتخـافش ، مانيـش باش نقــول توحشتـك و لا مـزلت باش نتـوحشـك ، مانيـش باش نحكـى من حكـاياتنـا القديمـة ، مانيـش باش نحـاسبـك علـى كلام ماكنتـش قـدّو .. كى قتلـى هانـى معـاك .. لإخـر العمـر .. مانيـش باش نحـاسبـك علـى ألـف حلـمة وحلمـة وعدتنـى بيـها .. من حقّـك تنسـى ومن حقـك تعيـش ، من حقـك تمشـى .. من غيـر ما تتلفـت وراك .. مانجـمش نحاسبـك عالنسيـان ولا نحـاسبـك كى نتذكـر آنـا ، من حقـك تعيـش حيـاتك .. خاطـر أحنـا ثيـن .. موش واحـد .. تنجـم تعمـل إلى تحـب كيمـة تحـب .. من غيـر ما تستنـانـى نقـولهالـك زادة .. أما الليّــلة فهـمت إلى الدنيـا ماتاقـف علـى حـد .. حتّـى عليـك يا "إنتـى" .
يمكـن غـدوة نضحـك علـى روحـى وكيفاش ستنيتـك .. يمكـن زادة ننساك .. كيمـة يمكـن نحسـب روحـى نسيتـك و"الوقـت يداوى"
غـدوة تطلـع شمـس الصبـاح .. يكتـب المكتـوب وتجـرى رياح الحـب مـع غيـرك ، يمـكن ماتكـونش مزيانـة كيفـك .. يمكـن ماتكـونش حنينـة قدّك أول ماعـرفتـك .. ينجـم يكـون شعـرها قصيـر وتكـره الكحـل .. يمكـن زادة .. تكـون نسخـة عليـك .. بلّـى يكـون إلّـى مخبيـه غـدوة حكـم المكتـوب ماتكـونش إنتـى ،  مانيـش باش نقلـك تذكـرنى .. ولا باش نطمـع منـك فى حاجـة ، حتّـى إلّى نحبّـو فيـك يجـى غـدوة ونلقـى لأحلـى منّـو ، مانيـش باش نحكيلـها شيئ عليـك .. ندفنـك حكـايـة ، وهكـة تنجـم تهـز مرساتـك وتمـشى من غيـر ما نادى إسمـك ولا يونسنـى خيالك ، غـدوة جاي .. حـد مايعـرف آش مخبـّى أما فمـة حجـات واضحـة ، منـك نتعلـم .. وإلى طلبتـو منـك أنساه .. من غيـر ماتقلـى هانى معـاك ، من غير صداقـة ملفـوفة بالأسلاك الشوكيـة ، من غيـر ما تدعيلـى ولا تدعـى عليّـا .. جـوى باهـى ولاباس .. ديمــة لابـاس .. .


مانيـش نحكـيلك ولا نكتبلـك ، نكـتب فى هالحـروف لروحـى ، مفمـاش علاش باش نكتبلـك بصـراحـة ، برّى لصبابطك والروب والسيكان كى تتوحـش حاجـة رومنسيـة منـى ، أه ! ريـت ؟ شعـرة لا حكيـت عليـك ، تعـرف كيفـاش ، يزيـك ما سمعـت .
الليلـة حكـايتـك تـوفـى ، الليلـة حيـاتى تبـدى ، وغـدوة مايخوفـش قد ماكنـت نخاف من فكـرة نعيـش بلـى بيـك ونسيت إلى آنـا ديجـا عايـش بلـى بيـك .

#غــدا يــوم أفضــل ^^

هنّينــى عليــك {بســـلامــة .. }

بالطبـيعـة .. مافمـّاش أخطـر من أنـّك تقـعد مـدّة طـويلـة وحـدك ، موش ضـرورى "وحــدك" معنـاها حـد ماهـو معـاك أو حـد ماهـو فى حيـاتـك .. ينـجم يكـون عنـدك صحـاب ومعجبـين وعشـرة قـديـمة ، كى نقـول وحـدك نقـصد أنـّك ماعنـدكـش لشكـون تـرجـع بعـد نهـار طويـل .. كـى تحـب تخـرج تدور ، تسهـر ، تعمـل قهيـوة .. وإلّـى حتى تمشـى معـرض ،  إكسبـو ، مسرحيـة ، فيستيفـال ، سوارى وإلّى حتّـى تتطلفـح فى الزنـاقى والشوارع .. ماتستحقـش تفلـى النـوامـر المقيديـن فى التاليفـون تلقاش شكـون .. وإلّا تهبـط آكة الستـاتـويات من نـوع "شكـون يعـرف قهوة مزيانـة؟ " وإلّا "شكــون عنـدو مخطـط لنهـار اليـوم" وسعـات "شكـون قالـق" وغيـرهم برشـة ستـاتـويات تافهـة ، المقـصود منهـم رانـى مخنـوق وحاس روحـى وحـدى إيـجا نحكيـو ...  إيـجا ونّسنــى ...

سعـات كى تحـب تحـس بوجـودك ، تفهـم إلّى الوحـدة هي برد المــوت .. راحـة صحيـح أما ‏شنية‬ قيمة اللحضة الحلوة إذا ماتقسمهاش؟ شنية فايدة الفرحة إذا ماعندك لشكون تحكيها؟ شنية فايدة البلايص المزيانة كى تقعد فيها وحدك؟ وحتى إذا عندك الزين شنية فايدتو إذا حد مالاحضو؟ ..الخيوبية تولى أحلى إذا فمة شكون معاك.. وهالخيوبية موش مشكل عندو.. وأنـا مليت من عشرت نفسى!

وكيمـة قلـت ماللوّل .. مافمـّاش أخطـر من أنـّك تقـعد مـدّة طـويلـة وحـدك .. ولـو عمـرك ماتتسمّـى وحـدك .. إذى ذاكـرتـك قـويّـة .. وإلّا كى يغلـب الوحـش ..

تـرجـع بالوقـت وحـدك لوقـت إلّـى كان عنـدك شكـون .. تتـذكـر بحجـات بسيـطة ماضـى تعـدّى .. تعـاود تعيشـو.. تبـان البسمـة .. تضحـك وحـدك .. تتخلـبز المشـاعـر.. بيـن خنقـة توّا وفـرحـة قـديمـة .. سيڨـارو ورى خـوه ..خيـط الدخـان وزيـد عليـه المـوزيكـة .. وخلات .. إذا عـرضتـك حاجـة قـديمـة ..


هكـة ضعـت ، الخـوف من عـلاقـة جـديدة خلّانـى نرضـى بتفاصيـل علاقـة قـديمـة .. نرضـى البـرد والوحـدة .. نكـون الصندوق المسكّـر  ونسمـع أكثـر .. صحيـح نسئل مابينى وروحى سعات.. كى نحكى ميساجات مع بنات مايعرفونيش.. يحكيو قداش حبو.. قداش توحشوه.. يحكيو كلام حلو حبو يقولوه وبرشة معزة وغيرة.. محبة.. سعات نغير.. إي.. خاطر ماعندى حد باش تحكى عليا هكة، سعات نسئل كيمة توا.. "كان جات عندى شكون.. تحكيلى وتحكى عليا هكة، قداش الوضع راهو تبدل"
بعـدها نتفـكر إلّى هكـة خيـر .. عالأقـل مانخـاف نخسـر حـد .. مانخـاف نخسـر شيئ ..


وسـط هالجـوجمـة بيـن آنـا و أنـا .. مرة نقـول لروحـى فيـق يا إنسـان وأعطـى فرصـة ليـك ولغيـرك.. ومـرّة نرجـع ونقـول أخطـانى ..

الفـوضـى فـن .. ومن وسـط هالفـوضـى كتبـت كلام .. قراتـو هـيّ ..
كلمتنـى بعـد هالمـدة الكـل .. باش نتقـابلـو ، أكيـد فرحـت ، تفجعـت زادة .. تبلبـزت .. ضعـت أكثـر مانـى ضايـع ديـجا أما قـرّرت نقـابلـها ونشـوف أحـوالهـا ..


لحقيـقة .. حبيـت نـورّيهـا إلّـى جـوّى باهـى .. إلّـى كى كتبـت .. كلام ليـل مافيهـش معنـى .. حبيـت نعتقـها من حيـاتـى ومرجـى وتعبـى وكلّـى .. وفى نفـس الوقـت .. حبيتـها عنـدى .. تمنيـت الحـال يتبـدّل .. مانعـرش كيفـاش هالمستحـيل يصيـر .. نتمنـى فى معجـزة .. فالـوقـت والمـكان ... [ريتـو حكايات حليــمة {اللـه يرحمهـا} فيـن وصلتنـى؟]


أوّل حاجـة عملتـها بيـن فرحـة وخـوف كلمـت "ليـلــى" .. تلـك الصـديقـة إلّى نتكّـى عليـها كل ما يقـوى بيّـا تعـب الدنيـا .. إلّـى ان نهـار لقيتـوها منتحـرة راهـو منّـى .. أو لقيتـونـى مقتـول راهـو فدّت سايـى ! {علـى فكـرة حتّـى تلقـاونـى مقتول ماكمـش باش تعـرفـونـى، أكـيد موش باش تلقـاونـى كاتب بدمّـى "الغــراب" يعنـى}

عاد ليلـى جاتنـى تجـرى ، قـرات إلـى حكينـاه وسئلتـنى مليـون مرّة علـى حكينـاه حتـى بعـد ماقراتـو .. بعـدها بدات فالأفكـار الشريـرة ، فالعـادة نعـرف كيـفاش نتـصـرف فالـرنديفـوات .. أمـا معاهـا هي .. ننسـى كـل شيئ .. هستيـريا وفـرحـة وخـوف وتخيـلات لألـف سينـاريـو ينجـم يصيـر..
ليلـى نصحتـنى برشـة .. نصـائح مـحلاهـم رغـم الغـريب منهـم ، أكـدت عليـّا نخلـّى اللحيـة ومانلبسـش لكحـل ونحكـى كذا ومانحكيـش كذا وحتـى فى ليلـة الـرونديفـو بعثتلـى قريـب 60 ليـان لبلايـص مزيـانـة تلمـنا ..
كان موش من ليـانات ليلـى .. رانـى دخـلت فى حيـط .. خاطر ليلتـها كى طفـل صغيـر فارح بالعيـد ماجانيـش نـوم ..
كتبتلهـا برشـة كلام وفسختـو .. ديجـا من غدوة باش نتقـابلـو .. خفـت تبدل رايهـا بطلـت ..


جاء غـدوة والصبـر بيّـا طال ، الوقـت عملـت بالعـانـى .. فالخـدمـة معـاد حامـل شيئ !
عرفتـى فهمـت إذا باش نزيـد نقعـد .. النهـار يوفى علـى كارثـة !


قبـل الـوقت ببـرشـة وصلـت .. لانجمـت نطلبهـا لا نكلمـها .. قلـت نـدور ومنهـا نركّـح مخّـى ونتفـاهم معـاه مايبلبـزهاش .. ينحـى غيـرتـو الزايـدة ومايهمـوش آش لبسـت .. قصيـر طويل .. أزرق أخظـر .. زادة قصـت شعـرهاوإلّى بدلـت فى لونـو .. نوقـز تاليفـونها وإلّا خزرت لشيرة أخـرى .. مايهمـكش.. المـرئ هـذى معـاش مـرتـك .. هــيّ .. معـاش متـاعـك ..


نـدور .. نتفـرج فى وجـوه النـاس .. مانعـرش علاش نفـرس عليـها هـيّ تعـرضنيـش .. هالعقـل مايحبـش يريـض !

طلبتنـى قلتلـى هانـى جايـة ...
هالصـوت مبنـّو .. قدّاش توحشتـو ...
طرتلـها .. وجـات ..

ماتستنّـاوش حاجـة كبيـرة .. صحيـح جـات .. قعـدنا وحكيـنا .. أمـا ..
حبـت ترانـى باش تقلـى آ ـ ديـو ، خارجـة من تـونـس .. تحـب إلى عرسـت بيـه وديجا مرجتنـى بكلمـت راجـلـى أكثـر من خمسة لاف مـرة فى كل كلمـت وحـش نقـولهـا وإلـى كل مانشدلهـا يدها وتجبـدها كينـى مفجـوعـة ، حبيـت نكـذب عليـها .. نقلـها رتحـت من منضـرك وإلا نحسـب روحـى مانحبـش نسمـع .. والشّـويـة .. كيف جـات كيمة نحـب ستيلـها فاللبسـة بضبـط .. بوسـة الخال إخـر رقبتهـا وكتفهـا ليسـار .. كحـل عينيـها .. لبسـت لكحـل وقداش يواتيـها .. تى الحاصـل برشـة شمـاته ..
المهـم .. موضوعنـا تحصـر فى "تاو تلقـى لى تحبـك" وآكـة اللوغــة .. الحـاصل .. أوّل مرة نحـس روحـى سليباتار .. أول مـرة نحـس روحـى وحـدى بالحـق ...

الوقـت تعـدى فيسـع .. هـيّ زادة قالتـها ..

فالمـرواح .. نمشـى وحـدة وحـدة .. دخـانـى مونسنـى .. نخمم وحدى آكاكـة .. فالدنيـا وإذا عنـدى عـلاش نقـعد فى تـونس ..
فالقـصبة .. تذكـرت .. أيامـات صغـر تعـدّات .. بيـن مرابـط والعنبـة .. الشـواشيـن ..ووقـت حلـت العلـي ومشينـا عكـس عادتنـا فى لبيـض تقـول ملايكـة خرجـت إنتـى ..

أكاكـة .. سارح وحـدى ..
روحـت .. عادى باش مانلقـاش ميساج من عنـدك ولا نلقاك إنتـى ..
وقتهـا .. نجمـت نحكـى .. وقتهـا .. عرفـت آش حبيـت نقلك ..


أما أش بش نحكى وآش باش نخلى ياعمرى.. نحكيلك عالوحش؟ وإلى على دموع البنات فى حكايتنا؟ نحكيلك قداش توحشتك وحكيت عليك وستنيتك؟ وإلى نحكيلك على عقدتهم من غير مايشوفوك.. وماعرفو عليك كان لحكيتو؟ قداش صورتك.. وستنيتك.. وتوه خايف، كنت خايف نخسرك أكثر مابعدت تزيد تبعد توا هاك خليتها واسعة وعريضة، خفت المحبة القديمة تفيق ونجبدك لضلامى بعد ماشفت حياتك نرجعك بتوالى.. طار عليا النوم وماكش هونى باش تحكيلى حكاية حتى يسرقنى النوم.. كان جيت توا عندى.. ، تحكيلى؟ ميسالش نعنقك زعمة؟ وإلا كان نبوسك برشة؟
تتفكر وقت كنت متاعى..؟
تعرف شمزال عندى منك؟ تصاور.. جرد تصاور.. تصاور باش تونسنى ونحاول نعوض بيها تعنيقتك كلامك صوتك دفاك.. تصاور.. نتخيل بيهم وجودك ونتذكر بيهم ماضى معاك نسيتو إنتى.. تصاور..نتفرج فيهم حتى يهزنى النوم، تصاور فى لحضة سرحت فيهم خلاونى مانسحق حد وشي فالدنيا..حسيتك جنبى.. غمضت عنيا وغرست راسى فالمخدة نلقاش من ريحتك.. وإلى نتذكرها.. توحشتك، أما ماكش عندى وحتى إذا إنتى هونى إلى نحلم بيه برشة.. خلينى فالتصاور حتى يسرقنى النوم فماش ماتجى للحلمة.. يا أحلى حلمة..أما ميسالش.. تصاور.. نتذكر ..ومزلت نتذكر، بين خيوط الدخان والقهوة الباردة لمونستنى فى غيابك إنتى.. تفاصيل بسيطة منك.. تخلينى نتبسم وحدى كالمهبول، تخنقنى البسمة.. تبرد الروح باعد مافاقت على ذكرى ونتذكر.. إلى كى باش نفيق غدوة لانى باش نلقاك لانحكى معاك لانراك لانبوسك ولا حتى.. نعملو عركة.. وقت توفى ببرشة بوس وتخرنين على حاجة تافهة.. وسعات.. كى الشهوة تغلب فى لحضة لحكايات الكل تنسات، أنا وإنتى ..عندى، يوفى العياط ويبقى سكاتك وصوت نفس متاعك مونسنى ضايع فى شعرك.. وبوسة الرقبة، متوحشك ومتوحش كلامك وسكاتك حتى عركك وعياطتك.. متوحشك.. .. ملخر وبرجولية توحشتك موش عيب باش نحكى وفاش قام نخبى، عشرتنا برغم تنسات موش شوية، عالأقل نقولهالك حتى كان ماكش باش تسمعها "توحشتك" .. من كثر ماتوحشتك نحب نوجعك قد ماغلبنى الوحش ليك! نحب نعنقك نحس ضلوعك والنفس ودفئ بدنك! نحب نحسك عندى.. صوابعى فى شعرك.. وبوسة لبوست الخال لى فى كتفك ليسار.. توحشتك ونحب نسمع منك حتى السكات ميسالش المهم نحبك عندى باش تفهم؟! توحشتك.. وأكثر مالوحش حبيتك عندى ببلادتك وريحتك والكحل لى فى عينيك كيمة نحبو وشفايفك رقبتك يديك والخواتم لمزينة صوابعك صوتك .. وبوستك..


اليـوم ريتـك ومزلت كيمة إنتـى تعجبنى.. وتزيد تحلى فى عينى.. كى تلبس لكحل، كى تسيب شعرك على طولو وعلى خاطرى تكحل بزايد وتخلى الكحل فى عينيك كيمة نعشقهم ونعشقك إنتى.. تتفكر كى تغير وإلى تقول "إنتى متاعى"؟! كى ماتحبش تسيبلى يدى فى القهوة ترصيلى نتكيف ونشعل بيد وحدة.. كى تعدى صوابعك على عروق يديا وتبوسهم..؟ اليوم شدت يدك .. ولات محــرّمات .. كى تحب تروح وأنـا نقلك مزال بكرى.. تفكرت كيفاش كنت تخلينى نطير بيك للدار بتوشويشة.. {شريت روب دونوى جديدة ياخى ماتحبش تراها؟} ..توحشت بلادتك وقباحتك وتفاصيلك وكلك! سماك أكثر مالازم توحشتك! .. كفاش توا؟! حبى.. باش نخطفك ! قداش نضحكو بريق هالصحبة.. توا بربى نجيو هكة؟ "أصدقاء"!؟ بعد ماكنت عندى ومتاعى وليالى عرك مالغيرة باش نجم وتنجم التطفى الضوء وماتسئلش؟ ونجم زعمة مانسئلش؟ ..و إذا حكيت.. هكة نسمك كيمة اليوم من بعيد معاش عندى حق نقربلك؟ نشدك من يدك؟ ..لحقيقة وحشى ليك أكبر أما فاهم إلى فمة "حدود" جديدة وموش عارف كيفاش نقبلها! أع ع ع! تعرف حبى.. تعبنى التخمام.. بون نوى وغدوة خليه فى غدوة، توحشتك وأكاهو.. مانعرش إذا باش نجم نحكيلك خاطر خبيتلك برشة حكايات.. أما ماتصورتش روحى لها الدرجة متوحش نسمعك.. تحكى ونحكى وإلى يحسب وحدو يفضلو! لذى من غير حسابات...


من غــدوة .. كى مشـى الليـل بكـلامـو وضـلامـو .. قمـت .. صباح.. دنيا ساكة وصوت صغار متعدين فيقنى، نخدم اليوم أما النوم غلبنى.. قمت.. ماعينيش نسلم فى دفئ الكوات.. نحسب وحدى فى قداش وقت نوصل كان نزيد درج.. درجين.. ربع ساعة.. نص ساعة.. معاش بكرى يلزم نقوم وهالنوم عملها بيا البارح وسرقنى قبل مانعمر الفياقة.. نخزر للسقف سارح.. نتذكر ومتوحش قومتى وقت كانت بلاصتك جنبى دافية.. شعرك عالمخدة صوتك فالكوجينة تغنى قهوتى الدافية من شفايفك وصوت الشقاشق إلى فى يديك كى تفيقنى قبل ماتوصلى.. كى نحسب روحى راقد.. نغمض عنيا ومتهنى إلى شي مايفوتنى خاطر فمة إنتى.. تفيقنى... طقس عامل دراكيفاش! ريح وشجر قريب يتقلع! وسحاب وبرد! طقس متاع ركشة وقهوة وموزيكة بنينة ...وإنتى ، ياخى ماتتوحشنيش؟ مانجيش على بالك؟ ماتتوحشنيش كى تصب الشتاء؟ كى تخرج تدور؟ كى تعمل قهوة ؟ كى تروح تاعبة إخر لعشية؟ كى تعيش فرحة كى تحزن كى تحب تحكى تلقى شكون؟ يسمعك كيفى يدلك كيفى يطيبلك الشكولا شو كيمة تحبها يبوسك بشهوة كيفى.. ويحبك.. كى همى.. ماتوحشتنيش سماك؟ لها الدرجة تنسيت آنا.. ! تى وينى المحبة والعشرة القديمة؟ والغيرة القديمة؟ كذبة؟ ..توحشتك.. ومزلت متوحشك... .



تعـرف .. هذا الكـل كلام زايـد .. وقـدام إلّـى عشنـاه تافـه .. لحضـة معاك ماتوصفهـاش موزيكـة وإلّا كتيـبة .. يمكـن نحكـى برشـة علّـى عشناه وهذى غلطـة ، حبيـت نحكـى علّـى نحـب نعيشـو معاك .. توّا اليـوم وغـدوة .. قدّاش من بلاصـة مزلنـا ممشينالهـاش .. قدّاش من حلمـة وخرناها حتّـى تفارقنـا وماعشناهاش .. قدّاس ستنينـا حجات .. واليـوم هاي جات .. أما ماناش مع بعضنـا ..
خبينـا برشـة حجات لغـدوة وكى جاء غدوة ماكش هونـى ومانيـش معاك .. حلمـة برشـة .. بحاجات مزيانـة ، ممكـن تراهـم إنتـى تافهيـن .. أما وعدتنـى مرة نعيشـوهم ، موش نسئـل علـى بدنـك ولا هملـة ونقصـد شهـوة كى نقلـك حبيـت حس دفائ بدنـك وأنـا نكتـب توّا فى هالكلمتيـن .. حبيـت نتفرج فيـك تطيـب فى قهوتك وإلّا دايخـة مع التلفـزة فى آكة السخطة مسلسلات يعجبـوك .. حبيـت تعنقنـى وتسكـت .. توحشـت خزرتـك البريئة كى تعمـل عملـة ، كى نحكيلـك عليـك زعمة زعمـة إنتـى طفلـة أخـرى .. كى تغيـر من روحك وترصيلـى نرضى فيك .. شعـرك و ريحتـك .. توحشتهـم يا هـم توحشتهـم سمـاك توحشـت بـوست الرقبـة وكى نبـوسك من ضهـرك شمـاته !! فديـت الكلام ... وتخنقـت أكثـر كى حاس كلامـى موش باش يوصلـك .. يمكـن تقـراه غـدوة يمكن بعـد شوية كيمة ممكـن ماكـش باش تقـراه .. وقتهـا شوف أنـا فين وإنتـى فيـن .. عادى حبـى .. عادى .. توحشتـك وآكهـو ؛ فرحـت كى ريتـك وفهمـت إلـى سايا ، كل شيئ وفـى ... هنينــى عليــك .. حبيــتك برشـة .. هنينــى عليــك .