سكات؛ رشفة قهوة وموزيكة بنينة وذكرى حزينة وضحكة على وقت تعدى ، تانقو .. معنق خيالك ونشطح معاك مغمض عنيا وخايف نحلهم خاطر عارف موش باش نلقاك، نتبسم ونعاود الشطحة، والسكرة غلطتنى فالخطوة، نزيد رشفة قهوة نطفى السيقارو نعاود من لول، نشعل سيقارو، ناقف وقفة صحيحة نعنق الهواء .. نتخيلك هنا، نتخيل التعنيقة دفئ بدنك والتحريكة شدة يدك والخزرة، نعصر ونلوج تراكن مخى باش نتذكر الريحة، ليلة صيف من أوت نسمة باردة، تتذكر ؟ الروبة الكحلة ، كحل عينيك، كنتور فمك ، شعرك كى تهزو النسمة.. صوتك فى كلمة توحشتك، بوسة الخال على كتفك ليسار، عرف الفل لى نتفقدوه تقول بنتنا، و الطابع ونص سكر ،
ما نسيتش ، عمرى ما نسيت ، موش سكرت حتى تذكرت .. شربت صحيح أما وحدى وحبيت نفرح، حبيت نعمل جو ونغلب التركيبة، حبيت ننسى هالبلاد المباعة وناسها المريضة، حبيت نضحك، حبيت نفرح، حبيت نهرب من هالخيوبية والوجاعة لى دايرة بينا، حبيت ننسى الحيط لى داخلين فيه وحال هالشعب المسكين لى فيسع ما يعديوها عليه، حبيت نرجع لوقت ما همنى شيء فالدنيا، ورجعت لوقت دنيتى كانت إنتى، وخذانى الوحش حتى تخيلتك هنا، معايا تونّس فيا والمرواح تسوق بيا إنتى، سياقتك الحموم لى نسوق خير منها وأنا سكران توحشتها، توحشت تخاف عليا، توحشت نحكيلك، توحشت أنو عندى إنتى نشكيلك لى صاير نحكيلك لمخبى نخرنن عالصغيرة نسب الدنيا نصيح نضحلك فى عز تعبى ونضحك معاك عالدنيا ونعنقك .. توحشت وقت كان عندى إنتى وآكة التعنيقة القوية وسكات لى قبل البوسة، كنت نغلب الدنيا بيك، كنت نغلب تعبى بيك، كنت نغلب وجاعة كل شيء بيك، كنت دواء كل شيء ، وحل كل شيء..
حتى بعد تعب الخدمة كنت عارف لى باش نروح نلقاك، كنت عارف إلى حلماتى أكبر منى أما يجى نهار ونعيشهم معاك، كنت نجم نصبر خاطر قاعد نخبى لغدوة فيه إنتى، ونعرفك ما تبيعنش،
خاطرك أحلى من أنى نكتبك نقص كلامى عليك يا أحلى حلمة عشتها حقيقة،
ونحكيلك فى حدادك آش صار،
خزرت لروحى خزرة خايبة، وخاطر عارفك ما تتعاودش كملت بخيالك وشوية منك خبيتو عليك، كملت ثنيتى وحدى وتعلمت نعيش وحدى، كتبلك كل ما نتوحشك وتفقدتك برشة، نسنست عليك وحسبت روحى ما فيباليش،
بعد ألف خطوة عملتها إنتى نجمت أنا نعمل وحدة..
خطيوة صغيرة بعد سنين فرجة، أما خاطر ستانست باللوكس، مع الشلايك ما لقيتش الحساب،
سنستنى بالثيقة و الحقيقة الحجات المزيانة البسيطة، أكبر غلطة عملتها أنك حبيتنى فى بلاد روحى روحى لا يرحم من مات، مشى لبالى إلى كى وحدة قتلى نحبك من بعدك تحبنى قد ما حبيت إنتى، وأول صدمة بدات من غادى،
نحبك عندهم نفحة، كلمة، زينة لميساج، والعمايل؟
هممممم .. فمة لى جابتها برجلة و جبدت روحها، فمة لى عجبتها الحكاية، وفيهم لى زادتنى لليسته،
ما نلومش عليهم إذا خانو وإلا باعو ، إي تعلمت نسامح،
بالعكس .. على قد ما كنت نكرهم.. صبحو يسخفونى ..
طلعو جرد مشاقين وجواعة، مشاقين يتحبو.. يحسو محبة .. حتى بالكذب، وجواعة متاع منضر وللعرض فقط، يعنى حبها الرهيب ليا تضحى بيه على جرد قهوة فالاك أو المنزه مع واحد عرفتو بالتندر مثلا فقط باش تتزبر، إي ، وما خفي كان أعضم وكى تسمع الكلام مخك ياقف،
ماكش جيعانة كيمة لى عرفتهم بعدك، إي عرفت بعدك من هالأنواع وأنا كالبهلول كنت نرجع باللوم على روحى، لا مانيش منهار إقتصاديا مزلت نجم نصرف ونخرج وما إليه أما هالرخاص أي حد يهزهم عادى، ما عندهمش قيمة وهنا وين غطلت .. تمنيتك حبيتنى أقل شوية راهى حياتى مشات أسهل، تمنيتك جيت فى لخر .. خاطر توا جرايرك نعامل فلى ما يستاهلوش بكل قيمة .. بكل قدر .. وهوما أشكال وقتية تقبل البيع والشراء دون تفاوض؛
نحى تفذليك مع كل خطوة نعملها مع كل وحدة نعرفها مع كل صدمة فى أنواع فيبالى موجودة كان فالفيديوات الكوميدية نتأكد إلى بعدك معاش حب، ولا يكون ، ونحى ريحة الوسكى متوحشك ، أما موش فى حاجة ليك،
حتى خيالك الكذاب ما يدفيش ووجودك بعد كل هالوقت ما عندى ما نندب بيه، رشفة قهوة وسيقارو ونبدل الموزيكة، يزى من هاللحن لحزين وما تخافش، مانيش كيفهم ، ما نحطش روحى للبيع .
