خــارج عـن المــوضــوع : " الحــــي ..يــــروح" {9}

وفـا .. التحويص والهملـة ..الرحلـة الطويلـة للضيـاع الإختيارى واليوم.. نروح .. نرجع للحيوط القديمة و وجوه توحشتها .. لناس نسيتها وناس تبدلت وماعادت كيف ماخلّيتها ..تبدل فالدنيا برشة ، وتبدل فيا زادة.. فرحان على متغشش على مانيش فاهم آش حاس ، هنا .. شيئ ما بقى كيما خلّيتو .. لاصوت لاريحـة .. "الــوقت يداوى"

وسط فرحتى .. كلمتنى.. هنا.. كل شيئ تشربك .. !! ريت النومرو دخلت فى حيط ... أما موش هذا حيط العادة .. حيط جديد .. أول مرّة فى حياتى و حياتها نقلّها "لا" على حاجة تطلبها منّى .. حبّت نعملو قهوة .. ماريتش مالحكاية فايدة .. من غير ما نخمم إذا قلت إي زعمة آش باش نحكيو .. ليلتها رقدت عادى .. ماجاتش على بالى .. .

بحكم طول هالرحلة .. الكنيكسيون مقصوصة .. تلزّيت نهبط لقهوة العادة .. و أول مرّة .. مانخممش إذا عرضتنى شنحكى .. أول مرة مانفركسش عليها فى وجوه الناس ... أول مرة نرى صاحباتها ومانسلمش عليهم .. نصقصيهم عليها.. كينّى مانعرفهمش تعدّيت .. وورى البيسي تخبّيت .. مالناس الكل، نفرت فالبوات مايل .. أول مرّة السرفور يحطلى قهوتى من غير مايسلّم .. من غير مانهز راسى .. "مرسى كمال" ..

لا .. موش كمال .. 

على هزت راسى من هالصوت الغريب إلى نعرفو نلقاها هيّ .. جابتلى قهوتى .. تصدمت ، آش تحب عندى هذى ..

قعدت جنبى ... حطت ساكها وأنا نخزر .. 

محلاه كلامك .. كتبتلى مرّة فى بعدك " متوحشك.. وفى غيابك قهوتى مزالت مرة.. بلا سكر شفايفك، مزال السقارو ورى خوه.. تخمام على وحش وخنقة..بلا تعنيقت الليل.. بلا بوست صباح، حتى فى غيابك مزلت نلوج عليك حتى بين أسطرة قديمة وكلام الليل وحديث حكيناه.. وبوس.. تسرق بمحبة.. بمعزة.. وقداش خذانى الوحش لوقت معاك، نسرقك ونسرقنى مالدنيا.. حبيبى، توحشتك وصابر بتصويرتك لخبيتها فى خيالى، باش حتى موش معاك آنا ليك "

هانى جبتلك قهوتك .. يزى ماشربتها مرّة ..

من غير مانتكلم وقفت نلم فى دبشى المفرّت .. شدتنى من يدى .. وحلفت عليّا نقعد .. 

قعدت .. ومزلت ساكت.. وهيّ .. تخزر .. مصدومة .. 

طوال السكات . . . تكلمت .. 

ـ .. توحّشتك .. توحشت كل مافيك .. كل تفاصيلك البسيطة ..غيرتك الزايدة وعياطك .. ياخايب إنتى .. توحشت تنرفيزك ..غشك.. وكى ترضّينى .. صوتك الحنين فالصباح ودلالى عليك .. زيد قلّى ماتوحشتش دلالى ..؟

ـ ضحكت .. 

ـ ريت كيفاش ؟ أهوكة إنتى زادة متوحشنى .. تعرف .. أكثر ماتوحشت تعنيقتك ..بوستك وسكاتك هذا ... جديد عليّا .. توحشت كلامك كى تحكى وتفسّر .. تحكيلى على نهار غدوة معايا وليّا وحدى .. تحكيلى حكاية حتّى نرقد .. عندك .. 

ـ ياخى .. ؟

ـ شيئ .. نحكيلك وكهو .. علاش تحب حاجة أخرى إنتى ؟ مانى نعرفك آش تحب يا خبيث ..  !

ـ لا قصدى كملت حكيت ؟

ـ علاش تعمل فى قهوة مزروب ..؟ جايتك شكون ..؟

ـ لا ، أما كان تسإل "عندى شكون" إي عندى 

ـ حتّى أنـا .. أما مهوش كيفك .. ماعندوش صوتك .. مستك .. خوفك عليّا ولا حتى من غيرتك .. وهيّ ؟ ها الشكون هذى شعندها منّى ؟ تعرف ترضيك ؟ تعرفك آش تحب آش تكره ؟ تعرف تفاصيلك إلّى مانعرفهاش؟ بوستها كى بوستى ؟ أزين ..؟ شعرها أطول؟ ... تعملّك الحجات إلى تحبها .. ترضيك كى تغلط ..؟ تحمل هالغش إلّى فيك ..؟ تحـــبك ..؟ كيمـا حبيتك .. وإلّا أقل؟ تاخو بخاطرك ؟ تسمع كلامك .. تفهمك كى ماتحبش تحكى .. تصبر عليك ..؟ تدلّـك كيما دلالـى ..؟  زعمة كان .. 

ـ تاخو نومروها تعديو لوفر و سيبنى ..؟

ـ باهى .. سؤال واحد .. تهزها فين مشينا ؟ بلايصنا .. تقلها من كلمات بيناتنا ؟ حكيتلها عليّا ..؟ تسألك عليّا؟ تتفكرنى كى تبدى معاها و ..

ـ هذا موش سؤال واحد 

ـ ماتخوش عليّا توحشتك .. كمّل سنستنى إلى إنتى متاعى ..

ـ وكى إنتى ما تعرش تستحفض !

ـ باهى .. باهى .. سؤال واحد بالحق ..

ـ إسئل ..

ـ مزلت تحبنـى .. ؟ .. زعمة كى قبل ..

ـ نتكلّم .. أما إسمعنى للّخر 

ـ أوكى حبـى .. أوكى ..

ــ أوّل ما مشيت للخلاء وماهو فيبالك هارب منّك .. لانجمت نقدّم لا نوخّر لا نعيش لا نموت .. كرهت كل شيئ وقت كل شيئ .. ولّى يذكرنى بيك .. حبّيتـك .. أكثر مالمحبـة .. وفى رجوعى فركست عليك .. حبيت نحكيلك إلّى لا نجمت ننساك .. لا من بالى نحيك ..  تتفكر إخر قهوة بيناتنا .. ؟ حكيت معايا بهاكة البرود .. آكة الزلعآت ... فيقونى و كبرونى .. فهمونى إلى مافهمتوش فى سنين !! إنتى ؟ طفلة أخرى موش إلّى حبيتها !! إنتى لانعرف لا تعرفنى ... شكون إنتى ..؟

ـ ولّات تبكى .. قتلى "آنـا إلى تحبها .. نسيتنى .."

ـ لا يا عمرى ... إنتى لا نعرفك لا نجم نسمّيك

ـ باهى تاو نرجع إلى تحبها .. نتبدل .. نوعدك نتبدل ..

ـ إلّى يتبدل مرّة يتبدل 10 .. وشيئ مايعجبك ..لا الغيرة ولا السكات، لا إلى عشتو قبلك ولا إلى عشتو معاك.. وتقلى نحبك؟ علاش حبك هكة مايتفهمش فيه كلمتين خوات، علاش كل ما كنت نقرب تهرب.. تفهمنى إلى غدوة جاي وإلى لازم فما كف تفيق بيه.. وتعرف إلى الحلمة وفات؟ علاش حكاياتك ناقصة ..ماتفوتش النص، و كى كنت معاك تلومنى عالخيالات.. خيال الخوف وخيال الكره بعد المحبة، خيال الهروب وغيرو برشة.. أما خلى عزاها سكات! لعبت ياعمرى.. لعبت، وماتبكيش ..إذا خسرت اللعبة، وخليك كيما تحب إنتى، صحة ليك الوقت عطاك ، فهّمنى بربّى يا فاهمة الدنيا ، علاش الناس هكة؟ علاش حتى كى تنحى من لحمك باش ترضيه.. يراها حاجة بسيطة، مهبل روحك ومتصورو يفرح بخطوة جديدة معاه.. يقلك "لا موش وقتو" وإلا "معاش عينى" ... تعرف آش معناها تحس روحك نفحة؟ تفشة بعد ماعملت إلى تنجم وشيئ النافع ربى! و اليوم.. كى تظربك الحيوط و تتسكر البيبان تتفكر إلى عندك آنا.. و تجى تعارك بإسم العشرة القديمة و بكل حق.. تقلى "حبنى..؟" توصف و تتفنن و تزيد تعارك و تلوم علي عشت بعدك ..تسميها خيانة و تسامحنى وحدك! تجبدنى ليك بشهوة بدن ..تنزل عالحروف و تحكى من أيام قديمة و علي نحبو فماش ما تفيق فيا الطمع.. تقلى "حبنى" و توصف و تتفنن كيفاش الحب ليك يكون ..! نهد غرور أنثى ببوسة من جبينها و نقوم.. "مانيش كيفهم؟.. كلمة سمعناها برشة و من حقك ما تصدقهاش.. من غير ما نقولها نمشى.. والوقت وحدو يخليك تصدق.. "  وما تلومش عليا كى خترت نتبدل معاك و نعيش فريجيدار! موش منى .. "مكتــوب".. كلمتك إنتى .. كى نحب نقرب تبعد .. كى نبعد تقرب إنتى؟

قدّاش هالدنيا معوجة .. أيّ .. نخلّيك .. كيما خليتنى // آديو .